ថៃអនុញ្ញាតឲ្យរថយន្ត៥០គ្រឿងក្នុង១ថ្ងៃចេញចូល ដឹកទំនិញតាមការចាំបាច់ និងអាជីវករផ្សាររោងក្លឿតែមានលក្ខខណ្ឌ
ខេត្តបន្ទាយមានជ័យ៖នៅថ្ងៃទី១៥ ខែកក្កដា ឆ្នាំ២០២០ខាងមុខនេះ ភាគីខាងថៃបានអនុញ្ញាតឲ្យរថយន្តចំនួន៥០គ្រឿងក្នុង១ថ្ងៃចេញ ចូលដឹកទំនិញតាមការចាំបាច់តាមការកំណត់ និងអាជីវករផ្សាររោងក្លឿក៏ឲ្យចូលដែរតែមានលក្ខខណ្ឌ របស់អាជ្ញាធរថៃ ហើយក្នុងរថយន្ត១គ្រឿងអនុញ្ញាត្តិឲ្យមានមនុស្សតែ២នាក់ក្នុងនោះមានអ្នកបើក និងព្រូ។នេះបើតាមការអះអាងរបស់លោក ង៉ោ ម៉េងជ្រូន អភិបាលរងខេត្តបន្ទាយមានជ័យ ថ្លែងក្នុងកិច្ចប្រជុំក្នុងសាលាខេត្ត ដោយមានការចូលរួមមន្ត្រីពាក់ព័ន្ធមានដូចជា មន្ទីរសុខាភិបាល គយ មេច្រក អន្តោប្រវេសន៍នៅព្រឹកថ្ងៃទី១០ ខែកក្កដា ឆ្នាំ២០២០។
លោក ង៉ោ ម៉េងជ្រូន បានបញ្ជាក់ថា អ្នកបើកបររថយន្ត និងអ្នករួមដំណើរសូមអនុវត្តតាមច្បាប់ឆ្លងដែន ត្រូវបង្ហាញឯកសារចេញ និងចូលប្រទេសរហូតទាល់តែបានធ្វើលិខិតបញ្ជាក់ពីទំនិញនិងបញ្ជាក់ពីកន្លែងចំណតនិងទីតាំងបញ្ជូនទំនិញឲ្យបានជាក់លាក់។ចំពោះអ្នកធ្វើដំណើរចូលមកដឹកទំនិញត្រូវមានអ្នកបើកមួយនាក់ នឹងអ្នករួមដំណើរជាមួយនាក់ អ្នកដំណើរដែលចូលមកត្រូវពាក់ឧបករណ៍ការពារ តាមការណែនាំរបស់ក្រសួងសុខាភិបាល ដូចជា ត្រូវពាក់ម៉ាសឲ្យបានជាច្រចាំ វាស់កំដៅសិន ទើបអនុញ្ញាតឲ្យធ្វើដំណើរឆ្លងកាត់ បែបបទក្នុងការស្នើរសុំ អនុញ្ញាតឆ្លងកាត់ សេចក្តីលំអិតទាក់ទងនិងយានយន្ត តម៉២ រាយនាមអ្នកបើកយានយន្តតម៉៤ បែបបទ តម៉៨ លិខិតបញ្ជាក់ពីការបញ្ជូនទំនិញ មានឯកសារឆ្លងដែន មានលិខិតឆ្លងដែន ប័ណ្ណព្រំដែន និងប័ណ្ណឆ្លងដែនបណ្ណោះអាសន្ន។
លោកបានបញ្ជាក់ទៀតថា រថយន្តទាំង៥០គ្រឿងនោះ ត្រូវគោរពតាមពេលវេលាដែលត្រូវឆ្លងកាត់ចាប់ពីម៉ោង៨ព្រឹក ធ្វើដំណើរត្រឡប់មកវិញនៅវេលាម៉ោង១ថ្ងៃត្រង់ ក្នុងមួយថ្ងៃជាកំហិតយាន្តយន្តចេញចូលមិនលើសពី៥០គ្រឿងជាដាច់ខាត។រថយន្តទាំង៥០គ្រឿងនោះអាចចូលធ្វើដំណើរក្នុងមួយថ្ងៃបានតែផ្សារមួយប៉ុណ្ណោះ១គឺផ្សារអិនឌូចិន ២ផ្សារហ្គោលឌិន grand ៣គឺផ្សារអបច ៤គឺផ្សារបេនចាក់វ៉ាន់ ៥គឺផ្សាររ៉ាក់តាក់ណាក់ថាំ ៦ផ្សារដេតថៃ។
លោកបានបញ្ជាក់ទៀតថា ចំពោះប្រជាជនកម្ពុជា ដែលចូលមកដឹកទំនិញក្នុងមួយថ្ងៃៗ សូមចូលតាមផ្លូវដែលបានកំណត់ជូនយ៉ាងតឹងរ៉ឹង និងអនុញ្ញាតឲ្យស្ថិតក្នុងបរិវារវេន របស់ខ្លួនប៉ុណ្ណោះ ព្រមទាំងមានការកំណត់ពេលវេលាជាក់លាក់ សម្រាប់ដឹកជញ្ជូនទំនិញរបស់ខ្លួន អោយទាន់តាមពេលវេលាកំណត់សកម្មភាពនិងការណែនាំដែលគួរអនុវត្ត អនុញ្ញាតចំពោះតែការដឹកជញ្ជូនទំនិញនៅក្នុងផ្សាររោងក្លឿ តាមទីតាំងដែលបានអនុញ្ញាត និងមិនត្រូវធ្វើដំណើរចេញពីបរវេន ដែលបានកំណត់ជូនជាដាច់ខាត ពេលដែលចូលមកក្នុងបរវេនផ្សាររោងក្លឿ ដែលអនុញ្ញាត និងមិនអនុញ្ញាតបុគ្គល ដែលមិនពាក់ព័ន្ធចូលមកក្នុងបរវេនផ្សារ ដែលអនុញ្ញាតជាដាច់ខាត។
ចំពោះម្ចាស់តូបទំនិញមុននឹងធ្វើដំណើរត្រឡប់ទៅវិញសូមពិនិត្យ និងបិទប្រព័ន្ធភ្លើងឲ្យបានត្រឹមត្រូវ មុននឹងចាកចេញ ដើម្បីជាវៀនមានអគ្គិសនីឆាបឆេះ ប្រសិនបើមានការល្មើស នឹងច្បាប់ឬបទបញ្ជាភ្នាក់ងារប្រតិបត្តិ មានតួនាទីប្រចាំការនិងធ្វើការបញ្ឈប់សកម្មភាពនេះភ្លាមៗ៕
