ក្រសួងសាធារណការ និងដឹកជញ្ជូន បន្តយុទ្ធនាការអប់រំផ្សព្វផ្សាយច្បាប់ ស្តីពីសុវត្ថិភាពចរាចរណ៍ផ្លូវគោក នៅខេត្តកណ្តាល
ខេត្តកណ្តាល៖នៅព្រឹកថ្ងៃទី២៣ ខែកក្កដា ឆ្នាំ២០២០ ក្រសួងសាធារណការ និងដឹកជញ្ជូន បានរៀបចំពិធីផ្សព្វផ្សាយអប់រំ ច្បាប់ស្តីអំពីសុវត្ថិភាពចរាចរណ៍ផ្លូវគោក។ពិធីនេះប្រព្រឹត្តទៅនៅមន្ទីរសាធារណការ និងដឹកជញ្ជូនខេត្តកណ្តាល ក្រោមវត្តមានលោកជំទាវ មឹន មាណវី រដ្ឋលេខាធិការ ក្រសួងសាធារណការ និងដឹកជញ្ជូន លោក នៃ ចារី អភិបាលរងខេត្តកណ្ដាល មន្ត្រីពាក់ព័ន្ធកងកំលាំងទាំងបី ប្រជាពលរដ្ឋ និងអាជ្ញាធរក្នុងក្រុងតាខ្មៅជាង២០០នាក់ផងដែរ។
លោក នៃ ចារី អភិបាលរងខេត្តកណ្ដាល បានមានប្រសាសន៍ថា សុវត្ថិភាពចរាចរណ៍ គឺជាផ្នែកមួយយ៉ាងសំខាន់ នៃសុខភាពសាធារណៈ ជាការងារចម្បងដែលទាមទារឲ្យមានការដោះស្រាយជាបន្ទាន់ ខណៈចំនួនមនុស្សស្លាប់ដោយគ្រោះថ្នាក់ចរាចរណ៍ នៅតែមានចំនួនខ្ពស់នឹងកើនឡើងយ៉ាងខ្លាំងជាបញ្ហាចាំបាច់ចំពោះមុខ ដែលត្រូវតែរួមគ្នា ដើម្បីដោះស្រាយពីព្រោះបញ្ហានេះមិនមែនជាភារកិច្ចផ្ដាច់មុខរបស់នរណាម្នាក់ឡើយ។
ជាមួយគ្នានោះដែរលោកអភិបាលរងខេត្ត បានអំពាវនាវដល់អ្នកបើកបរយានយន្តគ្រប់ប្រភេទ សូមចូលរួមអនុវត្តឲ្យបានខ្ជាប់ខ្ជួននូវវិធានការនានា ដែលបានចែងក្នុងច្បាប់ស្តីពីចរាចរណ៍ផ្លូវគោក ដូចជា មិនត្រូវបើកបរលើសល្បឿនកំណត់ គោរពសិទ្ធិអាទិភាព ផ្លាកសញ្ញាចរាចរណ៍ ប្រកាន់ស្ដាំ មិនវ៉ាជែងក្នុងស្ថានភាពគ្រោះថ្នាក់ ហើយបើស្រវឹងសូមកុំបើកបរ ដើម្បីរួមគ្នាកាត់បន្ថយគ្រោះថ្នាក់ចរាចរ កាត់បន្ថយចំនួនអ្នកស្លាប់ អ្នករងរបួស អ្នកពិការ និងការខូចខាតនានា ដែលបង្កដោយសារគ្រោះថ្នាក់ចរាចរណ៍។
ថ្លែងក្នុងឱកាសនោះដែរ លោកជំទាវ មឹន មាណវី រដ្ឋលេខាធិការ ក្រសួងសាធារណការ បានគូសបញ្ជាក់ថា គោលបំណង នៃការរៀបចំយុទ្ធនាការអប់រំផ្សព្វផ្សាយនេះ គឺដើម្បីជាការពញ្ញាក់ស្មារតីដល់អ្នកប្រើប្រាស់ផ្លូវទាំងអស់ ជាពិសេសអ្នកប្រើប្រាស់ទោចក្រយានយន្ត ឱ្យយកចិត្តទុកដាក់ និងចូលរួមគោរពច្បាប់ស្តីពីចរាចរណ៍ផ្លូវគោក សំដៅចូលរួមទប់ស្កាត់ និងកាត់បន្ថយគ្រោះថ្នាក់ចរាចរណ៍ផ្លូវគោកឲ្យនៅកម្រិតទាបបំផុត។
លោកជំទាវបានបញ្ជាក់បទៀតថា ឆ្នាំ២០២០នេះ គឺរាជរដ្ឋាភិបាលបានកំណត់យកជាឆ្នាំ នៃការរឹតបន្តឹងការអនុវត្តច្បាប់ស្តីពីចរាចរណ៍ផ្លូវគោក ដើម្បីជាការទប់ស្កាត់ និងកាត់បន្ថយឱ្យបានអតិបរមានូវកំណើនគ្រោះថ្នាក់ចរាចរណ៍ កំណើនអ្នកស្លាប់ និងរបួសដោយគ្រោះថ្នាក់ចរាចរណ៍ផ្លូវគោក ដោយបានចាប់អនុត្តការរឹតបន្តឹងការអនុវច្បាប់ស្តីពីចរាចរណ៍ផ្លូវគោក ចាប់តាំងពីថ្ងៃទី០១ ខែឧសភា ឆ្នាំ២០២០តទៅ។ដូច្នេះយើងទាំងអស់គ្នាត្រូវតែរួមគ្នាអនុវត្តច្បាប់ចរាចរណ៍នេះ ឱ្យមានប្រសិទ្ធភាព ដើម្បីជៀសផុតពីការអាផាកពិន័យធ្ងន់ធ្ងរ។
ជាងនេះទៅទៀតលោកជំទាវ បានជម្រុញឲ្យអ្នកចូលរួមទាំងអស់ លើកឡើងជាសួរ ទាក់ទងនឹងសុវត្ថិភាពចរាចរណ៍ផ្លូវគោក ហើយក៏បានលើកទឹកចិត្តដល់ យុវជនឲ្យរៀនអំពីវិធីប្រើប្រាស់កម្មវិធីអប់រំច្បាប់ស្តីពីចរាចរណ៍ផ្លូវគោក (Cambodia Driving Rules) ដែលជាកម្មវិធីមួយងាយស្រួលសម្រាប់បងប្អូនប្រជាពលរដ្ឋ អាចធ្វើការរៀនសូត្រអំពីច្បាប់ស្តីពីចរាចរណ៍ផ្លូវគោក និងអាចប្រលងសាកល្បងសមត្ថភាពរបស់ខ្លួនបានផងដែរ ពីព្រោះកម្មវិធីនេះជាកម្មវិធីអេឡិចត្រូនិច ដែលអាចទាញយកបានពី app store និង play store អាចដំណើរការបានលើទូរស័ព្ទដៃស្មាតហ្វូន ទាំងប្រព័ន្ធ android និងប្រព័ន្ធ ios។
ក្នុងពិធីនេះក៏មានការចែកជូននូវមួកសុវត្ថិភាព សៀវភៅច្បាប់ស្តីពីចរាចរណ៍ផ្លូវគោក សៀវភៅអ្វីដែលអ្នកបើកបរទោចក្រយានយន្ត ត្រូវយល់ដឹងប័ណ្ណជំនួយស្មារតីស្តីពីសុវត្ថិភាពចរាចរណ៍ ដល់អ្នកចូលរួមផងដែរ។
លោក ម៉ឹង យូឡេង ប្រធានមន្ទីរសាធារណការ និងដឹកជញ្ជូនខេត្តកណ្ដាលបានឲ្យដឹងថា គិតត្រឹមពេលនេះមន្ទីរបានចុះបញ្ជី យានយន្ត ទេសចរណ៍បានចំនួន៥១៤គ្រឿង រថយន្តដឹកទំនិញធុនតូចបានចំនួន២៦០គ្រឿង រថយន្តដឹកទំនិញធុនធំបានចំនួន៣៧៨គ្រឿង រថយន្តដឹកអ្នកដំណើរធុនតូចបានចំនួន៧១គ្រឿង រថយន្តដឹកអ្នកដំណើរធុនធំបានចំនួន៤គ្រឿង ទោចក្រយានយន្តបានចំនួន២៣៩០គ្រឿង ត្រីចក្រយានយន្តបានចំនួន៣៣៩គ្រឿង។បានផ្ដល់ប័ណ្ណយានយន្តប្រភេទ ក ចំនួន ១១២២បណ្ណ ប្រភេទ ខ ចំនួន៧៦៥៥បណ្ណផងដែរ៕
