ឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន អញ្ជើញជាអធិបតីក្នុងសិក្ខាសាលា ស្តីពីការផ្តល់បច្ចេកទេស ក្នុងការអនុវត្តមុខងារ ដែលបានផ្ទេរជូនរដ្ឋបាលថ្នាក់ក្រោមជាតិ
ខេត្តកំពត៖កាលពីល្ងាចថ្ងៃចន្ទ ១១កើត ខែអស្សុជ ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី២៨ ខែកញ្ញា ឆ្នាំ២០២០ ឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន ឯកឧត្តម ជាវ តាយ អភិបាលនៃគណៈអភិបាលខេត្តកំពត បានអញ្ជើញជាអធិបតីក្នុងសិក្ខាសាលាស្តីពីការផ្តល់បច្ចេកទេសក្នុងការអនុវត្តមុខងារ ដែលបានផ្ទេរជូនរដ្ឋបាលថ្នាក់ក្រោមជាតិ។
សិក្ខាសិលានេះបានប្រព្រឹត្តទៅនៅសាលាខេត្តកំពត ដោយមានការអញ្ជើញចូលរួមពីឯកឧត្តម លោកជំទាវ រដ្ឋលេខាធិការ អនុរដ្ឋលេខាធិការ អគ្គនាយក ឯកឧត្តមអភិបាលខេត្តព្រះសីហនុ ខេត្តតាកែវ ខេត្តកែប ឯកឧត្តម លោកជំទាវអភិបាលរងខេត្តកំពត ប្រធានមន្ទីរ អង្គភាពជុំវិញខេត្ត អភិបាលក្រុង ស្រុក ទីចាត់ការ អង្គភាពចំណុះសាលាខេត្ត សរុបប្រមាណ៩០នាក់។
មានប្រសាសន៍ក្នុងពិធីនេះ ឯកឧត្តម ជាវ តាយ បានបញ្ជាក់ថា ក្នុងនាមរដ្ឋបាលខេត្ត និងក្នុងនាមឯកឧត្តមផ្ទាល់ សូមសំដែងនូវការកោតសរសើរចំពោះក្រសួងបរិស្ថាន ជាពិសេសក្រុមការងារបច្ចេកទេសវិមជ្ឈការ និងវិសហមជ្ឈការ នៃក្រសួងបរិស្ថាន ដែលបានប្រឹងប្រែងរៀបចំ និងជំរុញឲ្យមានការអនុវត្តគោលនយោបាយផ្ទេរមុខងារតាមបែបប្រតិភូកម្មជូនរដ្ឋបាលក្រុង ស្រុក ឃុំសង្កាត់ ជាមួយនឹងការវិភាជថវិកាមួយចំនួនដើម្បីអនុវត្ត។តាមរយៈកិច្ចខិតខំប្រឹងប្រែងដ៏ជាក់ស្តែង និងមានតម្លៃរបស់ក្រសួងបរិស្ថានក្នុងការធ្វើប្រតិភូកម្មដោយមានកិច្ចសហការល្អជាមួយអាជ្ញាធរ មូលដ្ឋានគ្រប់លំដាប់ថ្នាក់ កងកម្លាំងប្រដាប់អាវុធ និងស្ថាប័នជំនាញពាក់ព័ន្ធនៅថ្នាក់ក្រោមជាតិ ទាំងផ្នែកបច្ចេកទេស ច្បាប់គោលនយោបាយ និងថវិកា ដើម្បីអនុវត្តការផ្ទេរមុខងារ តាមបែបបវិសហមជ្ឈការ ឲ្យកាន់តែមានប្រសិទ្ធភាព និងទាន់ពេលវេលា។
ឯកឧត្តម បានបន្ថែមទៀតថា កន្លងមកក្រសួងបរិស្ថានបានចេញប្រកាសផ្ទេរមុខងារតាមបែបប្រតិភូកម្មចំនួន០៥ដល់ខេត្តកំពតរួមមាន៖
១.ការប្រគល់មុខងារគ្រប់គ្រងសំរាម និងសំណល់រឹងទីប្រជុំជនក្រុង និងការគ្រប់គ្រងប្រព័ន្ធលូ និងប្រព័ន្ធទឹកកខ្វក់ សម្រាប់ក្រុង ស្រុកទាំង៨
២.ការធ្វើប្រតិភូកម្មមុខងារការគ្រប់គ្រងតំបន់ការពារធម្មជាតិជូនទៅក្រុងកំពត និងស្រុកទឹកឈូ
៣.ការធ្វើប្រតិភូកម្មមុខងារគ្រប់គ្រងសហគមន៍តំបន់ការពារធម្មជាតិជូនទៅឃុំ សង្កាត់គឺឃុំព្រែកត្នោត ស្រុកទឹកឈូ និងសង្កាត់អណ្តូងខ្មែរ ក្រុងកំពត
៤.ការធ្វើប្រតិភូកម្មមុខងារការបញ្ច្រាបភាពធន់នឹងអាកាសធាតុជូនទៅក្រុង ស្រុកគឺស្រុកទឹកឈូ និងក្រុងកំពត
៥.ការធ្វើប្រតិភូកម្មមុខងារពង្រឹងការងារអប់រំបរិស្ថានជូនមករដ្ឋបាលខេត្តកំពត៕
