ឃាត់ខ្លួន មេខ្យល់ម្នាក់ ពលករខ្មែរចំនួន១៩នាក់ និងកុមារ២នាក់ ដែលបម្រុងលួចឆ្លងដែនទៅប្រទេសថៃខុសច្បាប់
ខេត្តបន្ទាយមានជ័យ៖ពលករខ្មែរ ប្រុស ស្រី ចំនួន១៩នាក់ ក្នុងនោះមានកុមារចំនួន២នាក់ និងមេខ្យល់១នាក់ បម្រុងលួចឆ្លងដែនទៅប្រទេសថៃដោយខុសច្បាប់ ត្រូវបានកម្លាំងនគរបាលវរសេនាតូចការពារព្រំដែនគោកលេខ៨១៥ និងកម្លាំងនគរបាលប៉ុស្តិ៍រដ្ឋបាលឃុំបឹងបេង សហការជាមួយ កម្លាំងយោធាប្រតិបត្ដិការសឹករង ខេត្ដបន្ទាយមានជ័យ ធ្វើការឃាត់ខ្លួនកាលពីវេលាម៉ោង៥និង១០នាទីព្រឹក ថ្ងៃទី១៩ ខែតុលា ឆ្នាំ២០២១ នៅចំណុចមាត់អូរព្រំដែន ស្ថិតនៅក្នុងភូមិល្វា ឃុំបឹងបេង ស្រុកម៉ាឡៃ ខេត្ដបន្ទាយមានជ័យ។
លោកវរសេនីយ៍ឯក សួង សៅ មេបញ្ជាការវរសេនាតូចការពារព្រំដែនគោកលេខ៨១៥ បានឲ្យដឹងថា ពលករខ្មែរទាំង១៩នាក់ ក្នុងនោះមានស្រីចំនួន៦នាក់ កុមារចំនួន២នាក់មកពី៤ខេត្ត ក្នុងនោះ ខេត្តបន្ទាយមានជ័យចំនួន៣នាក់, ខេត្តបាត់ដំបងចំនួន៩នាក់,ខេត្តត្បូងឃ្មុំចំនួន១នាក់និងខេត្តព្រៃវែងចំនួន៦នាក់ ។
លោកវរសេនីយ៍ឯក សួង សៅ បញ្ជាក់ថា ក្នុងចំណោមពលករទាំង១៩នាក់នោះ សមត្ថកិច្ចចម្រុះបានរកឃើញមេខ្យល់១នាក់ ឈ្មោះ ឃឹន សុឃី ភេទប្រុស អាយុ៣៤ឆ្នាំ រស់នៅភូមិល្វា ឃុំបឹងបេង ស្រុកម៉ាឡៃ ខេត្តបន្ទាយមានជ័យ បម្រុងនាំពលករទាំង១៩នាក់លួចឆ្លងដែនរកការងារធ្វើនៅប្រទេថៃ។ចំពោះពលករទាំងអស់ និងមេខ្យល់បន្ទាប់ពីធ្វើការណែនាំស្ដីពីការឆ្លងរាលដាលរបស់ មេរោគកូវីដ-១៩ និងធ្វើកិច្ចសន្យារួច បានបញ្ជូនពួកគាត់ទៅមណ្ឌលចត្ដាឡីស័កកម្រិត២ វិទ្យាល័យម៉ាឡៃ ដើម្បីយកសំណាកធ្វើតេស្ដរកមេរោគកូវិដ-១៩ មុននឹងប្រគល់ជូនផ្នែកជំនាញរបស់អធិការដ្ឋាននគរបាលស្រុកម៉ាឡៃ ដើម្បីសួរនាំនិងចាត់វិធានការតាមនិតិវិធី៕
.jpg)
.jpg)