លោក ឡុង ឌីម៉ង់ ត្រូវបានតែងតាំងជាអភិបាលរងខេត្តថ្មី ជំនួសលោក ឈិន សេងងួន ដែលត្រូវផ្ទេរទៅកាន់មុខតំណែងជាអភិបាលរងខេត្តកំពង់ឆ្នាំង
ខេត្តព្រះសីហនុ:ឯកឧត្តម គួច ចំរើន អភិបាល នៃគណៈអភិបាលខេត្តព្រះសីហនុ ឯកឧត្តម សូ ជុងហួរ ប្រធានស្តីទីក្រុមប្រឹក្សាខេត្តព្រះសីហនុ នៅរសៀលថ្ងៃទី២២ ខែតុលា ឆ្នាំ២០២១ អញ្ជើញជាអធិបតីពិធីប្រកាសចូលកាន់មុខតំណែងអភិបាលរងខេត្តព្រះសីហនុ ដោយលោក ឡុង ឌីម៉ង់ ត្រូវបានតែងតាំងជាអភិបាលរងខេត្តថ្មី ជំនួសលោក ឈិន សេងងួន ដែលត្រូវផ្ទេរទៅកាន់មុខតំណែងជាអភិបាលរងខេត្តកំពង់ឆ្នាំង។
នាឱកាសនោះលោក ឡុង ឌីម៉ង់ បានធ្វើការប្តេជ្ញាចិត្តក្នុងការបំពេញតួនាទីដូចខាងក្រោម៖
១. ប្តេជ្ញាចិត្តបន្តគោរពរដ្ឋធម្មនុញ្ញ និងរាជរដ្ឋាភិបាលចូលរួមអនុវត្តនូវគោលនយោបាយចតុកោណដំណាក់កាលទី៤ នីតិកាលទី៦ ដើម្បីកំណើនការងារ សមធម៌ ខិតខំបំពេញភារកិច្ចបម្រើសេវាសាធារណៈជូនប្រជាពលរដ្ឋប្រកបដោយគុណភាព តម្លាភាព និងប្រសិទ្ធភាព។
២. ប្ដេជ្ញាធ្វើជាសេនាធិការបម្រើជូនរដ្ឋបាលខេត្ត និងប្រជាជន រក្សាសាមគ្គីភាព ឯកភាពផ្ទៃក្នុងប្រកបដោយឆន្ទៈតែមួយក្នុងស្មារតីទទួលខុសត្រូវ និងយកចិត្តទុកដាក់ការងារយ៉ាងហ្មត់ចត់ជាទីបំផុត។
៣. ប្តេជ្ញាពង្រឹង និងពង្រីកកិច្ចសហការស្អិតរមួតជាមួយកងកម្លាំងប្រដាប់អាវុធ បណ្តាមន្ទីរ អង្គភាពជំនាញពាក់ព័ន្ធនានាក្នុងខេត្ត ដើម្បីបម្រើប្រជាពលរដ្ឋ សំដៅកែប្រែ និងលើកស្ទួយជីវភាពរស់នៅសុខុមាលភាព សន្តិសុខ និងសុវត្ថិភាពជូនប្រជាពលរដ្ឋស្របតាមគោលនយោបាយភូមិឃុំមានសុវត្ថិភាព ព្រមទាំងបង្កលក្ខណៈសម្បត្តិងាយស្រួលដល់ការប្រកបអាជីវកម្មនានា។
៤. ប្តេជ្ញាផ្សព្វផ្សាយ និងការពារសមិទ្ធិផលរបស់រដ្ឋបាលខេត្ត ដល់ប្រជាពលរដ្ឋគ្រប់លំដាប់ថ្នាក់ឱ្យបានទូលំទូលាយ។
ក្នុងនោះឯកឧត្តម គួច ចំរើន អភិបាលខេត្តព្រះសីហនុ បានសម្ដែងនូវការកោតសរសើរ និងវាយតម្លៃចំពោះលោក ឈិន សេងងួន ដែលត្រូវផ្ទេរទៅកាន់មុខតំណែងជាអភិបាលរងខេត្តកំពង់ឆ្នាំង។ដែលកន្លងមកលោកបានចូលរួមយ៉ាងសកម្មក្នុងការអនុវត្តតួនាទីភារកិច្ចបានយ៉ាងត្រឹមត្រូវ ស្របតាមគោលការណ៍ច្បាប់ ព្រះរាជក្រឹត្យ អនុក្រឹត្យ និងលិខិតបទដ្ឋានគតិយុត្តជាធរមាន សម្រេចបានលទ្ធផលជាបន្តបន្ទាប់ ដោយមានការគោរពស្រឡាញ់ពីថ្នាក់ដឹកនាំមន្ត្រីរាជការក្រោមឱវាទ។
ទន្ទឹមនោះឯកឧត្តមមានជំនឿជឿជាក់ថាលោក ឡុង ឌីម៉ង់ នឹងបន្តខិតខំអនុវត្តតាមតួនាទីភារកិច្ច និងយកបទពិសោធន៍ដ៏ល្អ ជាពិសេសទំនាក់ទំនងកិច្ចការបរទេស ការទូត និងកិច្ចសហប្រតិបត្តិការអន្តរជាតិរបស់ខ្លួន ស្របតាមរដ្ឋធម្មនុញ្ញ ច្បាប់ និងលិខិតបទដ្ឋានគតិយុត្តប្រកបដោយមនសិការវិជ្ជាជីវៈ ការទទួលខុសត្រូវខ្ពស់មានតម្លាភាព គណនេយ្យភាព រួមសាមគ្គីគ្នាជាធ្លុងមួយ ដើម្បីសម្រេចបាននូវស្នាដៃធំៗបន្តទៀត ជាពិសេសត្រូវប្រកាន់ភ្ជាប់នូវអភិក្រមរបស់សម្ដេចតេជោ នាយករដ្ឋមន្ត្រី នៃកម្ពុជា គឺ "ឆ្លុះកញ្ចក់ ងូតទឹក ដុះក្អែល ព្យាបាល និងវះកាត់" និងបាវចនាពីរគឺ "កែទម្រង់ខាងក្នុង និងបង្កើនមិត្តខាងក្រៅ" ផងដែរ៕
