ប្រជាពលរដ្ឋ ដែលស្នាក់នៅទីទួលសុវត្ថិភាព ក្នុងបុរីខេអិន ត្រូវបានអាជ្ញាធរក្រុងប៉ោយប៉ែត រៀបចំមធ្យោបាយដឹកជញ្ជូនទៅលំនៅដ្ឋានវិញ ក្រោយពីទឹកបានស្រកអស់
ខេត្តបន្ទាយមានជ័យ៖ក្រោយពីទឹកបានស្រក អាជ្ញាធរក្រុងប៉ោយប៉ែត មានមន្ត្រីសាលាក្រុង កងកម្លាំងប្រដាប់អាវុធ សង្កាត់ ភូមិ ប្រជាការពាភូមិ និងក្រុមយុវជនស្រលាញ់សន្តិភាព ដឹកនាំដោយលោក គាត ហ៊ុល អភិបាល នៃគណៈអភិបាលក្រុងប៉ោយប៉ែត បាននាំយកមធ្យោបាយធ្វើការដឹកជញ្ជូនប្រជាពលរដ្ឋ ដែលកំពុងស្នាក់នៅទីទួលសុវត្ថិភាពនៅក្នុងបុរីខេអិន ស្ថិតនៅក្នុងភូមិគីឡូម៉ែត្រលេខ៤ សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ បញ្ជូនទៅលំនៅដ្ឋានរៀងៗខ្លួនវិញ នៅព្រឹកថ្ងៃទី២៦ ខែតុលា ឆ្នាំ២០២១នេះ។
អាជ្ញាធរក្រុងបានឲ្យដឹងថា ប្រជាពលរដ្ឋរស់សង្កាត់ផ្សារកណ្តាល ក្រុងប៉ោយប៉ែត ដែលរងគ្រោះដោយសារទឹកជំនន់ជន់លិចលំនៅដ្ឋានរបស់ពួកគាត់កាលពីកន្លងទៅ ដែលត្រូវបានអាជ្ញាធរជម្លៀងទៅរកទីទួលសុវត្ថិភាព ពេលនេះដឹកបញ្ជូនទៅលំនៅដ្ឋានវិញមានចំនួន១៩២គ្រួសារ មនុស្សរាយចំនួន៦៧០នាក់ ស្រី៣២១នាក់ កុមារ២០៥នាក់។
លោក គាត ហ៊ុល អភិបាលក្រុងបានឲ្យដឹងថា ខណៈដែលក្រុមការងារដឹកជញ្ជូនពួកគាត់វិលត្រលប់ទៅលំនៅដ្ឋានវិញនោះដែរ អាជ្ញាធរក្រុង បានជួយឧបត្ថម្ភអំណោយជាសាប៊ូទម្ងន់ ១គីឡូក្រាម ក្នុងមួយគ្រួសារ ដែលជាអំណោយរបស់ឯកឧត្តម នាយឧត្តមសេនីយ៍ កែ គឹមយ៉ាន ឧបនាយករដ្ឋមន្ត្រី ប្រធានអាជ្ញាធរជាតិ ប្រយុទ្ធប្រឆាំងគ្រឿងញៀន និងជាប្រធាន ក្រុមការងាររដ្ឋាភិបាលចុះជួយ មូលដ្ឋានខេត្តបន្ទាយមានជ័យ តាមរយះឯកឧត្តមអភិបាលខេត្តបន្ទាយមានជ័យផងដែរ។
ក្នុងនោះដែរលោក អភិបាលក្រុង បានមានប្រសាសន៍ផ្តាំផ្ញើដល់ប្រជាពលរដ្ឋ ដែលវិលត្រលប់ទៅលំនៅដ្ឋានវិញ ត្រូវធ្វើអានាម័យ សម្អាតបរិស្ថានទាំងក្នុងនិងក្រៅផ្ទះឲ្យបានស្អាត ពិសេសប្រយត្ន័នូវសត្វអសេរពឹសផ្សេងផងដែរ។ជាងនេះទៅទៀតលោក អភិបាលក្រុង ក៏បានធ្វើការណែនាំឲ្យពួគាត់ត្រូវអនុវត្តតាមការណែនាំរបស់ក្រសួងសុខាភិបាល ពិសេសវិធានការរបស់ប្រមុខរាជរដ្ឋាភិបាលកម្ពុជា«គឺ ៣កុំ និង ៣ការពារ»ឲ្យបានខ្ជាប់ខ្ជួន ដើម្បីបញ្ជៀសការឆ្លងជំងឺកូវីដ១៩៕
 copy.jpg)