សាខាកាកបាទក្រហមកម្ពុជា និងនគរបាលចរាចរណ៍ផ្លូវគោក ខេត្តកំពង់ចាម បើកយុទ្ធនាការអប់រំផ្សព្វផ្សាយ អំពីសុវត្ថិភាពចរាចរណ៍ផ្លូវគោក នាឱកាសថ្ងៃឈប់សម្រាក សងថ្ងៃចូលឆ្នាំថ្មី
ខេត្តកំពង់ចាម៖នាឱកាសថ្ងៃឈប់សម្រាកសងថ្ងៃចូលឆ្នាំថ្មីប្រពៃណីជាតិខ្មែរ ឯកឧត្តម អ៊ុន ចាន់ដា អភិបាល នៃគណៈអភិបាលខេត្តកំពង់ចាម និងជាប្រធានគណៈកម្មាធិការសាខាកាកបាទក្រហមកម្ពុជាខេត្ត បានចាត់ឱ្យលោកនាយកសាខា អនុសាខា ក្រុង ទីប្រឹក្សា និងយុវជនកាកបាទក្រហមកម្ពុជា សហការជាមួយសមត្ថកិច្ចនគរបាលចរាចរណ៍ផ្លូវគោក ដើម្បីធ្វើយុទ្ធនាការអប់រំផ្សព្វផ្សាយ អំពីសុវត្ថិភាពចរាចរណ៍ផ្លូវគោក រួមជាមួយ ការអប់រំសុខភាព ពាក់ព័ន្ធទៅនឹងការកាត់បន្ថយហានិភ័យ នៃការឆ្លងជម្ងឺកូវីដ១៩, ជម្ងឺគ្រុនឈីក និងជម្ងឺគ្រុនឈាម នៅតាមកែងភ្លើង ស្តុបដែលមាន ចំនួន៤កន្លែងក្នុងក្រុងកំពង់ចាម។
សូមសូមជំរាបផងដែរថា នៅតាមគោលដៅស្តុប នីមួយៗសាខា បានប្រើប្រាស់កម្លាំងយុវជនកាកបាទក្រហមកម្ពុជា ចំនួន៨នាក់,ទីប្រឹក្សាយុវជន២នាក់,មន្ត្រីក្រុមប្រតិបត្តិសាខា២នាក់ និងនគរបាលចរាចរណ៍ផ្លូវគោក៤នាក់ សរុបទាំង៤គោលដៅស្តុប មានចំនួន៦៤នាក់ ។
តាមគោលដៅស្តុបនីមួយៗ ក្រុមការងារបានធ្វើការអប់រំផ្សព្វផ្សាយដល់អ្នកបើកបររថយន្ត ម៉ូតូ និងអ្នកធ្វើដំណើរទាំងឡាយ គោរពអោយបានម៉ឹងម៉ាត់នូវច្បាប់ស្តីពីចរាចរណ៍ផ្លូវគោក ត្រូវពាក់ខ្សែក្រវ៉ាត់សុវត្ថិភាពចំពោះអ្នកបើកបររថយន្ត ហើយត្រូវពាក់មួកសុវត្ថិភាព ចំពោះអ្នកបើកបរម៉ូតូ ទាំងអ្នករួមដំណើរពីក្រោយ , កុំបើកបរហួសល្បឿនកំណត់ , ត្រូវបំពេញលក្ខខណ្ឌយានជំនិះរបស់ខ្លួនឲ្យបានគ្រប់គ្រាន់,សូមកុំបើកបរ ពេលពិសារគ្រឿងស្រវឹង ដើម្បីរក្សាការពារអាយុជីវិតខ្លួនឯង និងជីវិតអ្នកដទៃ ស្របតាមទិសស្លោក " ថ្ងៃនេះ ថ្ងៃស្អែក កុំអោយមានគ្រោះថ្នាក់ចរាចរណ៍ " ។
ជាមួយគ្នានោះដែរ ក្រុមការងារ ក៏បានអប់រំផ្សព្វផ្សាយដល់អ្នកដំណើរទាំងឡាយ អោយលើកកំពស់ការប្រុងប្រយ័ត្នខ្ពស់ ក្នុងការទប់ស្កាត់ហានិភ័យនៃការឆ្លងជម្ងឺកូវីដ១៩ តាមរយៈវិធានការអនាម័យស្អាត ៣យ៉ាង និងអនុវត្តអោយបានខ្ជាប់ខ្ជួន តាមសារអប់រំរបស់ក្រសួងសុខាភិបាល ពិសេសសារសម្តេចតេជោ ហ៊ុន សែន ដែលបានអំពាវនាវ ដល់ប្រជាពលរដ្ឋទាំងអស់ រក្សាអោយបានសុវត្ថិភាពផ្ទាល់ខ្លួន ហើយត្រូវធានាថា " ក្រោយថ្ងៃសម្រាកចូលឆ្នាំនេះ មិនមានការឆ្លងជម្ងឺកូវីដ១៩ ចូលក្នុងសហគមន៍ ទេ"។ដោយសាររដូវនេះ ជារដូវវស្សា ក្រុមការងារ ក៏បានធ្វើការណែនាំបន្ថែម អំពី ការរក្សាអនាម័យលំនៅដ្ឋាន ការកំចាត់ដង្កូវទឹក បំបាត់ជម្រកមូសខ្លា ការគេងក្នុងមុង ដើម្បីបង្ការការពារ កុំអោយឆ្លងជម្ងឺគ្រុនឈីក និងជម្ងឺគ្រុនឈាម ផងដែរ ។
ក្នុងថ្ងៃទី១ នៃយុទ្ធនាការនេះ សាខាបានប្រើប្រាស់ម៉ាស់៦៤បន្ទះ, ទឹកអាល់កុលលាងដៃ៥លីត្រ, បានចែកខិតប័ណ្ណអប់រំសុវត្ថិភាពចរាចណ៍ចំនួន៥មុខ ស្មើនឹង១៥៤សន្លឹក, ចែកខិតប័ណ្ណរូបភាពវិធីលាងសម្អាតដៃជាមួយសាប៊ូនឹងទឹកស្អាត, ទប់ស្កាត់ហានិភ័យជម្ងឺកូវីដ១៩ , បិទ sticker ចំណាំងផ្លាតលើម៉ូតូ រ៉ឺម៉កសណ្តោង ចំនួន ៨០សន្លឹក និងមានអ្នកចូលរួម សរុប ចំនួន ៣,១៦៨ នាក់ ក្នុងនេះមានរថយន្ត៦២៦គ្រឿង និង ម៉ូតូ១,០៣២គ្រឿងផងដែរ៕
.jpg)
