កិច្ចប្រជុំរដ្ឋសភានៅដើមសប្តាហ៍ក្រោយ នឹងមានការផ្លាស់ប្តូរ រដ្ឋមន្រ្តីក្រសួងចំនួន៤
រាជធានីភ្នំពេញ៖រដ្ឋសភានឹងបើកជាកិច្ចប្រជុំវិសាមញ្ញនៅថ្ងៃទី៣០ ខែមីនា ឆ្នាំ២០២០ ដើមសប្តាហ៍ក្រោយនេះ នឹងធ្វើការបោះឆ្នោតផ្តល់សេចក្តីទុកចិត្តលើការតែងតាំងសមាសភាពរាជរដ្ឋាភិបាលមួយចំនួន ដោយក្នុងនោះក៏មានធ្វើការផ្លាស់ប្តូររដ្ឋមន្រ្តីក្រសួងចំនួន៤ផងដែរ។
យោងតាមលិខិតរបស់រាជរដ្ឋាភិបាល ស្នើទៅកាន់ប្រធានរដ្ឋសភាជាតិបានបង្ហាញថា មានរដ្ឋមន្រ្តីក្រសួងចំនួន៤ ត្រូវធ្វើការផ្លាស់ប្តូរ នោះ គឺ ឯកឧត្តម កើត រិទ្ធ ត្រូវស្នើតែងតាំងជា រដ្ឋមន្រ្តីក្រសួងយុត្តិធម៌, ឯកឧត្តម ជា វ៉ាន់ដេត ត្រូវស្នើតែងតាំងជារដ្ឋមន្រ្តីក្រសួងប្រៃសណីយ៍ និងទូរគមនាគមន៍, ឯកឧត្តម ឈិត សុខុន ត្រូវស្នើតែងតាំងជារដ្ឋមន្រ្តីក្រសួងធម្មការ និងសាសនា និង ឯកឧត្តម ព្រុំ សុខា ត្រូវស្នើតែងតាំងជារដ្ឋមន្រ្តីក្រសួងមុខងារសាធារណៈ៕