ពលរដ្ឋ ប្រទះឃើញស្ត្រីម្នាក់ លង់ទឹកស្លាប់នៅចំណុចស្រះទួលខ្សាច់ ឃុំអូរបីជាន់
ខេត្តបន្ទាយមានជ័យ៖ស្ត្រីម្នាក់ត្រូវបានប្រជាពលរដ្ឋប្រទះឃើញស្លាប់អណ្តែតទឹក ដោយសាមិនចេះហែលទឹក ចុះងូតទឹករអិលជើងចូលទឹកជ្រៅ។
ករណីដែលបង្កការភ្ញាក់ផ្អើលនេះ បានកើតឡើងកាលពីវេលាម៉ោង៥ល្ងាច ថ្ងៃទី១៣ ខែឧសភា ឆ្នាំ២០២០ ស្ថិតនៅចំណុចស្រះទួលខ្សាច់ ខាងកើតចម្ងាយ ប្រហែល២៥០ម៉ែត្រ ភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។
បើតាមសមត្ថកិច្ចបានឲ្យដឹងថា នៅវេលាម៉ោងប្រហែល៥ល្ងាច ប្រជាពលរដ្ឋបានប្រទះឃើញសពអណ្តែតក្នុងទឹកស្រះមួយកន្លែងនៅវេលាម៉ោង១៨និង៣០នាទី កម្លាំងប៉ុស្តិ៍រដ្ឋបាលអូរបីជាន់ បានចុះទៅដល់កន្លែងកើតហេតុ ទើបដឹងថា សពនោះជានារី ដោយពលរដ្ឋអះអាងថា ជនរងគ្រោះមានឈ្មោះ សំ ចន្ថា អាយុ២៤ឆ្នាំ រស់នៅក្នុងភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័។
សមត្ថកិច្ចបន្តថា នៅមុនពេលកើតហេតុនោះ ស្ត្រីជនរងគ្រោះបានចេញពីផ្ទះទៅងូតទឹកកន្លែងកើតហេតុ ដោយសារមិនចេះហែលទឹកនារីរងគ្រោះ ចុះទៅងូតទឹកហើយរអិលជើងធ្លាក់ចូលក្នុងស្រះជ្រៅបណ្តាលឲ្យលង់ស្លាប់តែម្តង។សពត្រូវបានស្រង់មកលើគោក ហើយប្រគល់ឲ្យក្រុមគ្រួសាររៀបចំធ្វើបុណ្យតាមប្រពៃណី៕
