លោក ណុប តារ៉ា អភិបាលរងខេត្តកណ្ដាល ណែនាំដល់ម្ចាស់អាជីវកម្មរកស៊ី ដឹកជញ្ជូនខ្សាច់ គ្រួស និងថ្ម ដែលមិនគោរពតាមកិច្ចសន្យា និងច្បាប់ពាក់ព័ន្ធនានា អាចប្រឈមនិងការបិទអាជីវកម្ម
ខេត្តកណ្តាល៖ក្នុងកិច្ចប្រជុំជាមួយអាជីវកម្មទាំង២២ដេប៉ូ ដែលដឹកជញ្ជូនខ្សាច់ គ្រួស ថ្ម នៅក្នុងក្រុងតាខ្មៅ នៅរសៀលថ្ងៃទី២១ ខែតុលា ឆ្នាំ២០២១ លោក ណុប តារ៉ា អភិបាលរងខេត្តកណ្ដាល បានធ្វើការណែនាំដល់ម្ចាស់អាជីវកម្មរកស៊ី ដឹកជញ្ជូន ខ្សាច់ គ្រួស និងថ្ម ដែល មិនគោរពតាមកិច្ចសន្យា និងច្បាប់ពាក់ព័ន្ធនានា ជាពិសេស ម្ចាស់អាជីវកម្មដែលកំពុងធ្វើអាជីវកម្មដោយគ្មានអាជ្ញាប័ណ្ណត្រឹមត្រូវអាចប្រឈមនិងការបិទអាជីវកម្មតែម្តង។
ជាមួយគ្នានោះដែរលោកអភិបាលរងខេត្តបានមានប្រសាសន៍ថា កិច្ចប្រជុំនេះគឺមានគោលបំណងឱ្យម្ចាស់យានយន្ត ម្ចាស់អាជីវកម្មដឹកថ្ម ខ្សាច់ និងគ្រួសនៅទូទាំងក្រុងតាខ្មៅ ត្រូវចូលរួមគោរពតាមបទដ្ឋានបច្ចកទេស ស្ដីពីការដឹកជញ្ជូន ដើម្បីបញ្ចៀសឲ្យបាននូវការដឹកលើសទម្ងន់ដែលនាំឲ្យផ្លូវថ្នល់ឆាប់ខូច និងកាត់បន្ថយគ្រោះថ្នាក់ចរាចរណ៍ និងចៀសវាងបង្កបញ្ហាផ្សេងៗ ដែលជាកង្វល់ដល់សាធារណជន ប៉ះពាល់បរិស្ថាន ដែលបណ្តាលមកពីការកកស្ទះ និងខូចខាតផ្លូវដោយសាររថយន្តដឹកខ្សាច់ ដឹកថ្ម គ្រួសទាំងនោះ។ក្នុងនោះក៏បានណែនាំដល់ម្ចាស់អាជីវកម្មដឹកថ្ម ដឹកខ្សាច់ទាំងអស់ ត្រូវត្រួតពិនិត្យលើការដឹកជញ្ជូន ត្រូវធ្វើយ៉ាងណាឱ្យស្របច្បាប់គោរពឱ្យបានតាមកិច្ចសន្យាម្ចាស់អាជីវកម្ម ត្រូវមានអាជ្ញាប័ណ្ណត្រឹមត្រូវ គោរពតាមច្បាប់ និងកិច្ចសន្យាស្តាប់ការណែនាំរបស់អជ្ញាធរ។រាល់ការដឹកជញ្ជូន ត្រូវណែនាំដល់អ្នកដឹកត្រូវលាងសម្អាតកង់ឡានឱ្យបានស្អាតពេលចេញពីដេប៉ូ ត្រូវគ្របឱ្យបានជិតល្អ កុំដឹកលើសទម្ងន់បើកបរដោយក្រមសីលធម៌
ត្រូវលាងសម្អាតផ្លូវដែលប្រឡាក់ឱ្យបានងស្អាត៕