ការិយាល័យ បង្ការ-ពន្លត់អគ្គីភ័យខេត្តបន្ទាយមានជ័យ បើកវគ្គបណ្តុះបណ្តាលដល់គ្រូបង្គោលដែលជាមន្ត្រីនគរបាលទទួលការងារបង្ការ-ពន្លត់អគ្គីភ័យនិងសង្រ្គោះ មកពីតាមបណ្តាក្រុង-ស្រុកទាំង០៩
ខេត្តបន្ទាយមានជ័យ៖ដើម្បីលើកកម្ពស់ការបង្ការ និងការពន្លត់អគ្គីភ័យ សំដៅការពារអាយុជីវិត ទ្រព្យសម្បត្តិ បរិស្ថាន សណ្តាប់ធ្នាប់សាធារណៈ និងសុវត្ថិភាពសង្គម នៅថ្ងៃទី២៥ ខែតុលា ឆ្នាំ២០២១ ស្នងការដ្ឋាននគរបាលខេត្តបន្ទាយមានជ័យ បានបើកវគ្គបណ្តុះបណ្តាលរយៈពេលខ្លី ដល់គ្រូបង្គោលដែលជាមន្ត្រីនគរបាលទទួលការងារបង្ការ-ពន្លត់អគ្គីភ័យ និងសង្រ្គោះ មកពីតាមបណ្តាក្រុង-ស្រុកទាំង០៩ ដែលរៀបចំដោយការិយាល័យ បង្ការ-ពន្លត់អគ្គីភ័យ និងសង្រ្គោះ ក្រោមអធិបតីភាពលោកឧត្តមសេនីយ៍ត្រី ប៊ុន ផេង ស្នងការរង ទទួលផែនការងារ គ្រប់គ្រងអាវុធគ្រឿងផ្ទុះនិងអគ្គីភ័យ តំណាងលោកឧត្តមសេនីយ៍ទោ សិទ្ធិ ឡោះ ស្នងការ នៃស្នងការដ្ឋាននគរបាលខេត្តបន្ទាយមានជ័យ។
នាឱកាសនោះលោកឧត្តមសេនីយ៍ត្រី ប៊ុន ផេង បានមានប្រសាសន៍ថា៖ដោយមានការឯកភាពពីលោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្ត ដើម្បីជាការរំលឹកពីមេរៀនចាស់ ក៏ដូចជាការបំពេញបន្ថែមនូវមេរៀនថ្មីនោះ និងដើម្បីឲ្យមន្ត្រីនគរបាលបង្ការ-ពន្លត់អគ្គីភ័យនេះ មានជំនាញច្បាស់លាស់ក្នុងពេលប្រតិបត្តិការ ត្រូវបានស្មារតីរឹងប៉ឹង មិនតក់ស្លុតចំពោះព្រឹត្តការណ៍កើតឡើងនោះ ការិយាល័យ បង្ការ-ពន្លត់អគ្គីភ័យនិងសង្រ្គោះ បានរៀបចំវគ្គបណ្តុះបណ្តាលខ្លី ដើម្បីស្វែងយល់កាន់តែច្បាស់អំពីវត្ថុឬសារធាតុ ដែលងាយបង្កឲ្យទៅជាអគ្គីភ័យនេះ ងាយស្រួលក្នុងការគ្រប់គ្រងនិងផ្សព្វផ្សាយដល់ម្ចាស់គ្រឹៈស្ថាន ស្ថានីយ៍ប្រេងឥន្ទនៈឬឧស្ម័ននានា ឬទីកន្លែងដែលមានផ្ទុកនូវ សារធាតុរាវ រឹង ឧស្ម័ន គីមី ទំនិញឬវត្ថុធាតុដើមដែលងាយឆេះឬងាយផ្ទុះឆេះ ឲ្យគាត់ចូលរួមសហការ ដើម្បីទប់ស្កាត់នូវគ្រោះមហន្តរាយដោយអគ្គីភ័យ ។
ជាមួយគ្នានោះ លោកឧត្តមសេនីយ៍ត្រី ស្នងការរង ក្នុងនាមជំនួសមុខឲ្យលោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្ត បានផ្តាំផ្ញើដល់គ្រូបង្គោលមកពីបណ្តាអធិការដ្ឋានគរបាល ក្រុង ស្រុក ទាំងអស់ ត្រូវខិតខំយកចិត្តទុកដាក់ ត្រងត្រាប់ស្តាប់បង្ហាត់បង្រៀនពីគ្រូបង្គោល ការិយាល័យជំនាញ ដើម្បីយកចំណេះដឹងទាំងនោះទៅអនុវត្ត និងផ្សព្វផ្សាយដល់នគរបាលក្នុងអង្គភាពបានយល់ដឹង ពិសេសផ្សព្វផ្សាយដល់ប្រជាពលរដ្ឋ នៅក្នុងមូលដ្ឋានបានយល់ជ្រាប ដើម្បីឲ្យមានការប្រុងប្រយ័ត្ន និងរួមគ្នាទប់ស្កាត់គ្រោះមហន្តរាយដោយសារអគ្គីភ័យនេះ៕