មន្រ្តីសាខា ក.ប.ប. ខេត្តបន្ទាយមានជ័យ ចុះដកហូតទំនិញខូចគុណភាព និងហួសកាលបរិច្ឆេទប្រើប្រាស់ សរុបជាង២៤គីឡូក្រាម ពីអាជីវករ ដែលដាក់លក់នៅតាមផ្ទះ និងតូបក្នុងផ្សារ នៅភូមិសាស្ត្រសង្កាត់ប៉ោយប៉ែត
ខេត្តបន្ទាយមានជ័យ៖នាព្រឹកថ្ងៃទី២២ ខែតុលា ឆ្នាំ២០២១ មន្រ្តីសាខា ក.ប.ប.ខេត្តបន្ទាយមានជ័យ ដឹកនាំដោយលោក សាន វិជ្ជាសារ៉ាវុធ ប្រធាន សាខាការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ(ក.ប.ប)ខេត្តបន្ទាយមានជ័យ បានចុះត្រួតពិនិត្យ និងដកហូតបានផលិតផលខូចគុណភាព និងហួសកាលបរិច្ឆេទប្រើប្រាស់ពីក្រុមអាជីវករ ដែលដាក់លក់ដូរនៅតាមផ្ទះ និងតូបក្នុងផ្សារ ស្ថិតនៅភូមិក្បាលស្ពាន ១ សង្កាត់/ក្រុងប៉ោយប៉ែត ជាលទ្ធផលមន្ត្រីជំនាញដកហូតបានផលិតផលខូចគុណភាព និងហួសកាលបរិច្ឆេទប្រើប្រាស់ មានដូចជា
- មី កំប៉ុង Pop Mie ចំនួន ៧២កំប៉ុង ស្មើ៥.៤គីឡូក្រាម
- មីកូរ៉េ ចំនួន ២០កំប៉ុង ស្មើ ១.៤គីឡូក្រាម
- នំសូកូឡា Ellse ចំនួន ១កញ្ចប់ ស្មើ ០.៣៦គីឡូ ក្រាម
- ទឹកក្រូច ឆ្មា ចំនួន ៦ដប ស្មើ ៣លីត្រ
- ទឹក ប្រហុក ថៃ ចំនួន ៧ដប ស្មើ ៣.៥លីត្រ
- ដំណាប់ អំពិល ចំនួន ៤កញ្ចប់ ស្មើ ០.២៨គីឡូក្រាម
- មី កញ្ចប់ Hot Pepper ចំនួន ៦កញ្ចប់ ស្មើ ៨.១៨គីឡូក្រាម
- នំ មឹក កញ្ចប់ ចំនួន ៥កញ្ចប់ ស្មើ ០.២៧៥គីឡូក្រាម
- ដំណាប់ Pine Apple ចំនួន ៤កញ្ចប់ ស្មើ ០.៨៤គីឡូក្រាម
- នំ កញ្ចប់ Banh Pia ចំនួន ២កញ្ចប់ ស្មើ ១.២គីឡូក្រាម សរុប ចំនួន ២៤.១៥៥គីឡូក្រាម។
លោក សាន វិជ្ជាសារ៉ាវុធ បានឲ្យដឹងថា ក្នុងសកម្មភាពនេះដែរមន្ត្រីបានចុះពន្យល់ណែនាំដល់អាជីវករឱ្យមានការប្រុងប្រយ័ត្នខ្ពស់ក្នុងការលក់ទំនិញខូចគុណភាព និងហួសកាលបរិច្ឆេទ ទៅដល់ ដៃអ្នកប្រើប្រាស់ ជៀសវាងប្រឈមមុខច្បាប់។ក្នុងនោះមន្ត្រីជំនាញ ក៏បានតម្រូវឱ្យម្ចាស់ទំនិញ ល្មើសបីទីតាំងបង់ប្រាក់ពិន័យអន្តរការណ៍ ដោយសរសេរប័ណ្ណបង់ប្រាក់ផាកពិន័យចំនួនបីច្បាប់ផងដែរ។
លោក សាន វិជ្ជាសារ៉ាវុធ បញ្ជាក់ថា ក្នុងរយះកាល ៩ខែ ដើមឆ្នាំ២០២១ មន្រ្តីសាខា ក.ប.ប.ខេត្តបន្ទាយមានជ័យ ធ្វើការឃាត់ និងចាប់បានទំនិញខូចគុណភាព និងហួសកាលបរិច្ឆេទប្រើប្រាស់នៅតាមដងផ្លូវ ,លើទីផ្សារ ,តាមផ្ទះ ,តាមឃ្លាំងស្តុបទំនិញ និងធ្វើការកំទិចចោល សរុបចំនួន៥,៩៨៧គីឡូក្រាម ស្មើជិត ៦តោន ហើយការដុតកំទិចចោលនោះក៏មានការយល់ព្រមពីស្ថាប័នអយ្យការសាលាដំបូងខេត្តបន្ទាយមានជ័យផងដែរ៕
