ប្រគល់វិញាបនបត្រ ISO និងប្រកាសតែងតាំង នាយជីកានាយករង នាយិការង នៃវិទ្យាស្ថានពហុបច្ចេកទេស ខេត្តបន្ទាយមានជ័យ
ខេត្តបន្ទាយមានជ័យ៖ក្នុងពិធីប្រគល់វិញាបនបត្រ ISO និងប្រកាសតែងតាំង នាយជីកានាយករងនាយិការង នៃវិទ្យាស្ថានពហុបច្ចេកទេសខេត្តបន្ទាយមានជ័យ កាលពីព្រឹកថ្ងៃទី២៥ ខែសីហា ឆ្នាំ២០២០ នៅវិទ្យាស្ថានពហុបច្ចេកទេសខេត្តបន្ទាយមានជ័យ ស្ថិតក្នុងភូមិគាប សង្កាត់ទឹកថ្លា ក្រុងសេរីសោភ័ណ ខេត្តបន្ទាយមានជ័យ ជាប់នឹងវត្តភ្នំជញ្ជាំង លោក ពេជ សោភ័ន រដ្ឋលេខាធិការប្រចាំការ នៃក្រសួងការងារ និងបណ្ដុះបណ្ដាលវិជ្ជាជីវៈ បានមានប្រសាសន៍បញ្ជាក់ថា ការបង្កើតវិទ្យាស្ថាននេះឡើង ក្នុងបំណងបណ្ដុះបណ្ដាលជំនាញវិជ្ជាជីវៈផ្នែកកសិកម្ម សេវាកម្ម និងកសិកម្ម ជូនដល់ប្រជាពលរដ្ឋដែលខ្វះជំនាញ ដើម្បីស្ដារជីវភាពឡើង ហើយវិទ្យាស្ថាននេះក្រោមជំនួយឧបត្ថម្ភកម្មវិធីអភិវឌ្ឍន៍របស់អង្គការសហប្រជាជាតិ។
យោងតាមអនុក្រឹត្យ លេខ ៤០៦ សនក្រ តត ស្ដីពីការតែងតាំង និងប្រគល់ភារកិច្ចជូនមន្ត្រីរាជការចំនួន២នាក់ សម្រេចតែងតាំង លោក ឯក ហៀងជានាយយកវិទ្យាស្ថានពហុបច្ចេកទេសខេត្តកំពង់ធំ មានឋានៈស្មើប្រធាននាយកដ្ឋាន លោកស្រី សំរិទ្ធ សូរ្យជាតិ ប្រគល់ភារកិច្ចឲ្យបំពេញមុខងារជានាយិកាវិទ្យាស្ថានពហុបច្ចេកទេសខេត្តបន្ទាយមានជ័យមានឋានៈស្មើរប្រធាននាយកដ្ឋាន ក្រោយពីប្រកាសហើយមន្ត្រីទាំងពីរនាក់ ត្រូវទទួលបន្ទុកអនុវត្តអនុក្រឹត្យនេះតាមភារកិច្ចរៀងៗខ្លួនចាប់ពីថ្ងៃចុះហត្ថលេខានេះតទៅ។
បើតាមរបាយការណ៍របស់លោក យ៉ោក សុទ្ធី នាយកវិទ្យាស្ថានជាតិបណ្ដុះបណ្ដាលបច្ចេកទេសបានឲ្យដឹងថា សព្វថ្ងៃនេះវិទ្យាស្ថានពហុបច្ចេកទេសខេត្តបន្ទាយមានជ័យ ក្រោមការគ្រប់គ្រងរបស់ក្រសួងអប់រំ និងយុវជនកីឡា និងមន្ទីរអប់រំយុវជននិងកីឡាខេត្តបន្ទាយមានជ័យ ដើម្បីចូលរួមចំណែកជាមួយរាជរដ្ឋាភិបាលតាមរយៈក្រសួងការងារ និងបណ្ដុះបណ្ដាលវិជ្ជាជីវៈ និងដើម្បីសម្រេចឲ្យបានតាមទស្សនៈវិស័យបេសកកម្មគោលបំណងក៏ដូចជាផែនការយុទ្ធសាស្ត្រសកម្មភាពការធ្វើទំនើប កម្មប្រព័ន្ធអប់រំបណ្ដុះបណ្ដាលវិជ្ជាជីវៈ។
វិទ្យាស្ថាននេះសម្រេចបានលទ្ធផលការងារសំខាន់ៗ ក្នុងរយៈពេលជាច្រើនឆ្នាំកន្លងមកនេះដូចជាការអប់រំបណ្ដុះបណ្ដាលបច្ចេកទេស និងវិជ្ជាជីវៈការបណ្ដុះបណ្ដាលកម្រិតវិញ្ញាបនបត្របច្ចេកទេស និងវិជ្ជាជីវៈ វិស័យអប់រំបណ្ដុះបណ្ដាលបច្ចេកទេសនិងវិជ្ជាជីវៈ ដែលមានដូចជាការគ្រប់គ្រង និងអភិបាលកិច្ចធនធានរូបវន្តបុគ្គលិកមន្ត្រីរាជការនិងបច្ចេកទេស សិក្ខាកាមសិស្សនិស្សិតសិក្សាការបង្រៀន និងរៀនតាមការស្រាវជ្រាវ និងអភិវឌ្ឍន៍ជាដើម ដើម្បីឲ្យពួកគាត់បានយល់ដឹង និងយកទៅអនុវត្តនៅក្នុងដំណើរការប្រតិបត្តិការងារប្រចាំថ្ងៃ ដើម្បីធានាបានគុណភាពប្រសិទ្ធភាព និងលើកកម្ពស់ដល់វិទ្យាស្ថានក្នុងការផលិតនូវធនធានមនុស្ស នឹងដើម្បីឆ្លើយតបទៅនឹងតម្រូវការទីផ្សារការងារបច្ចុប្បន្ន និងទៅអនាគតផងដែរ៕
