៧នាក់ស្លាប់ និងជាង១០នាក់ទៀត កំពុងជួយសង្គ្រោះនៅមន្ទីរពេទ្យ ក្រោយពួកគេយកអាកុល លាយជាមួយទឹកភេសជ្ជ:ផឹក បណ្តាលឲ្យពុល នៅក្រុងប៉ោយបែត
ខេត្តបន្ទាយមានជ័យ៖ពលករខ្មែរ ដែលវិលត្រឡប់មកពីប្រទេសថៃ សរុប២១នាក់ ដែលអាជ្ញាធរ បញ្ជូនទៅធ្វើចត្តាឡីស័កនៅមណ្ឌលកូបធំ ស្ថិតនៅក្នុងសង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ បានយកអាកុលលាយជាមួយទឹកភេសជ្ជ:ផឹក ទើបបណ្តាលឲ្យពុល រហូតដល់មានអ្នកស្លាប់ជាបន្តបន្ទាប់ សរុបចំនួន៧នាក់ បង្កការភ្ញាក់ផ្អើល កាលពីថ្ងៃទី១១ ខែវិច្ឆិកា ឆ្នាំ២០២១។
លោកវិជ្ជបណ្ឌិត ឡេ ច័ន្ទសង្វាត ប្រធានមន្ទីរសុខាភិបាល ខេត្តបន្ទាយមានជ័យ បានឲ្យដឹងនៅព្រឹក ថ្ងៃទី១២ ខែវិច្ឆិកា ឆ្នាំ២០២១ នេះថា ក្រោយពីកើតហេតុនេះ ភា្លមក្រុមគ្រូពេទ្យ និងកម្លាំងសមត្ថកិច្ចបានបញ្ជូនទៅសង្គ្រោះភ្លាមៗ នៅឯមន្ទីរពេទ្យបង្អែកក្រុងប៉ោយប៉ែត ,មន្ទីរពេទ្យបង្អែកស្រុកមង្គលបុរី និងខ្លះទៀតបញ្ជូនបន្តទៅមន្ទីរពេទ្យនៅខេត្តសៀមរាបផងដែរ ហើយរហូតមកដល់ម៉ោងនេះ ពលករខ្មែរ ដែលស្នាក់នៅមណ្ឌលកូបធំ ដែលយកអាកុលលាយជាមួយទឹកសុទ្ធ,ទឹកក្រូច និងទឹកអូរវ៉ាឈិសរុបចំនួន២១នាក់ ស្រី២នាក់ បណ្តាលឲ្យស្លាប់ចំនួន៧នាក់ ស្រី១នាក់។រីឯ១៤នាក់ទៀតកំពុងឋិតក្នុងការតាមដាននិងជួយសង្ក្រោះ របស់ក្រុមគ្រូពេទ្យ ដោយនៅមន្ទីរពេទ្យបង្អែកប៉ោយប៉ែតមានចំនួន១២នាក់ និងសៀមរាបចំនួន២នាក់។
លោកវិជ្ជបណ្ឌិត ឡេ ច័ន្ទសង្វាត បញ្ជាក់ថា ករណីនេះមិនគួរកើតមានឡើង ហើយក៏មិននឹកស្មានដល់ ពីព្រោះអាកុល គឺសម្រាប់បាញ់សម្លាប់មេរោគ ហើយម្យ៉ាងវិញទៀតពួកគាត់កាន់ជាប់នឹងខ្លួនក្នុង១នាក់ ១ដបតែប៉ុណ្ណោះ។
លោកវិជ្ជបណ្ឌិត បញ្ជាក់ទៀតថា ពលករខ្មែរទាំងនេះ បាននាំគ្នាយកអាកុលលាយផឹកតាំងពីថ្ងៃទី៩ -១០ ម្លេះ ទើបថ្ងៃទី១១ ខែវិច្ឆិកា មានការពុលមណ្តាល ឲ្យមានអ្នកស្លាប់ ហើយខណៈពេលនេះ ក្រុមគ្រូពេទ្យ មន្ត្រីជំនាញ និងអាជ្ញាធរមូលដ្ឋាន កំពុងយកចិត្តទុកដាក់ រឹតបន្តឹង បន្ថែមទៀតក្នុងការនាំចូលនូវសម្ភារៈផ្សេងៗ ពិសេសលើចំណីអាហារ ក្នុងមណ្ឌលធ្វើចត្តាឡីស័ក៕