ស្នងការខេត្តបន្ទាយមានជ័យ បើកកិច្ចប្រជុំ ត្រួតពិនិត្យវត្តមានកម្លាំងនគរបាល និងលុបបំបាត់ភាពអសកម្មរបស់នគរបាលខិលខូច
ខេត្តបន្ទាយមានជ័យ៖ក្នុងកិច្ចប្រជុំនៅស្នងការដ្ឋាននគរបាលខេត្តបន្ទាយមានជ័យ នាព្រឹកថ្ងៃទី១០ ខែ វិច្ឆិកា ឆ្នាំ២០២១ ក្រោមអធិបតីភាពលោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ ដោយមានការអញ្ជើញចូលរួមពីស្នងការរង ផែនការងារធនធានមនុស្ស ,ស្នងការរង ផែនការងារសេនាធិការ ,នាយរងការិយាល័យ, នាយរង ផ្នែក និងមន្រ្តី ចំណុះផែន ធនធានមនុស្ស ជាច្រើនរូបផងដែរនោះ លោកឧត្តមសេនីយ៍ត្រី វង្ស វិត ស្នងការរងផែនការងារធនធានមនុស្ស បានថ្លែងថា កិច្ចប្រជុំនេះធ្វើឡើងដើម្បី ពិនិត្យកម្លាំង ក្នុងផែនការងារធនធានមនុស្ស អំពីកម្លាំងវត្តមាន និងកម្លាំងអវត្តមាន ដើម្បីលុបបំបាត់ភាពអសកម្មរបស់មន្ត្រីនគរបាលខិលខូច ដែលមិនបំពេញ តួនាទី ភារកិច្ច ការមិនគោរពវិន័យ ប្រព្រឹត្តរឿងមិនល្អនាំឲ្យប៉ះពាល់ដល់កេរ្តិ៍ឈ្មោះអង្គភាពនគរបាលជាតិ និង ប៉ះពាល់ដល់សេចក្តីថ្លៃថ្នូររបស់មន្ត្រីដទៃទៀតដែលគេគោរពវិន័យបានល្អ។
ជាមួយគ្នានោះដែរលោកឧត្តមសេនីយ៍ទោ ស្នងការនគរបាលខេត្តបានមានប្រសាសន៍ថា កងកម្លាំងទាំងអស់ត្រូវយកចិត្តទុកដាក់ខិតខំប្រឹងប្រែងបំពេញការងារប្រចាំថ្ងៃឲ្យបានល្អ ត្រូវគោរពវិន័យ០០៦ និងត្រូវមានសាមគ្គីភាពផ្ទៃក្នុង។ក្នុងនោះលោកក៏បានវាយតម្លៃខ្ពស់ចំពោះផែនការងារធនធានមនុស្សដែលគ្រប់គ្រងកម្លាំងបានល្អ គ្មានបាត់មុខ និងកម្លាំងអសកម្ម។
ទន្ទឹមនោះដែរលោកក៏បានស្នើឲ្យប្រធានការិយាល័យបណ្តុះបណ្តាល ចាត់បញ្ជូនកម្លាំងទៅរៀនជំនាញថ្មីៗ និងត្រូវបង្កើតវគ្គបណ្តុះបណ្តាលនៅកន្លែងដល់កងកម្លាំងអំពីមេរៀនលំហាត់របៀប ដើម្បីពង្រឹងសមត្ថភាព ក្រមសីលធម៌ និងសេចក្តីថ្លៃថ្នូររបស់កងកម្លាំងនគរបាលជាតិផងដែរ៕