អគ្គីភ័យឆេះ ឃ្លាំងក្រដាសអេតចាយ មួយកន្លែងនៅក្នុងក្រុងបាវិត មិនដឹងពីមូលហេតុ
ខេត្តស្វាយរៀង៖ឃ្លាំងក្រដាសអេតចាយមួយកន្លែង នៅក្នុងតំបន់សេដ្ឋកិច្ចពិសេសតាយសេង ស្ថិតនៅក្នុងភូមិតាបឹប សង្កាត់បាវិត ក្រុងបាវិត ខេត្តស្វាយរៀង ត្រូវបានអគ្គីភ័យឆាបឆេះយ៉ាងសន្ធោសន្ធៅ កាលពីវេលាម៉ោង៣និង៤០នាទីរសៀល ថ្ងៃទី១២ ខែឧសភា ឆ្នាំ២០២០ បណ្តាលឲ្យខូចខាតសម្ភារ: ក្រដាសប្រមាណជា៥០០តោន និងរថយន្ត១គ្រឿង សំណាងល្អមិនឆេះរាលដាលប៉ះពាល់អ្នកដទៃ និងអាយុជីវិតមនុស្ស។
សមត្ថកិច្ចបានឲ្យដឹងថា ម្ចាស់ទីតាំងរងគ្រោះមានឈ្មោះ ថាច់ ថុន ភេទស្រី អាយុ៤១ឆ្នាំ ភូមិ សង្កាត់ខាងលើ។ចំពោះទំហំនៃការខូចខាត គឺឆេះក្រដាសអេតចាយអស់ប្រមាណជា៥០០តោន និងឆេះរថយន្តដឹកអេតចាយ០១គ្រឿង ម៉ាកហ៊ីណូ គ្មានស្លាកលេខ។
សមត្ថកិច្ចបញ្ជាក់ថា ក្នុងគ្រោះអគ្គិភ័យនេះមិនបណ្តាលឱ្យមនុស្សណាម្នាក់រងរបួសនោះទេ ក្រោយពីទទួលបានព័ត៌មាននេះភ្លាមកម្លាំងនគរបាលក្រុងបាវិត បានសហការជាមួយកម្លាំងកងរាជអាវុធហត្ថក្រុង និងកម្លាំងកងរាជអាវុធហត្ថខេត្ត បានចេញរថយន្តជួយសង្គ្រោះចំនួន០២ គ្រឿង ប្រើប្រាស់ទឹកសរុបចំនួន១២រថយន្ត។
ដោយឡែកមូលហេតុដែលនាំឱ្យកើតមានអគ្គិភ័យ ឆេះឃ្លាំងស្តុកក្រដាសនេះ មិនទាន់ដឹងនៅឡើយកម្លាំងសមត្ថកិច្ចជំនាញកំពុងធ្វើការស្រាវជ្រាវ៕
