រដ្ឋបាលខេត្តកណ្តាល បើកយុទ្ធនាការអប់រំផ្សព្វផ្សាយ ស្តីពីសុវត្ថិភាពចរាចរណ៍ផ្លូវគោក នាឱកាសថ្ងៃឈប់សម្រាកសង ថ្ងៃបុណ្យចូលឆ្នាំប្រពៃណីខ្មែរ
ខេត្តកណ្តាល៖នាឱកាសថ្ងៃឈប់សម្រាកសងថ្ងៃបុណ្យចូលឆ្នាំប្រពៃណីខ្មែរ កាលពីព្រឹកថ្ងៃអាទិត្យ ១២រោច ខែស្រាពណ៍ ឆ្នាំជូត ទោស័ក ព.ស. ២៥៦៤ ត្រូវនឹង ថ្ងៃទី១៦ ខែសីហា ឆ្នាំ២០២០ លោក នូវ ប៉េងច័ន្ទតារា អភិបាលរងខេត្ត តំណាងឯកឧត្តម គង់ សោភ័ណ្ឌ អភិបាល នៃគណៈអភិបាលខេត្តកណ្តាល និងជាប្រធានគណៈកម្មាធិការសាខាកាបាទក្រហមកម្ពុជាខេត្ត អមដំណើរដោយសមាជិកគណៈកម្មាធិការសាខា មន្ត្រីប្រតិបត្តិសាខា យុវជន អ្នកស្ម័គ្រចិត្តកាកបាទក្រហមកម្ពុជា និងកម្លាំសមត្ថកិច្ច បើកយុទ្ធនាការអប់រំផ្សព្វផ្សាយ ស្តីពីសុវត្ថិភាពចរាចរណ៍ផ្លូវគោកនាឱកាសថ្ងៃឈប់សម្រាកសងថ្ងៃបុណ្យចូលឆ្នាំប្រពៃណីខ្មែរ និងចែកមួកសុវត្ថិភាព ចែកបណ្ណប្រកាស សន្លឹកបត់ កូនសៀវភៅអប់រំពីច្បាប់ចរាចរណ៍ផ្លូវគោក និងអនុក្រឹត្យលេខ៣៩ ស្តីពីការផាកពិន័យអន្តរការណ៍ចំពោះអំពើល្មើសនឹងច្បាប់ស្តីពីចរាចរណ៍ផ្លូវគោក ដែលមាន២ទីតាំងផ្សេងគ្នាក្នុងក្រុងតាខ្មៅ ខេត្តកណ្តាល។
ទីតាំងទី១-មុខវិទ្យាល័យហ៊ុនសែនតាខ្មៅ និងទីតាំងទី២- នៅចំណុចផ្លូវកែងស្តុបខាងមុខទីស្នាក់ការសាខាកាកបាទក្រហមកម្ពុជាខេត្ត។
ក្នុងពេលជាមួយគ្នានេះដែរក៏មានសំណួរចម្លើយអប់រំសុវត្ថិភាពចរាចរណ៍ មានរង្វាន់មួកសុវត្ថិភាព អាវយឺត ម៉ាស់ និងទឹកអាល់កុល ផ្តល់ជូនដល់បងប្អូនប្រជាពលរដ្ឋដែលឆ្លើយ នឹងសំណួរពីកម្មវិធីយុទ្ធនាការបានត្រឹមត្រូវ។
បើតាមការបញ្ជាក់ពីលោកអភិបាលរងខេត្តថា យុទ្ធនាការនេះប្រព្រឹត្តទៅក្នុងគោលបំណងផ្សព្វផ្សាយ និងចូលរួមចំណែកកាត់បន្ថយអត្រាគ្រោះថ្នាក់ស្លាប់ របួស និងពិការភាព ដោយសារគ្រោះថ្នាក់ចរាចរណ៍ ជូនដល់ សាធារណជន និងអ្នកប្រើប្រាស់ផ្លូវគ្រប់រូបឲ្យយល់ដឹងពីច្បាប់ចរាចរណ៍ផ្លូវគោក និងអនុក្រឹត្យលេខ៣៩ ស្តីពីការផាកពិន័យអន្តរការណ៍ ចំពោះអំពើល្មើសនឹងច្បាប់ស្តីពីចរាចរណ៍ផ្លូវគោក និងអំពាវនាវឲ្យបងប្អូនប្រជាពលរដ្ឋទាំងអស់ ធ្វើដំណើរត្រូវពាក់មួកសុវត្ថិភាពឲ្យបានត្រឹមត្រូវគ្រប់ពេលគ្រប់ទីកន្លែង បើកបរត្រូវចេះអធ្យាស័យឲ្យគ្នា បើកបរមិនស្ថិតក្រោមឥទ្ធិពលនៃគ្រឿងស្រវឹង បើកបរមិនលើសល្បឿនកំណត់ ត្រូវគោរពសិទ្ធិជនពិការ និងទុកសិទ្ធជាអាទិភាពជូនជនពិការក៏ដូចអ្នកប្រើប្រាស់ទាំងអស់ តាមស្លាកសញ្ញាចរាចរណ៍ ដែលបានបំពាក់នៅតាមដងផ្លូវ ដើម្បីឈានទៅដល់ការកាត់បន្ថយអត្រាស្លាប់ ពិការ និងរបួសធ្ងន់ដោយសារគ្រោះថ្នាក់ចរាចរណ៍ ដែលជាកត្តាបង្កឲ្យមានភាពក្រីក្រនៅក្នុងប្រទេសកម្ពុជា។
ជាងនេះទៅទៀតលោកបានផ្តាំផ្ញើដល់ប្រជាពលរដ្ឋទាំងអស់ ត្រូវអនុវត្តឱ្យបានខ្ជាប់ខ្ជួននូវវិធានការ និងសេចក្ដីណែនាំរបស់ក្រសួងសុខាភិបាលគឺ ត្រូវដុសលាងសម្អាតដៃជាប្រចាំដោយសាប៊ូ អាល់កុល ឬជែល និងពាក់ម៉ាស់ជាចាំបាច់នៅទីសារធារណ ដែលមានមនុស្សកុះករ ជាងនេះទៀត ត្រូវរក្សាគម្លាតសុវត្ថិភាពឲ្យបានយ៉ាងតិច ចាប់ពី១ម៉ែត្រកន្លះពីគ្នាឡើងទៅដើម្បីបង្ការជំងឺCovid-19 ហើយត្រូវដេកក្នុងមុង សម្អាតកន្លែងមានទឹកដក់ ដើម្បីការពារជំងឺគ្រុនឈាម គ្រុនឈីក៕
