អភិបាលខេត្តកណ្ដាល អញ្ជើញចុះសម្រុះសម្រួលជាមួយកម្មករ កម្មការិនី រោងចក្រ ថៃ យ៉ា ហ្គាមេន អ៊ិនដាសស្ទ្រី ខូអិលធីឌី នៅស្រុកពញាឮ
ខេត្តកណ្ដាល៖បន្ទាប់ពីទទួលបានដំណឹងថា កម្មកររោងចក្រ ថៃ យ៉ា ហ្គាមេន អ៊ិនដាសស្ទ្រី ខូអិលធីឌី ប្រមាណជា១០០០នាក់ បានធ្វើការដង្ហែក្បួនចេញពីរោងចក្រ ស្ថិតនៅឃុំព្រែកតាទែន ស្រុកពញាឮ ខេត្តកណ្តាល ឆ្ពោះទៅរាជធានីភ្នំពេញ ដើម្បីទាមទារនូវប្រាក់ឈ្នួល និងប្រាក់អត្ថប្រយោជន៍នានា តាមការសន្យា បន្ទាប់រោងចក្រត្រូវបានបិទទ្វារកាលពីដើមខែកក្កដាកន្លងទៅនេះ កាលពីព្រឹកថ្ងៃទី១៥ ខែកក្កដា ឆ្នាំ២០២០ ឯកឧត្ដម គង់ សោភ័ណ្ឌ អភិបាលខេត្តកណ្ដាល បានដឹកនាំក្រុមការងារខេត្ត ដោយមានការអញ្ជើញចូលរួមពី តំណាងក្រសួងការងារបណ្ដុះបណ្ដាលវិជ្ជាជីវៈ តំណាងក្រុមហ៊ុន និងអាជ្ញាធរមូលដ្ឋាន បានចុះសម្រុះសម្រួល ជាមួយបងប្អូនកម្មករ កម្មការិនី រោងចក្រ ជាមួយក្រុមហ៊ុន នៅសាលាស្រុកពញាឮ។
ក្នុងជំនួបនេះដំណាងកម្មកររោងចក្រ បានលើកឡើងនូវ សំណូមពរចំនួន៤រួមមានៈ
១-ប្រាក់ឈ្នួលចុងក្រោយដែលមិនទាន់បានបើក។
២-ប្រាក់ជួសការឈប់សម្រាកប្រចាំឆ្នាំដែលនៅសល់។
៣-ប្រាក់បំណាច់រំលឹកអតីតភាពការងារ និងប្រាក់បំណាច់អតីតភាពការងារ។
៤-ក្រុមហ៊ុនផ្ដល់ប្រាក់សម្រាប់ជប់លៀង លាគ្នា ចំនួន៣៥% នៃប្រាក់ខែ១៩០ដុល្លារ។
បន្ទាប់ពីជួបពិភាក្សាគ្នា រវាងក្រុមហ៊ុន និងកម្មករ ដោយមានការសម្របសម្រួលពីឯកឧត្ដមអភិបាលខេត្ត បានធ្វើការឯកភាពគ្នា នូវចំណុចចំនួន៥៖
១/ភាគីក្រុមហ៊ុននឹងបើកប្រាក់ឈ្នួលចុងក្រោយដែលមិនទាន់បានបើកជូនដល់កម្មករ និយោជិតទាំងអស់
២/ភាគីក្រុមហ៊ុន នឹងបើកប្រាក់ជួសការឈប់សម្រាកប្រចាំឆ្នាំដែលនៅសល់
៣/ភាគីក្រុមហ៊ុននឹងបើកប្រាក់ដំណាច់រំលឹកអតីភាពការងារ និងប្រាក់បំណាច់អតីភាពការងារឆ្នាំ២០២០
៤/ភាគីក្រុមហ៊ុននឹងផ្តល់ប្រាក់សម្រាប់ជប់លៀង លាគ្នា ចំនួន ៣៥% នៃប្រាក់ខែគោល តាមការសន្យាជាមួយកម្មករ និយោជិតកន្លងមក។
៥/ក្រុមហ៊ុននឹងបិទផ្សាយបញ្ជីបើកប្រាក់ឈ្នួល និងអត្ថប្រយោជន៍ផ្សេងៗនៅថ្ងៃទី១៨ ខែកក្កដា ឆ្នាំ២០២០ និងបើកផ្តល់ជូនកម្មករនិយោជិត នៅថ្ងៃទី២១ ខែកក្កដា ឆ្នាំ២០២០ខាងមុខនេះ៕
