កម្មករសំណង់ម្នាក់ ដាច់ខ្យល់ស្លាប់លើម៉ូតូឌុប បន្សល់កូនតូច២នាក់
ខេត្តបន្ទាយមានជ័យ៖កម្មករសំណង់ម្នាក់ ដាច់ខ្យល់ស្លាប់លើម៉ូតូឌុប បន្សល់កូនតូចប្រុសស្រី០២នាក់ នៅកណ្ដោចកណ្ដែង សមត្ថកិច្ចកំពុងប្រកាសរកសាច់ញាតិ។
ហេតុការណ៍នេះបានកើតឡើងនៅវេលាម៉ោ២១និង៣០នាទីយប់ ថ្ងៃទី០៩ ខែវិច្ឆិកា ឆ្នាំ២០២១ នៅលើផ្លូវជាតិលេខ៥ មុខការ៉ាស់សាំងPTT ក្បែរផ្លូវចូលបេនឡានក្រុង ស្ថិតនៅក្នុងភូមិបាលិលេយ្យ សង្កាត់/ក្រុងប៉ោយប៉ែត ខេត្តបន្ទាយមានជ័យ។
អាជ្ញាធរមូលដ្ឋានបានឲ្យដឹងថា ជនរងគ្រោះមានឈ្មោះ សិង្គ ភ័ណ្ណារ៉ា ភេទប្រុស អាយុ៥៣ឆ្នាំ ជាកម្មករសំណង់ ដែលបន្សល់កូនចំនួន២នាក់ ដោយកូនប្រុសបង ឈ្មោះ សិង្គ ផាណាត់ អាយុ១២ឆ្នាំ និងកូនស្រីឈ្មោះ សិង្គ ធារី អាយុ០៩ឆ្នាំ ទាំង០៣នាក់ឳពុកកូន ស្នាក់នៅបន្ទប់ជួលខាងត្បូងវត្តថ្មី ស្ថិតនៅភូមិបាលិលេយ្យ១ សង្កាត់/ក្រុងប៉ោយប៉ែត។
ប្រភពព័ត៌មានបានឲ្យដឹងថា មុនពេលកើតហេតុជនរងគ្រោះបានទល់លាមក២ថ្ងៃមកហើយ ទើបមិនស្រួលខ្លួន បានសម្រេចហៅម៉ូតូឌុប ឲ្យដឹកខ្លួនទៅពេទ្យ តែមិនទាន់ដល់ពេទ្យផង ក៏ដាច់ខ្យល់ស្លាប់តែម្តង។
ប្រភពពីរអ្នកស្គាល់ជនរងគ្រោះបានឱ្យដឹងថា ប្រពន្ធជនរងគ្រោះបានចែកផ្លូវគ្នាទៅរស់នៅឯក្រុងភ្នំពេញ ដោយបន្សល់ទុកជនរងគ្រោះ និងកូនប្រុសស្រីពីរនាក់នៅក្នុងបន្ទុក។
ក្រោយពេលកើតហេតុ សពត្រូវអាជ្ញាធរ និងសមត្ថកិច្ចនគរបាល សម្រេចយកទៅរក្សាទុកនៅវត្តបាលិលេយ្យ រងចាំសាច់ញាតិយកទៅធ្វើបុណ្យតាមប្រពៃណី។ចំណែកកូនប្រុស ស្រីទាំង២នាក់ ត្រូវបានអាជ្ញាធរចាត់ចែងយកទៅសំរាកនៅបន្ទប់ជួល ដើម្បីរងចាំសាច់ញាតិមកទទួលផងដែរ៕