ពលករខ្មែរចំនួន៦៧នាក់ លួចឆ្លងដែនខុសច្បាប់ ត្រូវបានកម្លាំងសមត្ថកិច្ចចម្រុះឃាត់ខ្លួនមកអប់រំ និងធ្វើកិច្ចសន្យា
ខេត្តបាត់ដំបង៖កម្លាំងសមត្ថកិច្ចចម្រុះខេត្តបាត់ដំបង ឃាត់ខ្លួនប្រជាពលរដ្ឋខ្មែរប្រុស ស្រីចំនួន៦៧នាក់ មកអប់រំ និងធ្វើកិច្ចសន្យា បន្ទាប់ពីបម្រុងឆ្លងដែនខុសច្បាប់តាមច្រករបៀងរបស់ប៉ុស្តិ៍វរសេនាតូចការពារព្រំដែនគោក ស្វាយចេក៨១៩កាលពីថ្ងៃទី១៤ ខែឧសភា ឆ្នាំ២០២០។
ពលករខ្មែរប្រុសស្រីដែលមានបំណងលួចឆ្លងដែនតាមច្រករបៀងខុសច្បាប់ ដែលត្រូវបានកម្លាំងសមត្ថកិច្ចប្រចាំការនៅប៉ុស្តិ៍ចំណុចខាងលើ ធ្វើការឃាត់ដើម្បីយកមកសាកសួរ និងធ្វើកិច្ចសន្យានោះមានចំនួន៦៧នាក់ ក្នុងនោះមានប្រុស២៦នាក់ ស្រី៣០នាក់ និងក្មេង០៤នាក់។
បើតាមសមត្ថកិច្ចបានឲ្យដឹងថា ពលករខ្មែរទាំង៦៦នាក់មកពីបណ្តាលខេត្តចំនួន៩រួមមានៈ
ខេត្តបាត់ដំបងចំនួន២៤នាក់,ខេត្តសៀមរាបចំនួន២០នាក់,ខេត្តព្រៃវែងចំនួន០៧នាក់,ខេត្តត្បូងឃ្មុំចំនួន០៦នាក់,ខេត្តកំពតចំនួន០៤,ភ្នំពេញ០១នាក់,ខេត្តកំពង់ចាម០៣នាក់,ខេត្តក្រចេះ០១នាក់និងខេត្តកំពង់ធំ០១នាក់។
សមត្ថកិច្ចបន្តថា ក្រោយពីឃាត់ខ្លួនបានបញ្ជូនទៅកាន់ប៉ុស្តិ៍វរៈសេនាតូចការពារព្រំដែនគោកលេខ៨១៩ ស្វាយចេក និងបានធ្វើការអប់រំនិងកិច្ចសន្យា ដើម្បីឲ្យពួកគាត់បញ្ឈប់ការលួចឆ្លងដែនដោយខុសច្បាប់ ខណៈដែលប្រទេសថៃកំពុងតែរឹតបន្តឹង ដើម្បីទប់ស្កាត់នូវការរីករាលដាលមេរោគកូវីដ១៩
និងបានឲ្យពួកគាត់វិលត្រឡប់ទៅលំនៅឋានរៀងៗខ្លួនវិញ។
អាជ្ញាធរក៏ដូចសមត្ថកិច្ចក្នុងមូលដ្ឋានអំពាវនាវឲ្យបងប្អូនពលករខ្មែរ ដែលមានបំណងលួចឆ្លងដែន តាមរយៈមេខ្យល់ ឬដោយខ្លួនឯង សូមបញ្ឈប់រាល់ការប៉ុនប៉ងលួចឆ្លងដែនខុសច្បាប់ ព្រោះថាបច្ចុប្បន្នប្រទេសថៃកំពុងតែរឹតបន្តឹងដោយសារតែជំងឺមេរោគកូវីដ១៩ រីរាលដាលទៅមនុស្សជាច្រើននាក់។
គួរបញ្ចាក់ផងដែរថា កាលពីថ្ងៃទី១៣ ខែឧសភា ឆ្នាំ២០២០ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានចេញសេចក្តីប្រកាស ដោយជម្រាបជូនឯកឧត្តម លោកជំទាវ អភិបាលខេត្តជាប់ព្រំដែនជាប្រទេសជិតខាង ស្តីពីការទប់ស្គាត់ពលរដ្ឋខ្មែរ កុំឲ្យឆ្លងដែនដោយខុសច្បាប់ ចូលទៅប្រទេសជិតខាងតាមច្រករបៀងនានា ខណៈដែលប្រទេសជិតខាងនៅបន្តដាក់ប្រទេសក្នុងភាពអាសន្ន ដើម្បីទប់ស្កាត់ការរីករាលដាលនៃជំងឺកូវីដ១៩ និងធ្វើការស្រាវជ្រាវ ស្វែករក តាមចាប់ខ្លួនមេខ្យល់ ដែលចលនាអូសទាញពលរដ្ឋខ្មែរឲ្យឆ្លងដែនខុសច្បាប់ផងដែរ៕