មន្ទីបរិស្ថានខេត្តបន្ទាយមានជ័យ បើកកិច្ចប្រជុំបូកសរុបការងារ បរិស្ថានឆមាសទី១ និងលើកទិសដៅការងារបន្ត ដើម្បីពង្រឹងប្រសិទ្ធភាពការងារបរិស្ថាន
ខេត្តបន្ទាយមានជ័យ៖ក្នុងកិច្ចប្រជុំបូកសរុបការងារបរិស្ថានឆមាសទី១ និងលើកទិសដៅការងារបន្តដើម្បីពង្រឹងប្រសិទ្ធភាពការងារបរិស្ថាន កាលពីព្រឹក ថ្ងៃទី២៤ ខែកក្កដា ឆ្នាំ២០២០ នៅសាលប្រជុំក្នុងមន្ទីបរិស្ថានខេត្ត លោក យឹម លី ប្រធានមន្ទីរបរិស្ថានខេត្តបន្ទាយមានជ័យ បានមានប្រសាសន៍ថា បរិស្ថានគឺជារបស់ដែលមាននៅជុំវិញយើង មានដូចជាៈដី ទឹក ភ្លើង ព្រៃ និងរបស់ជាច្រើនទៀតដូច្នេះយើងទាំងអស់គ្នាត្រូវនាំគ្នាចូលរួមធ្វើអនាម័យ និងសំអាតបរិស្ថាននៅក្នុងទីផ្សារ ទីសាធារណះ ទីកន្លែងកំសាន្ត សាលារៀននៅជុំវិញផ្ទះ ដោយដាក់សំរាម ឬវេចខ្ចប់ទុកដាក់ក្នុងធុងសំរាមឲ្យបានត្រឹមត្រូវ មិនត្រូវដុតសំរាមដើម្បីបំបាត់វាចោលដែលបណ្តាលឲ្យមានការបំពុលខ្យល់ និងអាចប៉ះពាល់ដល់សុខភាព មនុស្សសត្វ ព្រមទាំងថែរក្សាការពារទ្រព្យសម្បត្តិសាធារណៈ ដែលទាក់ទងទៅនិងសំណល់រឹង រាវនេះជាដើម។
លោកបន្តថា មន្ទីរបរិស្ថានខេត្តចំណុះឲ្យក្រសួងបរិស្ថាន ទទួលខុសត្រូវក្នុងកិច្ចការពារបរិស្ថាន និងការគ្រប់គ្រងធនធានធម្មជាតិ នៃតំបន់ធម្មជាតិ ព្រមទាំងធ្វើការទប់ស្កាត់កាត់បន្ថយការបំពុលបរិស្ថាន។មន្ត្រីបរិស្ថានមានភារកិច្ចអប់រំផ្សាយ នឹងពិភាក្សាផ្តល់យោបល់ព័ត៌មាន អំពីបរិស្ថានឲ្យបានទូលំទូលាយដល់ប្រជាពលរដ្ឋ និងជំរុញឲ្យមានការចូលរួមគាំទ្រពីមជ្ឈដ្ឋាន ព្រមទាំងអនុវត្តរាល់គោលនយោបាយផែនការបរិស្ថានជាតិ ប្រព័ន្ធច្បាប់លិខិតបទដ្ឋានគតិយុទ្ធ។
ជាមួយគ្នានោះដែរលោក អោម ចន្ថា អភិបាលរងខេត្ត បានមានប្រសាសន៍ថា សព្វថ្ងៃនេះគេឃើញមានសំរាមនៅរាយប៉ាយពេញនៅក្នុងទីប្រជុំជន ដូច្នេះក្រុមម៉ៅការអនសម័យ ភាស្សីផ្សារ ត្រូវទទួលខុសត្រូវការបោសសំអាតជាប្រចាំ និងត្រូវមានវិធានការលាងសំអាតផ្សារ ឲ្យបានស្អាតល្អជារៀងរាល់ថ្ងៃ។ចំណែកក្រុមម៉ៅការដឹកជញ្ជូនសំរាមតាមស្រុកក្រុង ត្រូវមានផែនការប្រមូលដឹកជញ្ជូនសំណល់រឹង សំរាម ឲ្យបានទាន់ពេលវេលា ដើម្បីយកទៅចាក់ឲ្យដល់ទីលានចាក់សំរាម ដាច់ខាតមិនត្រូវបន្សល់ទុកគំនរសំរាម នៅតាមដងផ្លូវ និងទីសាធារណៈកុំឲ្យមានសេសសល់ឡើយ។
លោកអភិបាលរងខេត្តបញ្ជាក់ទៀតថា គ្រប់មន្ទីរអង្គភាព គ្រប់រដ្ឋបាលក្រុងស្រុក ឃុំ សង្កាត់ និងភូមិ ត្រូវនាំគ្នាចូលរួមលុបបំបាត់ភក់ជ្រាំ ដែលជាជម្រកសត្វមូស និងសំអាតសំណល់រឹងរាវ កាប់ល្បាស់ព្រៃជិតផ្ទះ នៅតាមដងផ្លូវលំ ផ្លូវជាតិដែលបាំងផ្លូវការធ្វើចរាចរណ៍ទៅមកជាដើម។
លោកជំទាវ ម៉ុម ថានី រដ្ឋលេខាធិកាក្រសួងបរិស្ថាន បានមានប្រសាសន៍ថា គោលបំណងរបស់គំរោងបង្កើតទីលានគ្រប់គ្រងសំណល់រឹងក្នុងក្រុងសិរីសោភ័ណនេះ គឺសំដៅឆ្លើយតបទៅនិងតម្រូវការរបស់រដ្ឋបាលក្រុង សម្រាប់គម្រោងកែលម្អការគ្រប់គ្រងបរិស្ថានទីក្រុង ជុំវិញបឹងទន្លេសាបជំហានទី ២ ដើម្បីធ្វើឲ្យប្រសើរឡើងនូវជីវភាពរស់នៅរបស់ប្រជាពលរដ្ឋ និងអនាម័យសាធារណៈ ការរៀបចំទីលានគ្រប់គ្រងសំណល់រឹង ដែលមានប្រសើរជាងនិងល្អជាងទីលានចាក់សំរាមចាស់។
ការសម្អាតទឹកសំណង់ក្នុងក្រុងតាមរយៈការរៀបចំប្រព័ន្ធអាង ប្រតិកម្មសំណល់រាវ ដើម្បីចូលរួមលើកកម្ពស់សោភ័ណភាពក្នុងក្រុងសិរីសោភ័ណផងដែរ ដើម្បីធ្វើការប្រកួតប្រជែង ទីក្រុងស្អាតដោយប្រែក្លាយទីក្រុងនេះ ជាមជ្ឈមណ្ឌលសេដ្ឋកិច្ចតាមរយៈការកែលម្អហេថារចនាសម្ព័ន្ធ បរិស្ថានក្រុងផ្ដល់នូវហេដ្ឋារចនាសម្ព័ន្ធប្រទេសគ្រប់គ្រាន់សម្រាប់ទទួលភ្ញៀវទេសចរ ដែលមកលេងកំសាន្តក្នុងក្រុងស្រីសោភ័ណនេះផងដែរ៕
