មេខ្យល់ម្នាក់ និងរថយន្ត២គ្រឿង ត្រូវកម្លាំងនគរបាលការពារព្រំដែនចាប់ឃាត់ខ្លួន ខណៈបម្រុងនាំពលករខ្មែរចំនួន១៤នាក់ឆ្លងដែនខុសច្បាប់ទៅប្រទេសថៃ
ខេត្តបន្ទាយមានជ័យ៖មេខ្យល់ម្នាក់ ត្រូវកម្លាំងនគរបាលការពារព្រំដែនចាប់ឃាត់ខ្លួន រីឯបក្ខពួកម្នាក់ទៀតរត់គេចខ្លួន ខណៈបើករថយន្តដឹកពលករខ្មែរចំនួន១៤នាក់ បម្រុងឆ្លងដែនទៅរកការងារធ្វើនៅប្រទេសថៃ ដោយខុសច្បាប់កាលពីវេលាម៉ោង១១យប់ ថ្ងៃទី១០ ខែវិច្ឆិកា ឆ្នាំ២០២១។
លោកឧត្តមសេនីយ៍ត្រី អ៊ុំ សុផល ស្នងការរង ទទួលផែនការងារព្រំដែន នៃស្នងការដ្ឋាននគរបាល ខេត្តបន្ទាយមានជ័យ បានឲ្យដឹងថា ដោយអនុវត្តតាមបទបញ្ជារបស់លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្ត ក្នុងការបង្ក្រាបនិងទប់ស្កាត់ការឆ្លងដែនខុសច្បាប់នោះ លោកក៏បានដឹកនាំកម្លាំងចុះស្រាវជ្រាវមានការសង្ស័យរហូតឈានដល់ឃាត់រថយន្តបាន២គ្រឿងម៉ាកសាំ យ៉ុង ពណ៌ស ផ្លាកលេខ 2V.2810 ភ្នំពេញ និងម៉ាក កាម៉ារី សេរី៩៥ ពណ៌ ស ផ្លាកលេខ 2A.2155 បាត់ដំបង នៅក្នុងរថយន្តទាំង២គ្រឿងនោះមានពលករចំនួន១៤នាក់ ដោយដឹកចេញពីភូមិគីឡូម៉ែត្រលេខ៤ សង្កាត់ផ្សារកណ្តាល ក្រុងប៉ោយប៉ែត ឆ្ពោះទៅកាន់ស្រុកម៉ាឡៃ លុះបើកមកដល់ចំណុច ផ្លូវកែងខ្លាងាប់ ស្រុកម៉ាឡៃ ដោយឃើញសមត្ថកិច្ចធ្វើការត្រួតពិនិត្យ អ្នកបើករថយន្តម៉ាកសាំ យ៉ុង ពណ៌ សចុះគេចខ្លួនបាត់ ក្នុងនោះសមត្ថកិច្ចបានឃាត់រថយន្តម៉ាក កាម៉ារី ១គ្រឿង និងអ្នកបើកឈ្មោះ ឈុំ សាផុន ភេទប្រុស អាយុ២៨ឆ្នាំ ដែលជាអ្នកនាំពលករទាំង១៤នាក់ ឆ្លងដែនខុសច្បាប់។ពលករទាំង១៤នាក់ ក្រោយពីឃាត់ខ្លួនបានបញ្ជូនទៅកាន់ប៉ុស្តិ៍រដ្ឋបាលឃុំទួលពង្រ ដើម្បីសាកសួរ។
នៅចំពោះមុខសមត្ថកិច្ចឈ្មោះ ឈុំ សាផុន ដែលជាមេខ្យល់បានប្រាប់សមត្ថកិច្ចថា ខ្លួនជា អ្នកដឹកមនុស្សពីស្រុកខ្មែរ ឆ្លងដែនយកទៅឲ្យមេខ្យល់នៅប្រទេសថៃ ក្នុង១នាក់យកចំនួន១.០០០បាត។
បច្ចុបន្នមេខ្យល់និងរថយន្តទាំង២គ្រឿង ព្រមទាំងពលករខ្មែរ ត្រូវបានបញ្ជូនទៅកាន់អធិការដ្ឋាននគរបាល ស្រុកម៉ាឡៃ ដើម្បីកសាងសុំណុំរឿងចាត់ការបន្តតាមនិតិវិធី។រីឯមេខ្យល់ម្នាក់ទៀតដែលកំពុងរត់គេចខ្លួន សមត្ថកិច្ចកំពុងធ្វើការស្រាវជ្រាវ៕