នគរបាលប្រឆាំងគ្រឿងញៀន ខេត្តបន្ទាយមានជ័យ ឃាត់ខ្លួនអ្នកលក់ថ្នាំញៀន ទ្រង់ទ្រាយធំបានចំនួន៣នាក់ ក្នុងនោះមានស្រី១នាក់ បញ្ជូនទៅតុលាការ
ខេត្តបន្ទាយមានជ័យ៖ជនសង្ស័យជួញដូរគ្រឿងញៀនជាទ្រង់ទ្រាតធំ ប្រុស ស្រី ចំនួន៣នាក់ ត្រូវបាននគរបាលការិយាល័យ ប្រឆាំងគ្រឿងញៀន ឃាត់ខ្លួនបាននៅវេលាម៉ោង ៦និង៣០នាទីល្ងាច ថ្ងៃទី២១ ខែតុលា ឆ្នាំ២០២១។
លោកវរសេនីយ៍ឯក ធិន ស៊ិនដេត ស្នងការរង ទទួលផែនការងារប្រឆាំងគ្រឿងញៀន នៃស្នងការដ្ឋាននគរបាល ខេត្តបន្ទាយមានជ័យ បានឲ្យដឹងថា៖ ដើម្បីអនុវត្តនូវគោលនយោបាយ ឃុំ សង្កាត់ មាន សុវត្ថិភាព និងបទបញ្ជារបស់លោកឧត្តមសេនីយ៍ទោ សិទ្ធិ ឡោះ ស្នងការ នៃ ស្នងការដ្ឋាននគរបាលខេត្ត បន្ទាយមានជ័យ និងមានការសម្របសម្រួលពីឯកឧត្តម កើត សុណ្ណារ៉េត ព្រះរាជអាជ្ញាអមសាលាដំបូងខេត្តបន្ទាយមានជ័យ កម្លាំងនគរបាលការិយាល័យ ប្រឆាំងគ្រឿងញៀន បានឃាត់ខ្លួនជនសង្ស័យជួញដូរគ្រឿងញៀន បានជាបន្តបន្ទាប់ ចំនួន០៣នាក់ ស្រី០១នាក់ និងដកហូតវត្ថុតាងថ្នាំញៀនមួយចំនួនធំ។
លោកស្នងការរង បានបញ្ជាក់ថា៖នៅវេលាម៉ោង០៦និង៣០នាទីល្ងាច ថ្ងៃទី១៩ ខែតុលា ឆ្នាំ២០២១ កម្លាំងជំនាញ ទទួលបានព័ត៌មានពីប្រជាពលរដ្ឋថា មានករណីជួញ ដូរគ្រឿងញៀន នៅចំណុចរោងស្នាក់នៅប្រក់កៅស៊ូតង់ក្បែរបេនឡានថ្មី ស្ថិតក្នុងភូមិ៣ សង្កាត់ព្រះពន្លា ក្រុងសិរីសោភ័ណ ភ្លាមៗនោះលោកបានដឹកនាំកម្លាំងជំនាញបានចុះប្រតិបត្តិការទៅកន្លែងនោះ និងបានធ្វើការត្រួតពិនិត្យឆែកឆេររកឃើញវត្ថុតាងម្សៅក្រាមសថ្លា ចំនួ១២ថង់ និងឃាត់ខ្លួនជនសង្ស័យ០១នាក់ឈ្មោះ ចាន់ ស្រីរ័ត្ន ភេទស្រី អាយុ៣៥ឆ្នាំ យកមកសួរនាំនៅការិយាល័យ ជនសង្ស័យបានសារភាពថាថ្នាំញៀនទាំងនេះ បានទិញពីអ្នកលក់នៅក្រុងប៉ោយប៉ែតតម្លៃ៤៥០ដុល្លាអាមេរិក។
លោកវរសេនីយ៍ឯក ស៊ិន ធិនដេត បបញ្ជាក់ទៀតថា៖ដោយមានការសហការពីឈ្មោះចាន់ ស្រីរ័ត្ន បានព្យាយាមអូសទាញមុខសញ្ញាជួញដូរគ្រឿងញៀន០១នាក់ទៀត។នៅវេលាម៉ោង០៣ រសៀលថ្ងៃទី២០ខែតុលា ឆ្នាំ២០២១ កម្លាំងជំនាញចុះប្រតិបត្តិការឃាត់ខ្លួនជនសង្ស័យ ឈ្មោះ យ៉ុម ចាន់នី ភេទប្រុស អាយុ ២៩ឆ្នាំ ក្នុងបរិវេណកាស៊ីណូផ្កា៥ ស្ថិតក្នុងភូមិក្បាល១ សង្កាត់/ប៉ោយប៉ែត រួចបន្តទៅឆែកឆេររកឃើញវត្ថុតាងថ្នាំញៀនចំនួន០៧ថង់ លាក់ទុកក្នុងកេសដែក ក្នុងបន្ទប់ជួលស្នាក់នៅ ស្ថិតក្នុងភូមិក្បាលស្ពាន១ សង្កាត់ប៉ោយប៉ែត និងឃាត់ខ្លួនឈ្មោះ យី ផល្លី ហៅម៉ៅ ភេទប្រុស អាយុ ៥១ឆ្នាំ ជាម្ចាស់បន្ទប់ជួល ជាអ្នកដឹកជញ្ជូន និងប្រើប្រាស់គ្រឿងញៀន។នៅចំពោះមុខសមត្ថកិច្ចជនសង្ស័យឈ្មោះ ស្រីរ័ត្ន បានសារភាពថា ខ្លួនធ្លាប់ជួញដូរគ្រឿងញៀននេះជាច្រើនលើកមកហើយ ចំណែកឈ្មោះ យ៉ុម ចាន់នី សារ ភាពថា ខ្លួនគេជួញដូរថ្នាំញៀននេះរយៈពេល០២ឆ្នាំមកហើយដែរ និងឈ្មោះ យី ផល្លី ក៏បានសារភាពថា ធ្លាប់ដឹកជញ្ជូនថ្នាំញៀនឲ្យអ្នកដែលបានកំហ្មង់ទិញពីឈ្មោះចាន់នី។បច្ចុប្បន្នជនសង្ស័យជួញដូរគ្រឿងញៀន ប្រុស ស្រីចំនួន០៣នាក់ នគគរបាលការិយាល័យ ប្រឆាំងគ្រឿងញៀន កសាងសំណុំរឿង បញ្ជូនខ្លួនទៅសាលាដំបូងខេត្តបន្ទាយមានជ័យ នៅថ្ងៃទី២២ ខែតុលា ឆ្នាំ២០២១ ដើម្បីចាត់វិធានការតាមនិតិវិធី៕
.jpg)
.jpg)