រដ្ឋសភាបន្តសម័យប្រជុំលើកទី៤ នីតិកាលទី៦ ដើម្បីពិភាក្សា និងអនុម័តសេចក្តីព្រាងច្បាប់ចំនួនពី
រាជធានីភ្នំពេញ៖នាព្រឹកថ្ងៃទី៥ ខែមិថុនា ឆ្នាំ២០២០ រដ្ឋសភានៃព្រះរាជាណាចក្រកម្ពុជា បានបន្តសម័យប្រជុំរដ្ឋសភា លើកទី៤ នីតិកាលទី៦ ក្រោមអធិបតីភាពដ៏ខ្ពង់ខ្ពស់ សម្ដេចអគ្គមហាពញាចក្រី ហេង សំរិន ប្រធានរដ្ឋសភា ដោយមានវត្តមានសមាជិក សមាជិការដ្ឋសភា ចូលរួមចំនួន១១១រូប ដើម្បីពិភាក្សា និងអនុម័តសេចក្តីព្រាងច្បាប់ចំនួនពីរ គឺសេចក្តីព្រាងច្បាប់ស្តីពីការជួយគ្នាទៅវិញទៅមកផ្នែកច្បាប់ ក្នុងវិស័យព្រហ្មទណ្ឌ និងសេចក្តីព្រាងច្បាប់ស្តីពីការអនុម័តយល់ព្រមឱ្យព្រះរាជាណាចក្រកម្ពុជា ចូលជាភាគីនៃអនុសញ្ញាទីក្រុងប៊ែន ស្តីពីកិច្ចការពារស្នាដៃអក្សរសាស្រ្តនិងសិល្បៈឆ្នាំ១៨៨៦និងវិសោធនកម្មឆ្នាំ១៩៧៩។
បើយោងតាមផេករបស់សម្តេចប្រធានរដ្ឋសភា បញ្ជាក់ថា សេចក្តីព្រាងច្បាប់ស្តីពីការជួយគ្នាទៅវិញទៅមកផ្នែកច្បាប់ ក្នុងវិស័យព្រហ្មទណ្ឌ គឺជាយន្តការសំខាន់ក្នុងក្របខណ្ឌ នៃកិច្ចសហប្រតិបត្តិការអន្តរជាតិផ្នែកច្បាប់ព្រហ្មទ័ណ្ឌ នៃព្រះរាជាណាចក្រកម្ពុជា ជាមួយបណ្តាប្រទេសនានា ទាំងក្របខ័ណ្ឌទ្វេភាគី ពហុភាគី ពិសេសទាក់ទងនឹងការធ្វើបត្យាប័ន ការផ្ទេរទណ្ឌិត និងការជួយគ្នាទៅវិញទៅមក ផ្នែកច្បាប់ក្នុងវិស័យព្រហ្មទណ្ឌ។លើសពីនេះ ដើម្បីចូលរួមចំណែកក្នុងការប្រយុទ្ធប្រឆាំងនឹងបទល្មើសព្រហ្មទណ្ឌ ឧក្រិដ្ឋកម្មឆ្លងដែន អំពើភារវកម្ម ការសម្អាតប្រាក់ និងហិរញ្ញប្បទាន ដោយឈរលើគោលការណ៍នៃការគោរព អធិបតេយ្យ និងផលប្រយោជន៍គ្នាទៅទៅមក។
ចំពោះសេចក្តីព្រាងច្បាប់ស្តីពី ការអនុម័តយល់ព្រមឱ្យព្រះរាជាណាចក្រកម្ពុជា ចូលជាភាគីនៃអនុសញ្ញាទីក្រុងប៊ែន ស្តីពីកិច្ចការពារស្នាដៃអក្សរសាស្រ្ត និងសិល្បៈឆ្នាំ១៨៨៦ និងវិសោធនកម្មឆ្នាំ១៩៧៩។អនុសញ្ញាទីក្រុងប៊ែនស្តីពីកិច្ចការពារស្នាដៃអក្សរសាស្រ្ត និងសិល្បៈជាមូលដ្ឋានគ្រឹះនៃក្របខ័ណ្ឌច្បាប់កម្មសិទ្ធិបញ្ញាអន្តរជាតិផ្នែកអ្នកនិពន្ធ ធានាចំពោះកិច្ចការពារស្នាដៃរបស់អ្នកនិពន្ធជាពលរដ្ឋ នៃប្រទេសទំាងឡាយ ដែលជាសមាជិកនៃសហភាពដោយពុំមានការរើសអើងនិងស្មើភាពគ្នា។
កម្ពុជានឹងទទួលផលចំណេញពីសេចក្តីព្រាងច្បាប់នេះ ដោយមិនតម្រូវឱ្យបង់កម្រៃ កិច្ចការពារ ស្នាដៃរបស់អ្នកនិពន្ធ អ្នកបង្កើតស្នាដៃ និងសិទ្ធិប្រហាក់ប្រហែលថ្មី ឧស្សាហកម្មឆ្នៃប្រឌិត បន្ថែមលើការទាក់ទាញទេសចរណ៍ ការបង្កើតការងាររួមចំណែកកាត់បន្ថយភាពក្រីក្រ ព្រមទាំងជំរុញលើកតម្កើនអត្តសញ្ញាណ ប្រពៃណី វប្បធម៌ និងកិត្យានុភាពជាតិកាន់តែទូលំទូលាយថែមទៀត លើឆាកអន្តរជាតិ៕
