មន្ទីរធម្មការ និងសាសនាខេត្តសៀមរាប បើកកិច្ចប្រជុំផ្សព្វផ្សាយសេចក្តីណែនាំ ស្តីពីការការពារ និងការទប់ស្កាត់ការរីករាលដាលជំងឺកូវីដ-១៩ ក្នុងឱកាសពិធិបុណ្យកាន់បិណ្ឌ និងភ្ជុំបិណ្ឌ
ខេត្តសៀមរាប៖មន្ទីរធម្មការ និងសាសនាខេត្តសៀមរាប បានសហការជាមួយព្រះមេគណខេត្តសៀមរាបទាំងពីរគណៈ ប្រជុំន្វត្តរាជបូណ៌ សង្កាត់សាលាកំរើក ក្រុងសៀមរាប ខេត្តសៀមរាបកាលពីរសៀលថ្ងៃចន្ទ ១៣កើត ខែភទ្របទ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី៣១ ខែសីហា ឆ្នាំ២០២០ បានរៀបចំកិច្ចប្រជុំផ្សព្វផ្សាយសេចក្តីណែនាំ ស្តីពីការការពារ និងការទប់ស្កាត់ការរីករាលដាលជំងឺកូវីដ-១៩ ក្នុងឱកាសពិធិបុណ្យកាន់បិណ្ឌ និងភ្ជុំបិណ្ឌ ក្រោមអធិបតីភាព ព្រះធម្មសិរី ជុំ គឹមឡេង ព្រះរាជាគណៈថ្នាក់កិត្តិយស និងជាព្រះសុមង្គលសិលាចារ្យ ព្រះមេគណខេត្តគណមហានិកាយ ព្រះគ្រូធម្មរាជវិរិយ ឈួន ឆ្លង សុឆន្ទធម្មោ ព្រះធម្មធរគណខេត្តគណៈធម្មធម្មយុត្តិកនិការ តំណាងព្រះរាជសាន្តិនគរ ព្រះមេគណខេត្ត និងលោក លិញ ម៉ៅ អនុប្រធានមន្ទីរធម្មការ និងសាសានាខេត្តសៀមរាប តំណាងលោកវណ្ណ ប៊ុនណា ប្រធានមន្ទីរធម្មការ និងសាសនាខេត្ត និងបាននិមន្ត-អញ្ជើញចូលរួមពីព្រះគ្រូអនុគណក្រុង-ស្រុក លោកអនុប្រធានការិយាល័យកិច្ចការព្រះពុទ្ធសាសនាផ្សារភ្ជាប់នឹងសង្គម នៃមន្ទីរធម្មការ និងសាសនាខេត្តសៀមរាប ។
កិច្ចប្រជុំនេះដែរ ដើម្បីផ្សព្វផ្សាយលិខិតលេខ ១៤/២០ ក.ធ.ស.សណន ស្តីពីការរៀបចំពិធីបុណ្យកាន់បិណ្ឌ-ភ្ជុំបិណ្ឌ និងពង្រឹងវិធានការការពារសុវត្ថិភាពសង្គម ដើម្បីកាត់បន្ថយហានិភ័យនៃការរីករាលដាលជំងឺកូវីដ-១៩ និងព្រះរាជសារលេខ២០១/២០ ស.ន.ក.ជ របស់គណៈសង្ឃនាយកនៃព្រះរាជាណាចក្រកម្ពុជា ព្រះរាជសង្ឃប្រកាសរបស់សម្តេចព្រះសង្ឃនាយកគណៈធម្មយុត្តិកនិកាយ នៃព្រះរាជាណាចក្រកម្ពុជា និងលិខិតលេខ១៨៣ សខល ស្តីការការពារការចម្លងវីរុសកូវីដ-១៩ និងការពុលចំណីអាហារក្នុងអំឡុងពិធីបុណ្យកាន់បិណ្ឌ និងភ្ជុំបិណ្ឌ របស់ក្រសួងសុខាភិបាល ។
ដូចនេះសូមព្រះគ្រូអនុគណក្រុង ស្រុក ព្រះតេជព្រះគុណគ្រប់អង្គ យកព្រះទ័យទុកដាក់ប្រុងប្រយ័ត្នឲ្យបានខ្ពង់ខ្ពស់នៅរដូវកាលនៃពិធីបុណ្យកាន់បិណ្ឌ និងភ្ជុំបិណ្ឌខាងនេះ និងសូមឲ្យជួយណែនាំទៅដល់ព្រះចៅអធិការ និងអាចារ្យ គណៈកម្មការគ្រប់វត្តអារាម ឲ្យរៀបចំទីកន្លែងសម្រាប់លាងដៃ និង អាកុល ជែល សម្រាប់លាងដៃ មុននឹងចូលប្រគេនចង្ហាន់ ឬទេយ្យវត្ថុផ្សេងៗ ដល់ព្រះសង្ឃ ហើយត្រូវណែនាំដល់ព្រះគ្រូអនុគណ តំណាងព្រះគ្រូអនុគណ ត្រូវផ្សព្វផ្សាយដល់ព្រះចៅអធិការគ្រប់វត្តអារាម និងអនុវត្តការណែនាំរបស់គណៈសង្ឃនាយក ក្រសួងធម្មការ និងសាសនា និងក្រសួងសុខាភិបាល៕
