ចាប់ឃាត់ខ្លួនយុវជន១នាក់ ពាក់ពន្ធ័ករណីលួចម៉ូតូ នៅភូមិក្បាលកោះ ក្រុងប៉ោយប៉ែត
ខេត្តបន្ទាយមានជ័យ៖នៅវេលាម៉ោង១១និង៣០នាទី ថ្ងៃទី២២ ខែមិថុនា ឆ្នាំ២០២០ ប្រជាការពារភូមិក្បាលកោះ ក្រុងប៉ោយប៉ែត បានធ្វើការឃាត់ខ្លួនយុវជនម្នាក់ ឈ្មោះ ម៉ា តូ អាយុ២៤ឆ្នាំ រស់នៅភូមិវត្តរំដួល ឃុំចំការសំរោង ស្រុកបាត់ដំបង ខេត្តបាត់ដំបង បច្ចុប្បន្នស្នាក់នៅតាមបង់ចិញ្ចើមផ្លូវសាធារណៈ បញ្ជូនទៅឲ្យកម្លាំងកងរាជអាវុធហត្ថក្រុងប៉ោយប៉ែត ដើម្បីចាត់ការបន្តតាមនិតិវិធី បន្ទាប់ពីយុវជនរូបនេះ បានធ្វើសកម្មភាពលួចម៉ូតូគេ ១គ្រឿងម៉ាកហ្សូមើ(ZOME) ពណ៌លឿងលាយខ្មៅ អត់ស្លាកលេខ ដោយអូសចេញពីកន្លែងផ្សេង មកទុកនៅហ្នឹងស្ថានីយ៍រថភ្លើង ក្រុងប៉ោយប៉ែត ខេត្តបន្ទាយមានជ័យ។
សមត្ថកិច្ចបានឲ្យដឹងថា មុនកើតហេតុជនសង្ស័យ បានធ្វើសកម្មភាពអូសម៉ូតូគេ ចេញពីកន្លែងផ្សេង មកទុកនៅហ្នឹងស្ថានីយ៍រថភ្លើង ក្រុងប៉ោយប៉ែត ដោយប្រជាការពារភូមិក្បាលកោះ មានការសង្ស័យក៏ឃាត់សួរនាំ ទើបដឹងថាយុវជនម្នាក់នេះជាអ្នកលួចម៉ូតូរបស់គេមែន បន្ទាប់មកក៏ធ្វើការឆែកឆេរកឃើញមានលុយជាច្រើនមានទាំងដុល្លារ លុយបាតប្រាក់ថៃ លុយចិន តែលុយទាំងនោះសុទ្ធសឹងតែជាលុយក្លែងក្លាយទាំងអស់ រួចក៏ឃាត់ខ្លួនប្រគល់ឲ្យកម្លាំងកងរាជអាវុធហត្ថក្រុងតែម្តង។
បច្ចុប្បន្នជនសង្ស័យរួមនឹងវត្ថុតាង ត្រូវបានកម្លាំងកងរាជអាវុធហត្ថ នាំខ្លួនទៅសួរនាំបន្តនៅមូលដ្ឋានកងរាជអាវុធហត្ថក្រុងប៉ោយប៉ែត និងស្រាវជ្រាវរកម្ចាស់ម៉ូតូ ដើម្បីឲ្យមកទទួលយកត្រឡប់ទៅវិញ៕
