កិច្ចប្រជុំសាមញ្ញលើកទី២៩ អាណត្តិទី៣ របស់ក្រុមប្រឹក្សាខេត្តបន្ទាយមានជ័យ
ខេត្តបន្ទាយមានជ័យ៖នាព្រឹកថ្ងៃទី១១ ខែវិច្ឆិកា ឆ្នាំ២០២១ ឯកឧត្តម ខេង ស៊ុម ប្រធានក្រុមប្រឹក្សាខេត្តបន្ទាយមានជ័យ បានដឹកនាំកិច្ចប្រជុំសាមញ្ញលើកទី២៩ អាណត្តិទី៣ របស់ក្រុមប្រឹក្សាខេត្ត ដោយមានការអញ្ជើញចូលរួមពីឯកឧត្តម អ៊ុំ រាត្រី អភិបាល នៃគណៈអភិបាលខេត្ត លោក លោកស្រីសមាជិកក្រុមប្រឹក្សាខេត្ត អភិបាលរងខេត្ត នាយក នាយករងរដ្ឋបាលខេត្ត កងកម្លាំងប្រដាប់អាវុធទាំងបីប្រភេទ អភិបាល ស្រុក ក្រុង និងមន្ទីរជុំវិញខេត្តផងដែរ។
កិច្ចប្រជុំ នេះបានធ្វើការពិនិត្យ និងអនុម័តលើរបៀបវារៈសំខានៗរួមមាន៖
១-ពិនិត្យពិភាក្សា និងអនុម័ត សេចក្តីព្រាងរបៀបវារៈនៃកិច្ចប្រជុំសាមញ្ញលើកទី២៩ អាណត្តិទី៣ របស់ក្រុមប្រឹក្សាខេត្ត។
២-ពិនិត្យ ពិភាក្សា និងអនុម័ត សេចក្តីព្រាងកំណត់ហេតុ
៣-ពិនិត្យពិភាក្សា និងអនុម័តសេចក្តីព្រាងរបាយការណ៍ប្រចាំខែតុលា ឆ្នាំ២០២១ របស់រដ្ឋបាលខេត្ត និង៤-ផ្សេងៗ។
នាឱកាសនោះដែរឯកឧត្តមអភិបាលខេត្ត បានជម្រាបជូនដល់អង្គប្រជុំ អំពីស្ថានភាពពលករចំណាក់ស្រុក រហូតមកដល់ពេលនេះនៅតែបន្តលួចចេញ-ចូល តាមច្រករបៀងក្នុងមួយថ្ងៃៗរាប់រយនាក់ដដែល ដោយកម្លាំងចម្រុះទាំងខាងកម្ពុជានិងថៃ ឃាត់ខ្លួន បានជាបន្តបន្ទាប់ផងដែរ។ដោយឡែកចំពោះបញ្ហាជំងឺកូវីដ១៩ វិញ ដោយសារមានការណែនាំថ្មីពីសម្តេចតេជោ ប្រមុខរាជរដ្ឋាភិបាលកម្ពុជា មិនឲ្យមានការរុករកបន្ថែមអ្នកវិជ្ជមាន អញ្ជឹងពាក់ព័ន្ធកាយកសំណាក គឺអត់មានទៀតទេ ដោយក្នុងមួយក្រុង ស្រុក មានតែមួយកន្លែងតែប៉ុណ្ណោះ គឺនៅមន្ទីរពេទ្យ ហើយជាក់ស្តែងម៉ោងនេះមណ្ឌលព្យាបាលបានកាត់បន្ថយអស់ហើយ នៅសល់តែបីប៉ុណ្ណោះ សម្រាប់ព្យាបាលអ្នកជំងឺឈឺធ្ងន់ គឺនៅបន្ទីរពេទ្យបង្គលបុរី, មន្ទីរពេទ្យក្រុងប៉ោយប៉ែត និងមណ្ឌលខ្លាកូន។សម្រាប់ការព្យាបាលទាំងកម្រិតស្រាលនិងធ្ងន់ បើប្រៀបធៀបកាលពីមុនមានការថយចុះច្រើន។ដោយឡែកការចាក់វ៉ាក់សាំងសម្រាប់ខេត្តបន្ទាយមានជ័យ ទោះបីប្រកាសបិទក្តី ក៏នៅតែបន្តចាក់ជូនពួកគាត់នៅតាមផ្ទះឲ្យបានគ្រប់គ្នាផងដែរ។
ជាមួយគ្នានោះដែរឯក ឧត្តម ខេង ស៊ុម ប្រធានក្រុមប្រឹក្សាខេត្ត បានសម្ដែងការកោតសរសើរនូវការខិតខំប្រឹងប្រែងបំពេញភារកិច្ច របស់រដ្ឋបាលខេត្ត កងកម្លាំងប្រដាប់អាវុធ និងមន្ទីរពាក់ព័ន្ធទាំងអស់ ក្នុងការទប់ស្កាត់ការឆ្លងដែនខុសច្បាប់ ជួយសង្គ្រោះប្រជាពលរដ្ឋដែលរងគ្រោះដោយសារទឹកជំនន់ និងការយកសំណាកនិងព្យាបាលអ្នកជំងឺកូវីដ១៩។ក្នុងនោះឯកឧត្តមបានជំរុញឲ្យអាជ្ញាធរខេត្ត ក្រុង ស្រុកនិងមន្ទីរពាក់ព័ន្ធ កងកម្លាំងប្រដាប់អាវុធទាំងអស់ បន្តខិតខំប្រឹងប្រែងបន្ថែមទៀត ដើម្បីជួយសង្គ្រោះប្រជាពលរដ្ឋឲ្យរួចផុតពីជំងឺកូវីដ១៩ដ៏កាចសាហាវនេះ៕
.jpg)
.jpg)
.jpg)