ទឹកជំនន់កំពុងវាយលុកជាលើកទី២ នៅក្រុងប៉ោយប៉ែត បណ្តាលឲ្យប្រជាពលរដ្ឋជាង១០០គ្រួសាររងផលប៉ះពាល់ កម្លាំងចម្រុះកំពុងចុះជម្លៀសទៅកាន់ទីទួលសុវត្ថិភាព
ខេត្តបន្ទាយមានជ័យ៖បន្ទាប់ពីភ្លៀងធ្លាក់ជាប់ៗគ្នាប៉ុន្មានថ្ងៃនេះ នឹងមួយផ្នែកទៀតហូរធ្លាក់ពីប្រទេសថៃផងនោះ បណ្ដាលឱ្យផ្ទះប្រជាពលរដ្ឋនៅតាមបន្ទាត់ព្រំដែនកម្ពុជា-ថៃ ក្នុងភូមិសាស្ត្រក្រុងប៉ោយប៉ែត បន្តជន់លិចជាលើកទី២ បណ្ដាលឱ្យរងផលប៉ះពាល់ប្រមាណជាង ១០០គ្រួសារ ត្រូវបានកម្លាំងចម្រុះដឹកនាំដោយឯកឧត្តម ប៉ាន់ខែម ប៊ុនថន នាយករងឧទ្ធិការល័យសម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា និងលោក គាត ហ៊ុល អភិបាលនៃគណ:ក្រុងប៉ោយប៉ែត នៅព្រឹកថ្ងៃទី២០ ខែតុលា ឆ្នាំ២០២១នេះ បានចុះពិនិត្យមើលស្ថានភាពទឹកជំនន់ និងចុះសួរសុខទុក្ខ ប្រជាពលរដ្ឋ និងរៀបចំសម្ភារៈ ត្រៀមជម្លៀសប្រជាពលរដ្ឋ ទៅរកទីទួលសុវត្ថិភាពផងដែរ។
លោក គាត ហ៊ុល អភិបាលក្រុងប៉ោយប៉ែត បានមានប្រសាសន៍ថា ទឹកជំនន់ដែលហូរតាមបណ្តោយអូរព្រំដែនកម្ពុជា-ថៃ ដែលបង្កឲ្យប៉ះពាល់លំនៅឋានប្រជាពលរដ្ឋនេះ ជាលើកទី២ហើយ មកទល់ថ្ងៃនេះ ឃើញថា មានជាង១០០គ្រួសារហើយដែលកំពុងប៉ះពាល់ និងជម្លៀសទៅកាន់ទីទួលសុវត្ថិភាពបានចំនួនជាង៧០គ្រួសារគិតត្រឹមថ្ងៃត្រង់ទី២០ តុលា នេះ។
លោកបានបញ្ជាក់ថា ទឹកជំនន់ដែលធ្វើឲ្យប៉ះពាល់លំនៅឋាននេះ មួយផ្នែកគឺភ្លៀងធ្លក់នៅក្នុងភូមិសាស្ត្រក្រុងប៉ោយប៉ែតផ្ទាល់ និងមួយផ្នែកទៀត ទឹកធ្លាក់មកពីប្រទេសថៃ ដែលបានបើកទំនប់បង្ហូរ តែភាគីថៃប្រាប់ថា មិនបើកកំហុកនោះទេ។ជាការយកចិត្តទុកដាក់ អាជ្ញាធររួមទាំងកម្លាំងចម្រុះ បានចុះជម្លៀសប្រជាពលរដ្ឋ និងចុះរៀបចំសម្ភារ របស់របរជាមួយប្រជាពលរដ្ឋនាំមកទីទួលសុវត្ថភាព និងរៀបចំត្រៀមលក្ខណៈជាស្រេច ដូចជា ទូក កាណូត និងសម្ភារៈសង្គ្រោះផ្សេងៗព្រោះក្រសួងឧតុនិយមបានចេញសេចក្តីប្រកាសថា និងមានភ្លៀងធ្លាក់ជាបន្តបន្ទាប់ទៀត នៅប៉ុន្មានថ្ងៃខាងមុខនេះ៕