គ្រួសារក្រីក្រចំនួន៦២គ្រួសារ នៅស្រុកកំពង់ត្រាច ទទួលបានប័ណ្ណសមធម៌ ពីរដ្ឋបាលខេត្តកំពត
ខេត្តកំពត៖ឯកឧត្តម ជាវ តាយ អភិបាល នៃគណៈអភិបាលខេត្តកំពត អមដំណើរដោយឯកឧត្តមសមាជិកក្រុមប្រឹក្សាខេត្ត គណៈអភិបាលខេត្ត ប្រធានមន្ទីរអង្គភាពជុំវិញខេត្ត និងគណៈអភិបាលស្រុក មន្ត្រីរាជការ សាលាស្រុកកំពង់ត្រាច កាលពីព្រឹកថ្ងៃសុក្រ ៤កើត ខែស្រាពណ៍ ឆ្នាំជូត ទោស័ក ព.ស២៥៦៤ ត្រូវនឹងថ្ងៃទី២៣ ខែកក្កដា ឆ្នាំ២០២០ បានអញ្ជើញចែកប័ណ្ណសមធម៌ជូនគ្រួសារក្រីក្រចំនួន៦២គ្រួសារ ស្ថិតនៅក្នុងភូមិទាំង៥ នៃឃុំស្វាយទងខាងត្បូង ស្រុកកំពង់ត្រាច ខេត្តកំពត។
នាឱកាសនោះឯកឧត្តម ជាវ តាយ បានមានប្រសាសន៍សំណេះសំណាលទៅកាន់បងប្អូនគ្រួសារក្រីក្រ ដែលមកទទួលប័ណ្ណសមធម៌ថា៖ ដោយមានការយកចិត្តទុកដាក់ និងការដឹកនាំដ៏ឈ្លាសវៃ ពីសំណាក់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានយកចិត្តទុកដាក់លើវិស័យសង្គមកិច្ច និងសេវាគាំពារសង្គម ជាពិសេសដំណាក់កាលឆ្លងរីករាលដាលនៃជំងឺ កូវីដ-១៩ ដែលធ្វើឲ្យប៉ះពាល់ដល់វិស័យជាច្រើន ជាពិសេសវិស័យសេវាកម្ម នាំឲ្យបាត់បង់ការងារខ្លះរបស់ប្រជាពលរដ្ឋ ដើម្បីជួយស្រោចស្រង់វិស័យនេះ សម្តេចបានបញ្ចេញនូវសាច់ប្រាក់ផ្តល់ជូនប្រជាពលរដ្ឋតាមរយៈការកំណត់អត្តសញ្ញាកម្មគ្រួសារក្រីក្រ។
ដោយឡែកនៅឃុំស្វាយទងខាងត្បូង ការកំណត់នូវអត្តសញ្ញាណកម្មគ្រួសារក្រីក្របានធ្វើឡើងត្រឹមត្រូវ មានតម្លាភាព និងមានសមធម៌ នៅក្នុងដំណាក់កាលកូវីដ-១៩ នេះ ជាលទ្ធផលក្រុមការងារកំណត់បាននូវគ្រួសារដែលក្រីក្រពិតប្រាកដចំនួន១១០គ្រួសារ ក្រប្រភេទ១ ចំនួន២៨គ្រួសារ ក្រប្រភេទ២ ចំនួន៨២គ្រួសារ អាជ្ញាធរឃុំ បានចែកប័ណ្ណជូនប្រជាពលរដ្ឋកន្លងមកបានចំនួន ៤៨គ្រួសាររួចមកហើយ និងនៅពេលនេះ ចែកជូនចំនួន៦២គ្រួសារបន្ថែមទៀត ដោយក្នុងនោះមាន ក្រប្រភេទ១ចំនួន៧គ្រួសារ និងក្រប្រភេទ២ចំនួន ៥៥គ្រួសារ។
ជាងនេះទៅទៀតឯកឧត្តមអភិបាលខេត្តបានជំរុញឲ្យបងប្អូនប្រជាពលរដ្ឋទាំងអស់នៅមូលដ្ឋានឃុំស្វាយទងខាងត្បូងនេះ ធ្វើការចិញ្ចឹមសត្វគ្រប់ប្រភេទ ពិសេសវារីវប្បកម្មឲ្យបានច្រើនឡើងទ្វេរដង ដើម្បីលើកស្ទួយជីវភាពរបស់បងប្អូន តាមអនុសាសន៍ណែនាំដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។
ជាមួយគ្នានោះដែរឯកឧត្តមអភិបាលខេត្តបានផ្តាំផ្ញើបងប្អូនគ្រួសារទាំងអស់ ដែលមកទទួលយកប័ណ្ណសមធម៌នាពេលនេះ សូមរក្សាទុកប័ណ្ណសមធម៌នេះឲ្យបានល្អ ព្រោះថាប័ណ្ណនេះ មិនត្រឹមតែអាចយកមកប្រើប្រាស់សម្រាប់បើកប្រាក់ប្រចាំខែនោះទេ ប័ណ្ណនេះអាចយកទៅប្រើប្រាស់តាមការចាំបាច់ដូចជា ការពិនិត្យ និងព្យាបាលសុខភាព នៅតាមមណ្ឌលសុខភាព ឬមន្ទីរពេទ្យដោយមិនគិតថ្លៃទៀតផង៕
