ឯកឧត្ដម ម៉ែន វិបុល ដឹកនាំកិច្ចប្រជុំបូកសរុបលទ្ធផលការងារប្រចាំខែតុលា និងលើកទិសដៅការងារខែវិច្ឆិកា ឆ្នាំ២០២១
ខេត្តស្វាយរៀង៖ក្នុងកិច្ចប្រជុំបូកសរុបលទ្ធផលការងារប្រចាំខែតុលា និងលើកទិសដៅការងារខែវិច្ឆិកា ឆ្នាំ២០២១តាមរយះប្រពន្ធវីដេអូ Zoom នាព្រឹកថ្ងៃទី២៥ ខែតុលា ឆ្នាំ២០២១ ឯកឧត្ដម ម៉ែន វិបុល អភិបាល នៃគណៈអភិបាលខេត្តស្វាយរៀង និងជាប្រធានគណៈបញ្ជាការឯកភាពរដ្ឋបាលខេត្ត បានដាក់ចេញនូវទិសដៅ និងចំណុចសំខាន់ៗមួយចំនួនរួមមាន៖
១.អាជ្ញាធរក្រុង ស្រុក ឃុំ សង្កាត់ ត្រូវផ្សព្វផ្សាយ និងជម្រុញឱ្យប្រជាពលរដ្ឋទៅទទួលការចាក់វ៉ាក់សាំងឱ្យបានគ្រប់ៗគ្នា និងគ្រប់ចំនួនដូស។
២. អាជ្ញាធរ ក្រុង ស្រុក សមត្ថកិច្ចពាក់ព័ន្ធ ត្រូវបន្តពង្រឹងបញ្ហាភូមិឃុំមានសុវត្ថិភាព ជាពិសេសទប់ស្កាត់ការជួញដួរ និងប្រើប្រាស់គ្រឿងញៀន។
៣.បន្តរឹតបន្តឹងការអនុវត្តច្បាប់ចរាចរណ៍ផ្លូវគោកបន្ថែមទៀត ដើម្បីកាត់បន្ថយការគ្រោះថ្នាក់នៅលើដងផ្លូវ។
៤.អាជ្ញាធរ ក្រុង ស្រុក រហូតដល់មូលដ្ឋាន ត្រូវណែនាំដល់ប្រជាពលរដ្ឋដែលគ្រប់អាយុបោះឆ្នោត ត្រូវទៅចុះឈ្មោះបោះឆ្នោតឱ្យបានគ្រប់ៗគ្នា។
៥.អាជ្ញាធរក្រុង ស្រុក ត្រូវខិតខំពិនិត្យនិងការពារដីរបស់រដ្ឋ ពិសេសខិតខំដោះស្រាយបញ្ហាផ្សេងៗ ជូនដល់ប្រជាពលរដ្ឋនៅក្នុងមូលដ្ឋានឱ្យអោយអស់លទ្ធភាព។
៦.មន្ទីរវប្បធម៌និងវិចិត្រសិល្បះខេត្ត ត្រូវសហការជាមួយអាជ្ញាធរដែនដីចុះពិនិត្យទីទួលបុរាណ នៅតាមក្រុងស្រុកដើម្បីចងក្រងទុកជាឯកសារ និងគ្រប់គ្រងជាទ្រព្យសម្បត្តិរបស់រដ្ឋ។
៧.អាជ្ញាធរក្រុង ស្រុក ត្រូវបន្តផ្សព្វផ្សាយនូវវិធានការរបស់ក្រសួងសុខាភិបាលទៅដល់ ប្រជាពលរដ្ឋ”៣កុំ ៣ការពារ’’ក្នុងការបង្ការទប់ស្កាត់ការឆ្លងរាលដាលនៃជំងឺកូវីដ១៩។
៨.រដ្ឋបាលក្រុង ស្រុក និងទីចាត់ការផែនការវិនិយោគសាលាខេត្ត ត្រូវពិនិត្យគម្រោងមូលនិធិក្រុងស្រុក ឃុំ សង្កាត់ ក្នុងការដេញថ្លៃអោយមានតម្លាភាព និងប្រសិទ្ធិភាព។
ជាមួយគ្នានោះដែរឯកឧត្ដមអភិបាលខេត្ត ក៏បានថ្លែងនូវការកោតសរសើរ និងអរគុណចំពោះកងកម្លាំងមានសមត្ថកិច្ច ប្រធានគណៈបញ្ជាការឯកភាពរដ្ឋបាលក្រុង ស្រុក និងអាជ្ញាធរពាក់ព័ន្ធទាំងអស់ ដែលបានយកចិត្តទុកដាក់លើការងារពង្រឹងសន្តិសុខសុវត្ថិភាពជូនដល់ប្រជាពលរដ្ឋបានល្អប្រសើរ ជាពិសេសក្នុងកំឡុងនៃពិធីកាន់បិណ្ឌ និងភ្ជុំបិណ្ឌដែលបានបញ្ចប់ទៅដោយរលូន ការធានាបាននូវសុវត្ថិភាពក្នុងការបង្ការទប់ស្កាត់ការឆ្លងរាលដាលនៃជំងឺកូវីដ១៩ ស្រមតាមសារាចរណ៍ណែនាំដ៏ខ្ពង់ខ្ពស់របស់សម្តេចតេជោ ប្រមុខរាជរដ្ឋាភិបាលកម្ពុជា៕
