ផឹកចំស្រា បំផ្លាញទ្រព្យសម្បត្តិក្នុងផ្ទះ ត្រូវបានកម្លាំងនគរបាលប៉ុស្តិ៍ព្រែកលួង ចាប់វាយខ្នោះ
ខេត្តកណ្តាល៖បុរសម្នាក់ចេញពីផឹកស៊ីស្រវឹងជោគជាំរករឿងម្តាយ និងបោកបំផ្លាញទ្រព្យសម្បត្តិក្នុងផ្ទះ ព្រមទាំងយកដបសាំងចាក់នៅមុខផ្ទះកន្លែងដាំបាយបម្រុងកេះដែកកេះដុត តែត្រូវបងប្អូនអ្នកជិតខាងជួយចាប់ទាន់នោះ ត្រូវបានកម្លាំងនគរបាលស្រុកខ្សាច់កណ្តាល ចាប់ឃាត់ខ្លួន កាលពីវេលាម៉ោងជាង៦ល្ងាច ថ្ងៃទី០៧ ខែឧសភា ឆ្នាំ២០២០ នៅចំណុចភូមិព្រែកថោង ឃុំព្រែកលួង ស្រុកខ្សាច់កណ្តាល ខេត្តកណ្តាល។
សមត្ថកិច្ចបានឲ្យដឹងថា ជនសង្ស័យដែលត្រូវឃាត់ខ្លួនមានឈ្មោះ ឆុន ម៉ិច ភេទប្រុស អាយុ៣៣ឆ្នាំ ជនជាតិខ្មែរ មុខរបរ មិនពិតប្រាកដ មានទីលំនៅក្នុងភូមិ-ឃុំ កើតហេតុខាងលើ។
សមត្ថកិច្ចបញ្ជាក់ថា ជនសង្ស័យជាមុខសញ្ញាធ្លាប់ប្រើប្រាស់គ្រឿងញៀន និងប្រព្រឹត្តអំពើហិង្សាក្នុងគ្រួសារ ហើយនៅវេលាកើតហេតុ ជនសង្ស័យបានផឹកស្រាស្រវឹងជោគ ពេលមកដល់ផ្ទះបានរករឿងម្តាយ ហើយយកកៅអីបោកចោល ព្រមទាំងផ្តួលម៉ូតូទៅដី បណ្តាលឲ្យបែកបាក់ បន្ទាប់មក បានយកប្រេងសាំង មកចាក់នៅមុខផ្ទះ កន្លែងដាំបាយអស់ចំនួន១ដប រួចយកដែកកេះគូសបម្រុងដុត តែត្រូវបានបងប្អូនអ្នកជិតខាងចាប់ឃាត់ ពេលនោះឪពុកជនសង្ស័យ បានទៅប្តឹងប៉ុស្តិ៍នគរបាលរដ្ឋបាលព្រែកលួងឲ្យជួយអន្តរាគមន៍។
ក្រោយទទួលបានព័ត៌មាននេះភ្លាម កម្លាំងនគរបាលប៉ុស្តិ៍ព្រែកលួង បានចុះទៅឃាត់ខ្លួនជនសង្ស័យ បញ្ជូនមកអធិការដ្ឋាននគរបាលស្រុកខ្សាច់កណ្តាល ដើម្បីចាត់ការតាមនីតិវិធី៕
