អភិបាលខេត្តស្ទឹងត្រែង ដាក់ចេញផែនការឆ្លើយតប អន្តរាគមន៍ និងដោះផលប៉ះពាល់គ្រោះទឹកជំនន់ ក្នុងស្រុកសេសាន និងការត្រៀមកម្លាំងអន្តរាគមន៍ បង្ការ ជួយសង្រ្គោះ នៅពេលគ្រោះមហន្តរាយកើតឡើង
ខេត្តស្ទឹងត្រែង៖ក្នុងកិច្ចប្រជុំស្តីពីការដាក់ចេញផែនការឆ្លើយតប អន្តរាគមន៍ និងដោះផលប៉ះពាល់គ្រោះទឹកជំនន់ ក្នុងស្រុកសេសាន និងការត្រៀមកម្លាំងអន្តរាគមន៍ បង្ការ ជួយសង្រ្គោះ មុនពេល កំឡុងពេល និងក្រោយពេលគ្រោះមហន្តរាយកើតឡើង ព្រមទាំងត្រៀមនូវសម្ភារ និងស្បៀងសម្រាប់ធ្វើការឆ្លើយតបបានទាន់ពេលវេលា នៅព្រឹកថ្ងៃទី២៧ ខែតុលា ឆ្នាំ២០២១ នៅសាលប្រជុំសាលាខេត្ត ឯកឧត្តម ស្វាយ សំអ៊ាង អភិបាលនៃគណៈអភិបាលខេត្ត និងជាប្រធានគណៈកម្មាធិការគ្រប់គ្រងគ្រោះមហត្តរាយខេត្ត បានណែនាំមន្ទីរអង្គភាពជំនាញ និងអាជ្ញាធរមូលដ្ឋានគ្រប់លំដាប់ថ្នាក់ ត្រូវត្រៀមលក្ខណៈគ្រប់បែបយ៉ាង ទៅតាមជំនាញនីមួយៗ ក្នុងការប្រើប្រាស់កម្លាំង មធ្យោបាយសម្រាប់ដឹកជញ្ជូនប្រជាពលរដ្ឋ ក្នុងករណីត្រូវជម្លៀសទៅទីទួលមានសុវត្ថិភាព។
បន្តកិច្ចសហការជាមួយដៃគូរអភិវឌ្ឍ សប្បុរសជននានាក្នុងការត្រៀមលក្ខណៈក្នុងការបង្ការ ឆ្លើយតបទៅនឹងគ្រោះមហន្តរាយនានា ដែលអាចនឹងកើតមានឡើងជាយថាហេតុ ក្នុងភូមិសាស្រ្តខេត្តស្ទឹងត្រែងទាំងមូល។
ក្នុងនោះដែរឯកឧត្តម អភិបាលខេត្ត ក៏បានធ្វើការក្រើនរំលឹកផងដែរ ដល់អាជ្ញាធរខេត្ត ក្រុង ស្រុក មន្ទីរអង្គភាពពាក់ព័ន្ធ ព្រមទាំងកងកម្លាំងផងដែរ ក្នុងកិច្ចរួមសហការគ្នា លើការស្តារឡើងវិញ ក្នុងវិស័យកសិកម្ម និងធនធានទឹក ព្រមទាំងហេដ្ឋារចនាសម្ព័ន្ធរូបវន្ត កត្តាសំខាន់គឺការស្តារឡើងវិញនូវប្រព័ន្ធធារាសាស្ត្រ ដែលមានស្រាប់ ដើមី្បឲ្យប្រែក្លាយជាសរសៃឈាមក្នុងការស្រោចស្រព ផលដំណាំរបស់ប្រជាកសិករ ក្នុងការលើកកម្ពស់សេដ្ឋកិច្ចជាតិផងដែរ៕