រដ្ឋបាលខេត្តកំពត បើកកិច្ចប្រជុំគណៈបញ្ជាការឯកភាព ប្រចាំខែមិថុនា ឆ្នាំ២០២០
ខេត្តកំពត៖ឯកឧត្តម ជាវ តាយ អភិបាល នៃគណៈអភិបាលខេត្តកំពត និងជាប្រធានគណៈបញ្ជាការឯកភាពរដ្ឋបាលខេត្ត កាលពីព្រឹក ថ្ងៃអង្គារ ១១រោច ខែជេស្ឋ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី១៦ ខែមិថុនា ឆ្នាំ ២០២០ បានដឹកនាំកិច្ចប្រជុំគណៈបញ្ជាការឯកភាពរដ្ឋបាលខេត្ត ដោយមានការអញ្ជើញចូលរួមពីឯកឧត្តម លោកជំទាវអភិបាលរងខេត្ត លោកប្រធានសាលាដំបូងខេត្ត លោកព្រះរាជអាជ្ញា លោក លោកស្រី នាយក នាយករងរដ្ឋបាលសាលាខេត្ត លោក លោកស្រីនាយក នាយករងទីចាត់ការ ប្រធាន អនុប្រធានអង្គភាពចំណុះសាលាខេត្ត និងកងកម្លាំងទាំងបី ព្រមជាមួយកងកម្លាំងដែលមានមូលដ្ឋានក្នុងខេត្តកំពត សរុប៧៩នាក់។
កិច្ចប្រជុំនេះបានដាក់ចេញនូវរបៀបវារៈរួមមាន៖
១-ពិនិត្យពិភាក្សាលើសេចក្ដីព្រាង កំណត់ហេតុគណៈបញ្ជាការឯកភាពរដ្ឋបាលខេត្ត លើកទី២៥ កាលពីថ្ងៃទី១៥ ខែឧសភា ឆ្នាំ២០២០។
២-ពិនិត្យពិភាក្សា លើរបាយការណ៍គណៈបញ្ជាការឯកភាពរដ្ឋបាលខេត្តប្រចាំខែឧសភា ឆ្នាំ២០២០។
៣-សេចក្ដីរាយការណ៍របស់លោកស្នងការនគរបាលខេត្ត ពាក់ព័ន្ធ នឹងការងារអនុវត្តច្បាប់ចរាចរណ៍ផ្លូវគោគ បញ្ហាគ្រឿងញៀន និងការអនុវត្តគោលនយោបាយភូមិឃុំមានសុវត្ថិភាព។
៤-ពិនិត្យពិភាក្សាលើលិខិតលេខ ០៨១ អ/គ.អ.ឆ.ក ចុះថ្ងៃទី០៩ ខែមិថុនា ឆ្នាំ២០២០ របស់គណៈកម្មាធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា ស្តីពីករណីបូមខ្សាច់លុបអាងស្តុកទឹក ឬស្រែអ៊ូ សម្រាប់ផលិតអំបិល នៅមណ្ឌលបឹងទូក ភូមិទទឹងថ្ងៃ ឃុំបឹងទូក ស្រុកទឹកឈូ ខេត្តកំពត។
៥-ពិនិត្យពិភាក្សាលើលិខិតលេខ ៩៨៣ MISTI/២០២០ ចុះថ្ងៃទី១៥ ខែឧសភា ឆ្នាំ២០២០ របស់ក្រសួងឧស្សាហកម្ម វិទ្យាសាស្ត្រ បច្ចេកទេស និងនវានុវត្តន៍ ស្តីពីសំណើសុំការអន្តរាគមន៍ក្នុងការចុះពិនិត្យ វាស់វែង និងកំណត់ព្រំដីជាក់ស្តែង លើអតីតព្រលានយន្តហោះ ទំហំ ៥ហិកតា ស្ថិតនៅភូមិអូរតូច សង្កាត់អណ្តូងខ្មែរ ក្រុងកំពត ខេត្តកំពត ដែលរាជរដ្ឋាភិបាលបានប្រគល់ជូន ក្រសួងឧស្សាហកម្ម វិទ្យាសាស្ត្រ បច្ចេកទេស និងនវានុវត្តន៍ (អតីតក្រសួងឧស្សាហកម្ម និងសិប្បកម្ម) សម្រាប់ការអភិវឌ្ឍគម្រោងវិនិយោគពង្រីកការផ្គត់ផ្គង់ទឹកស្អាតនៅខេត្តកំពត និងជួយដោះស្រាយសំណង់ខុសច្បាប់នៅលើទីតាំងដីនេះ ។
៦-សេចក្ដីរាយការណ៍របស់ ឯកឧត្តម សេង សិរីបុត្រ អភិបាលរងខេត្ត ពាក់ព័ន្ធដីអតីតសកលវិទ្យាល័យនរាយណ៍ ស្ថិតនៅឃុំនរាយណ៍ ស្រុកឈូក។
៧-សេចក្ដីរាយការណ៍របស់លោក-លោកស្រីអភិបាលនៃគណៈអភិបាលក្រុង ស្រុក ។
៨- ផ្សព្វផ្សាយលិខិតលេខ ១៣៦៥ សក.នដជ ចុះថ្ងៃទី០៩ ខែមេសា ឆ្នាំ២០២០ របស់ក្រសួងសាធារណការ និងដឹកជញ្ជូន ស្តីពីការទប់ស្កាត់ការរំលោភចាក់ដីបិទផ្លូវទឹក លូ ប្រឡាយ ព្រែក ស្ទឹង បឹង អូរ ត្រពាំង៕
