រដ្ឋបាលខេត្តកណ្តាល គាំទ្រគម្រោងបំពាក់ភ្លើងបំភ្លឺផ្លូវសាធារណៈដោយប្រព័ន្ធបច្ចេកវិទ្យាឆ្លាតវ៉ៃ និងមានភាពសន្សំសំចៃខ្ពស់ របស់ក្រុមហ៊ុនជប៉ុន មីនេបៀ Minebea(Cambodia) Co.,Ltd
ខេត្តកណ្ដាល៖ក្នុងពិធីជួបពិភាក្សាការងារជាមួយតំណាងក្រុមហ៊ុនជប៉ុន ផ្គត់ផ្គង់ភ្លើងបំភ្លឺផ្លូវឆ្លាតវ៉ៃ មីនេបៀ Minebea(Cambodia) Co.,Ltd នៅពីព្រឹកថ្ងៃទី១២ ខែវិច្ឆិកា ឆ្នាំ២០២១ នៅសាលាខេត្តកណ្ដាល ដោយមានការចូលរួមពី ឯកឧត្តមអភិបាលរងខេត្ត មន្ទីរជំនាញ និងមន្ត្រីពាក់ព័ន្ធ ឯកឧត្តម គង់ សោភ័ណ្ឌ អភិបាល នៃគណៈអភិបាលខេត្តកណ្តាល បានបង្ហាញការគាំទ្រពាក់ព័ន្ធនឹងគម្រោងបំពាក់ភ្លើងបំភ្លឺផ្លូវសាធារណៈ ដោយប្រព័ន្ធបច្ចេកវិទ្យាឆ្លាតវ៉ៃ និងមានភាពសន្សំសំចៃខ្ពស់ និងបានអនុញ្ញាតិឱ្យក្រុមហ៊ុនចុះសិក្សា និងបៀធៀការសុំភ្លើងរវាងអំពូលចាស់ និងអំពូលរបស់ក្រុមហ៊ុន ឱ្យបានច្បាស់លាស់ផងដែរ សម្រាប់ជាមូលដ្ឋានក្នុងការសម្រេចចិត្ត ដើម្បីចូលរួមសន្សំសំចៃថវិកាចំណាយលើការប្រើប្រាស់ចរន្តអគ្គិសនី ធានានិរន្តរភាពនៃដំណើរការអំពូលទូទាំងខេត្ត សោភណ្ឌភាព និងសុវត្ថិភាពក្នុងការធ្វើដំណើររបស់ប្រជាពលរដ្ឋ ជាពិសេសដើម្បីពង្រឹងក្នុងការអនុវត្ត គោលនយោបាយភូមិ ឃុំ សង្កាត់ មានសុវត្ថិភាព បានកាន់តែប្រសើរបន្ថែមទៀត។
ជាមួយគ្នានោះដែរលោក តាកាហ្ស៊ី អាអូគី នាយកគ្រប់គ្រងផ្នែកលក់ របស់ក្រុមហ៊ុនមីនីបៀ(ខេមបូឌា) បន្ទាប់ពីបាន ការធ្វើបទបង្ហាញពីបំពាក់ភ្លើងបំភ្លឺផ្លូវសាធារណៈដោយប្រព័ន្ធបច្ចេកវិទ្យាឆ្លាតវ៉ៃ និងបង្ហាញរបាយការណ៍លទ្ធផល នៃការសិក្សាអំពីបច្ចុប្បន្នភាព អំពូលបំភ្លឺផ្លូវសាធារណៈក្នុងខេត្តកណ្ដាលរួចមក លោកបានសម្ដែងនូវការអរគុណចំពោះ ឯកឧត្តមអភិបាលខេត្ត ដែលបានអនុញ្ញាតឱ្យលោក និងសហការី ចូលជួបសម្ដែងការគួរសម៕