ស្នងការនគរបាលខេត្តបន្ទាយមានជ័យព្រមានចាត់វិធានការតាមច្បាប់ ចំពោះមន្ត្រីនគរបាលណា ដែលពាក់ពន្ធ័បទល្មើសនាំមនុស្សឆ្លងដែនខុសច្បាប់ និងបទល្មើសជួញដូរថ្នាំញៀន
ខេត្តបន្ទាយមានជ័យ:ក្នុងឱកាសអញ្ជើញចុះត្រួតពិនិត្យស្ថានភាពតាមបន្ទាត់ព្រំដែនកម្ពុជា-ថៃ និងបើកកិច្ចប្រជុំពង្រឹងប្រសិទ្ធភាពការងារប្រចាំថ្ងៃ របស់នគរបាលការពារព្រំដែន នៅទីបញ្ជាការវរនគរបាលការពារព្រំដែនគោក៨០៧ ច្រកបឹងត្រកួន ស្រុកថ្មពួក ខេត្តបន្ទាយមានជ័យ នៅព្រឹកថ្ងៃទី២១ ខែតុលា ឆ្នាំ២០២១នេះ លោកឧត្តមសេនីយ៍ទោ សិទ្ធិ ឡោះ ស្នងការនៃស្នងការដ្ឋាននគរបាលខេត្តបន្ទាយមានជ័យ បានថ្លែងព្រមានចំពោះមន្ត្រីនគរបាលដែលឈរជើងតាមបន្ទាត់ព្រំដែលកម្ពុជា-ថៃ ថា ក្នុងនាមជានគរបាលជាតិដាច់ខាតមិនត្រូវ ពាក់ពន្ធ័ជាមួយឈ្មួញ ឬបទល្មើសជួញដូរថ្នាំញៀន និងមេខ្យល់នាំមនុស្សឆ្លងដែនខុសច្បាប់ឡើយ បើរកឃើញបទល្មើសនៅគោលដៅណា លោកនឹងមានវិធានការតាមច្បាប់និងបញ្ជូនទៅតុលាការតែប៉ុណ្ណោះ។
ជាមួយគ្នានោះដែរ លោកឧត្តមសេនីយ៍ទោ សិទ្ធិ ឡោះ ក៏បានជម្រុញឲ្យគ្រប់មេបញ្ជាការវរះ ត្រូវមានសាមគ្គីផ្ទៃក្នុង ពង្រឹងប្រសិទ្ធភាពកម្លាំង សហការជាមួយអាជ្ញាធរ ស្ថាប័នពាក់ពន្ធ័ និងភាគីថៃឲ្យបានល្អ ដើម្បីបង្កលក្ខណ:ងាយស្រួលក្នុងការធ្វើការងារ។ ម្យ៉ាងវិញទៀតកម្លាំងទាំងអស់ ត្រូវរួមគ្នាទប់ស្កាត់រាល់បទល្មើសតាមព្រំដែន ពិសេសគឺបទល្មើសនានារួមមាន:
១-ការជួញដូរមនុស្សឆ្លងដែនខុសច្បាប់(ពលករចំណាកស្រុក មេខ្យល់)
២-បទល្មើសសេដ្ឋកិច្ច (ទំនិញគេចពន្ធ និងរថយន្តចង្កូតស្តាំ)
៣-បទល្មើសជួញដូរគ្រឿងញៀន។
ក្រៅពីនេះលោកឧត្តមសេនីយ៍ទោ ស្នងការ ក៏បានដាក់ចេញនូវបទបញ្ជាឲ្យកម្លាំងនគរបាលព្រំដែនទាំងអស់ ត្រូវយកចិត្តទុកដាក់ ពង្រឹងប្រសិទ្ធភាពការងារ ត្រៀមកម្លាំងប្រចាំការ២៤ម៉ោង កសាងប៉ុស្តិ៍ ជំរក សម្ភារ: បរិក្ខាទ័ព គ្រប់គ្រងគ្រាប់/អាវុធ បង្កបង្កើនការដាំដំណាំ ចិញ្ចឹមត្រី ចិញ្ចឹមសត្វ ដើម្បីទ្រទ្រង់ដល់ការហូបចុកប្រចាំថ្ងៃ ដើម្បីលើកស្ទួយជីវភាពនគរបាលតាមព្រំដែនឲ្យកាន់តែមានភាពប្រសើរឡើង៕
