ឯកឧត្តមអភិបាលខេត្តកំពង់ចាម ស្នើឱ្យដៃគូរអភិវឌ្ឍរមណីយដ្ឋាន "ទឹកឆា" កែលម្អតំបន់នេះ ឱ្យមានលក្ខណៈស្តង់ដារ
ខេត្តកំពង់ចាម៖ក្នុងកិច្ចប្រជុំត្រួតពិនិត្យការគ្រប់គ្រង និងវិនិយោគរមណីយដ្ឋានទេសចណ៍"ទឹកឆា" នៅថ្ងៃទី២៥ ខែតុលា ឆ្នាំ២០២១ ដោយមានការអញ្ជើញចូលរួមពី នាយករដ្ឋបាល អភិបាលស្រុកព្រៃឈរ ស្រុកចំការលើ ប្រធានមន្ទីរទេសចរណ៍ និងមន្ត្រីពាក់ព័ន្ធមួយចំនួនទៀតនោះ ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម បានស្នើឱ្យដៃគូរអភិវឌ្ឍរមណីយដ្ឋាន "ទឹកឆា" កែលម្អតំបន់នេះ ឱ្យមានលក្ខណៈស្តង់ដារ ដើម្បីទាក់ទាញភ្ញៀវទេសចរពីគ្រប់មជ្ឈដ្ឋាន។
បន្ទាប់ពីឯកឧត្តម អ៊ុន ចាន់ដា អភិបាលខេត្ត បានពិនិត្យផ្ទៀងផ្ទាត់ទៅតាមកិច្ចសន្យាដែលដៃគូអភិវឌ្ឍ ត្រូវទទួលអនុវត្តឱ្យស្របទៅតាមបទដ្ឋានច្បាប់ និងកិច្ចសន្យាដែលបានចុះកិច្ចព្រមព្រៀងរួចមក ក៏ដូចជាសំដៅធ្វើយ៉ាងណាឱ្យរមណីយដ្ឋានទេសចរណ៍ធម្មជាតិមួយនេះ កាន់តែមានសោភ័ណភាព និងផាសុខភាព គួរជាទីទាក់ទាញដល់ភ្ញៀវទេសចរជាតិ និងអន្តរជាតិចាប់អារម្មណ៍មកលេងកំសាន្ត។
ជាមួយគ្នានោះដែរឯកឧត្តមអភិបាលខេត្ត ក៏បានណែនាំដល់ដៃគូអភិវឌ្ឍ ឱ្យធ្វើការកែសម្រួលនូវសោភ័ណភាព បរិស្ថាន សួនច្បារ ការរៀបចំខ្ចុះ ការស្តារទំនប់ឡើងវិញ ការការពារតំបន់រមណីយដ្ឋាន ការរៀបចំបញ្ជោរ និងការកំណត់តម្លៃឱ្យបានជាក់លាក់ រួមនិងការរៀបចំចំណតរថយន្តឱ្យបានត្រឹមត្រូវជាដើម ។ល។
រដ្ឋបាលខេត្តបញ្ជាក់ថា រមណីយដ្ឋានទេសចណ៍ "ទឹកឆា" មានផ្ទៃក្រឡាប្រមាណជាង ៧១ ហិកតា ដែលមានទីតាំងស្ថិតនៅក្នុងឃុំក្រូច និងឃុំបឹងណាយ ស្រុកព្រៃឈរ ខេត្តកំពង់ចាម៕
