ឧបនាយករដ្ឋមន្ត្រី កែ គឹមយ៉ាន ជំរុញឲ្យអាជ្ញាធរ សហការសម្រួលជាមួយភាគីថៃ បើកច្រកឲ្យបានលឿន ដើម្បីឲ្យសេដ្ឋកិច្ចដើរឡើងវិញ ក៏ដូចជាជូយសម្រួលដល់ជីវភាពប្រជាពលរដ្ឋ
ខេត្តបន្ទាយមានជ័យ៖ក្នុងឱកាសអញ្ជើញជួបសំណេះសំណាលសួរសុខទុក្ខ និងនាំយកអំណោយមនុស្សធម៌ ផ្តល់ជូនប្រជាពលរដ្ឋមានជីវភាពខ្វះខាតក្នុងអំឡុងជំងឺកូវីដ-១៩ ចំនួន៤០០គ្រួសារ នៅក្នុងបរិវេណវត្តព្រៃគប់ សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ នាព្រឹកថ្ងៃទី២ ខែកញ្ញា ឆ្នាំ២០២០ នាយឧត្តមសេនីយ៍ កែ គឹមយ៉ាន ឧបនាយករដ្ឋមន្ត្រី អ្នកតំណាងរាស្រ្ត ប្រធានអាជ្ញាធរជាតិប្រយុទ្ធប្រឆាំងគ្រឿងញៀន និងជាប្រធានក្រុមការងាររាជរដ្ឋាភិបាល ចុះមូលដ្ឋានខេត្តបន្ទាយមានជ័យ បាននាំមកនូវការផ្តាំផ្ញើសាកសួរសុខទុក្ខ ពីសំណាក់សម្តេចវិបុលសេនាភក្តី សាយ ឈុំ ប្រធានព្រឹទ្ធសភា អគ្គមហាពញាចក្រី ហេង សំរិន ប្រធានរដ្ឋសភា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃកម្ពុជា ដោយក្តីនឹករលឹកបំផុត ដែលសម្ដេចទាំងទ្វេ តែងតែគិតគូ ពីសុខទុក្ខរបស់ប្រជាពលរដ្ឋជានិច្ច គ្រប់កាលៈទេសៈ។
នាឱកាសនោះឧបនាយករដ្ឋមន្ត្រី កែ គឹមយ៉ាន បានមានប្រសាសន៍ថា កម្ពុជាដឹកនាំដោយសម្តេចតេជោ ហ៊ុន សែន ដើរលើផ្លូវត្រូវប្រទេសមានសុខសន្តិភាព រីកចម្រើនគ្រប់វិស័យ ប្រជាពលរដ្ឋរស់ក្នុងភាពសុខសាន្តសម្បូរសប្បាយ រួមសុខរួមទុក្ខជាមួយប្រជាពលរដ្ឋគ្រប់កាលៈទេសៈទាំងអស់ ដោយមិនទុកឱ្យប្រជាពលរដ្ឋណាម្នាក់ជួបការលំបាក ហើយមិនធ្វើការដោះស្រាយនោះឡើយ ពិសេសដំណាក់កាលកម្ពុជា ក៏ដូចជាប្រទេសស្ទើរតែទាំងអស់លើលោកជួបបញ្ហាជំងឺកូវីដ-១៩ បានចេញវិធានការប្រកបដោយប្រសិទ្ធិភាព ហ្មត់ចត់ និងដាច់ខាត ដើម្បីបង្ការទប់ស្កាត់ការរីករាលដាលជំងឺកូវីដ១៩។
ក្នុងនោះឧបនាយករដ្ឋមន្ត្រី កែ គឹមយ៉ាន បានណែនាំឱ្យប្រជាពលរដ្ឋទាំងអស់បន្តថែរក្សាសន្តិភាព ថែរក្សាសុខភាព ចូលរួមឱ្យបានសកម្មបន្ថែមទៀតក្នុងការងារប្រយុទ្ធប្រឆាំងជំងឺកូវីដ-១៩ គ្រុនឈាម គ្រុនឈីក បញ្ហាគ្រឿងញៀន និងបន្តពង្រឹងពង្រីកមុខរបរកសិកម្មដាំដុះបន្លែបង្ការ ចិញ្ចឹមសត្វដើម្បីបង្កើនចំណូលចិញ្ចឹមគ្រួសារ។
ឧបនាយករដ្ឋមន្ត្រី កែ គឹមយ៉ាន បញ្ជាក់ថា ការក្រៃក្ររបស់ប្រជាពលរដ្ឋមានលក្ខណៈខុសៗគ្នាច្រើន ជូនការភ្លើងឆេះផ្ទះក៏ក្រដែរមិនមែនតែជំងឺកូវីដមួយទេ អញ្ជឹងអំណោយសំណ្តៅទៅលើអ្នកក្រជាក់ស្តែង ដែលយើងមានលទ្ធភាពជួយ ប៉ុន្តែរឿងសាច់ប្រាក់ត្រូវមានបែបបទរបស់វា ដើម្បីវាយតម្លៃថា អ្នកណាក្រប្រភេទ១ ក្រប្រភេទ២ ហើយឥឡូវមិនទាន់ឈប់ធ្វើនោះទេ ការណានៅមានជំងឺកូវីដ រាជរដ្ឋាភិបាលនៅតែបន្តធ្វើ ពីព្រោះប្រជាពលរដ្ឋបានបាត់បង់ប្រាក់ជំនូល។ចំពោះបញ្ហាព្រំដែនឧបនាយករដ្ឋមន្ត្រី បានជំរុញឲ្យអាជ្ញាធរខេត្ត ក្រុង សហការជាមួយភាគីថៃបើកច្រកឲ្យបានលឿន ដើម្បីឲ្យសេដ្ឋកិច្ចដើរឡើងវិញ ក៏ដូចជាជូយសម្រួលដល់ជីវភាពប្រជាពលរដ្ឋ។
ឧបនាយករដ្ឋមន្ត្រី កែ គឹមយ៉ាន បញ្ជាក់ទៀតថា កម្ពុជាមិនបានបិតច្រកព្រំដែននោះទេ គឺបណ្តាលប្រទេសជិតខាងជាអ្នកបិត ដើម្បីការពារនូវជំងឺឆ្លងកូវីដ១៩។ទន្ទឹមនោះឧបនាយករដ្ឋមន្ត្រីបានស្នើឲ្យអាជ្ញាធរនៅតាមបន្ទាត់ព្រំដែន ត្រូវសហកាជាមួយភាគីថៃ ពាក់ពន្ធ័ទៅនឹងការឆ្លងដែនខុសច្បាប់របស់ពលរដ្ឋខ្មែរ តាមច្ររបៀងដោយមិនបានពិនិត្យសុខភាពតាមការណែនាំរបស់ក្រសួងសុខាភិបាល និងជាបញ្ហាប្រឈមទៅនឹងគ្រោះថ្នាក់ផ្សេងផងដែរ។
អំណោយដែលត្រូវផ្តល់ជូនប្រជាពលរដ្ឋមានជីវភាពខ្វះខាតចំនួនប្រជាពលរដ្ឋ៤០០គ្រួសារ ក្នុង១គ្រួសារទទួលបាន អង្ករ២០គីឡូក្រាម មី១កេះតូច ទឹកស៊ីវអ៊ីវ១យួរ ប៊ីចេង១កព្ចាប់ ស្ករស ១គីឡូក្រាម ប្រេងឆា ១ដប សាប៊ូ១គីឡូក្រាម សារុង១ ថវិកា១ម៉ឺនរៀន។ចំណែកក្រុមការងារជួសជុលផ្លូវ២៥នាក់ ក្នុងម្នាក់ៗទទួលបានថវិកា ៥ម៉ឺនរៀល នគរបាលការពារ កងរាជអាវុធហត្ថ ក្រុមគ្រូពេទ្យ ប្រជាការពារ ក្រុមយុវជន ក្នុង១ក្រុម /អង្គភាពទទួលបាន៥០០.០០០រៀលផងដែរ៕
