រដ្ឋបាលខេត្តស្វាយរៀង ទទួលសម្ភារៈសុខាភិបាល ការពារជំងឺឆ្លងកូវីដ១៩ ពីអាជ្ញាធរខេត្តតៃនិញ នៅច្រកទ្វារព្រំដែនអន្តរជាតិ បាវិត-ម៉ុកបាយ
ខេត្តស្វាយរៀង៖នៅរសៀលថ្ងៃសុក្រ ៣កើត ខែពិសាខ ឆ្នាំជូត ទោស័ក ព.ស.៣៥៦៣ ត្រូវនឹងថ្ងៃទី២៤ ខែមេសា ឆ្នាំ២០២០ លោក សុខ រស់ អភិបាលរងខេត្តស្វាយរៀង តំណាងឯកឧត្តម ម៉ែន វិបុល អភិបាល នៃគណៈអភិបាលខេត្តស្វាយរៀង អមដំណើរដោយលោកនាយករដ្ឋបាលសាលាខេត្ត, លោកស្នងការរងនគរបាលខេត្ត លោកប្រធានទីស្នាក់ការ និងកម្លាំងសមត្ថកិច្ចច្រកទ្វារព្រំដែន បានអញ្ជើញទទួលសម្ភារៈសុខាភិបាល ការពារជំងឺឆ្លងកូវីដ១៩ ដែលឧបត្ថម្ភដោយអាជ្ញាធរខេត្តតៃនិញ ប្រទេសវៀតណាម ស្ថិតនៅច្រកទ្វារព្រំដែនអន្តរជាតិ បាវិត-ម៉ុកបាយ។
ចំណែកខាងអាជ្ញាធរខេត្តតៃនិញ ប្រទេសវៀតណាម ដែលអមដំណើរ លោក ង្វៀន ថាញ់ង៉ុក អនុប្រធានគណៈកម្មាធិការប្រជាជនខេត្ត រួមមាន:លោកនាយករងមន្ទីរការបរទេសខេត្ត , មេបញ្ជាការរងកងទ័ពការពារព្រំដែនខេត្ត, មេបញ្ជាការរងយោធាខេត្ត, នាយករងនគរបាលខេត្ត, មន្ទីរសុខាភិបាលខេត្ត។
ដោយឡែកអំណោយដែលឧបត្ថម្ភឱ្យរដ្ឋបាលខេត្តស្វាយរៀងរួមមាន៖ម៉ាស់ចំនួន៣០.០០០ ម៉ាស់ និងទឹកជែលលាងដៃចំនួន ២៤០ដប ចំណុះ៥០០មីលីលីត្រ។
នាឱកាសនោះលោក សុខ រស់ អភិបាលរងខេត្ត បានថ្លែងគុណចំពោះថ្នាក់ដឹកនាំ និងប្រជាជនខេត្តតៃនិញ នៃសាធារណរដ្ឋសង្គមនិយមវៀតណាម ដែលបានចូលរួមចំណែកចែករំលែកនូវអំណោយការពារជំងឺឆ្លងកូវិដ១៩ ជាមួយរដ្ឋបាលខេត្តស្វាយរៀង ដែលបង្ហាញឲ្យឃើញពីការសាមគ្គីភាព មិត្តភាព កិច្ចសហប្រតិបត្តិការរវាងខេត្តទាំងពីរ ស្វាយរៀង-តៃនិញ ជួយគ្នា ក្នុងគ្រាលំបាកដែលសកលលោកកំពុងជួបនូវស្ថានភាពជម្ងឺកូវីដ១៩នេះ៕