មិនដឹងជាមានខ្នងប៉ុណ្ណានោះទេ ម្ចាស់អាគាស្នាក់នៅរួម ឈ្មោះ ម៉ែន ណារិន ធ្វើសំណង់រឹងអត់ច្បាប់ រំលោភលើដីចំណីផ្លូវរដ្ឋហើយ អាជ្ញាធរជំនាញណែនាំអប់រំពីផ្លូវច្បាប់ បែជាជេរប្រមាថ
ខេត្តបន្ទាយមានជ័យ៖ស្ត្រីម្នាក់ដែលជាម្ចាស់អាគាស្នាក់នៅ ដែលកំពុងឲ្យជាងសាងសង់សំណង់រឹងរំលោភលើដីចំណីផ្លូវរបស់រដ្ឋយ៉ាងសកម្ម នៅចំណុចផ្លូវចូលក្បែរចំណតរថយន្តក្រុង ស្ថិតនៅក្នុងភូមិបាលិលេយ្យ១ សង្កាត់/ក្រុងប៉ោយប៉ែត ខេត្តបន្ទាយមានជ័យ បានជេរប្រមាថដល់កម្លាំងជំនាញ ដែលកំពុងធ្វើការណែនាំអប់រំឲ្យបញ្ឈប់ការសាងសង់ខុសច្បាប់បន្ត។
ការចុះណែនាំនេះជាលើកទី២ នៅរសៀលថ្ងៃទី១២ ខែវិច្ឆិកា ឆ្នាំ២០២១នេះ ដឹកនាំដោយលោក កែវ តារារស្មី អភិបាលរងក្រុងប៉ោយប៉ែត និងមានការចូលរួមពីនាយករដ្ឋបាលក្រុង ប្រធានការិយាល័យនិតិកម្ម មន្ត្រីជំនាញភូមិបាល និងកម្លាំងអធិការដ្ឋាននគរបាលក្រុង កងរាជអាវុធហត្ថក្រុង ព្រមទាំងប៉ុស្តិ៍នគរបាលផងដែរ។
លោក កែវ តារារស្មី អភិបាលរងក្រុង បានឲ្យដឹងថា សំណង់រឹងដែលកំពុងសាងសង់រំលោភលើដីចំណីផ្លូវរបស់រដ្ឋនេះ មិនមានច្បាប់នោះទេ ដោយកាលពីមុនម្ចាស់អាគារសាងសង់ត្រឹមតែមួយជាន់តែប៉ុណ្ណោះ តែពេលនេះបានធ្វើរហូតបានជាច្រើនជាន់ មិនត្រឹមតែប៉ុណោះបានបន្តឲ្យធ្វើចេញបន្ថែមរលោភលើដីចំណីផ្លូវរបស់រដ្ឋទៀត។
លោកបន្តថា កាលពីថ្ងៃទី១១ ខែវិច្ឆិកា ម្សិលមិញនេះ កម្លាំងជំនាញបានធ្វើការណែនាំឲ្យបញ្ឈប់ការសាងសង់បន្តម្តងរួចមកហើយ លុះមកដល់ថ្ងៃនេះបែជាបន្តលួចធ្វើទាំងយប់ មិនព្រមស្តាប់ថែមទាំងជេរប្រមាថដល់មន្ត្រីអនុវត្តច្បាប់ទៅវិញ។
លោកបញ្ជាក់ទៀតថា លោកទុកពេលឲ្យមួយថ្ងៃទៀត បើមិនព្រមរុះរើនិងស្នើសុំគោលការពីព្រះរាជអាជ្ញាសាលាដំបូងខេត្ត ដើម្បីអនុវត្តតាមនិតិវិធី។ចំពោះ អាគាស្នាក់នៅរួម សាងសងបានជាច្រើនជាន់អត់ច្បាប់ តាមច្បាប់ត្រូវឲ្យម្ចាស់ស្នើសុំច្បាប់សាងសង់ ដោយឲ្យវិស្វករទទួលស្គាល់សំណង់ដែលបានសាងសង់ហើយ។
បច្ចុប្បន្ន អាគាស្នាក់នៅរួម ដែលកំពុងសាងសង់ខាងនេះ កម្លាំងជំនាញបានបញ្ជាបញ្ឈប់ការសាងសង់មួយរយៈ ហើយដោយមិនស្តាប់តាមការណែនាំ កម្លាំងបានដកហូតនូវសម្ភារៈសំណង់មួយរយៈដែររួមមាន ធុងលាយស៊ីម៉ង់ត៏ ប៉ែល ចប ធុងយួរ ស៊ីម៉ង់ត៏ យកទៅរក្សារទុកនៅប៉ុស្តិ៍រដ្ឋបាលសង្កាត់ប៉ោយប៉ែត ដើម្បីជាការព្រមាន៕
.jpg)