ឃាត់បុរសម្នាក់ ប្រើហឹង្សាក្នុងគ្រួសារ និងប្រើប្រាស់អាវុធខុសច្បាប់
ខេត្តកំពង់ស្ពឺ៖បុរសម្នាក់ត្រូវបានកម្លាំងសមត្ថកិច្ចចាប់ឃាត់ខ្លួន កាលពីល្ងាចថ្ងៃទី១៥ ខែមីនា ឆ្នាំ២០២០ បន្ទាប់ពីប្រើអំពើហឹង្សាក្នុងគ្រួសារ និងប្រើប្រាស់អាវុធខុសច្បាប់នៅភូមិព្រីង ឃុំត្រែងត្រយឹងស្រុកភ្នំស្រួច ខេត្តកំពង់ស្ពឺ ។
សមត្ថកិច្ចបានឱ្យដឹងថា ជនសង្ស័យមានឈ្មោះឌុល ធីណា ភេទប្រុស អាយុ២៧ឆ្នាំ រស់នៅភូមិព្រីងឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ។
បើតាមប្រភព័ត៌មានបានឱ្យដឹងថា មុនពេលកើតហេតុជនសង្ស័យបានទាស់ពាក្យសម្តីជាមួយម្តាយឈ្មោះ មួង វឿន អាយុ៥៨ឆ្នាំ រស់នៅភូមិឃុំខាងលើ។បន្ទាប់មកឈ្មោះ ឌុល ធីណា បានយកកាំភ្លើងច្នៃប្រភេទបាញ់គ្រាប់កង់គំរាមរកបាញ់ម្តាយ និងបងប្រុសតែមិនបានបាញ់ទេ ដោយសារម្តាយនិងបងប្រុសរត់គេចខ្លួនចេញពីផ្ទះ។
ក្រោយមកសមត្ថកិច្ចទៅដល់ ឈ្មោះ មួង វឿន ត្រូវជាម្តាយបាននាំកម្លាំងនគរបាលប៉ុស្តិ៍ឃុំត្រែងត្រយឹងទៅគាស់យកអាវុធម៉ាកAK.47លេខមើលមិនច្បាស់បង់១ គ្រាប់ចំនួន៤គ្រាប់ពីក្រោយផ្ទះរបស់គាត់ ដែលរូបគាត់បានកប់ទុកតាំងពីប្តីរបស់គាត់មានប្រពន្ធចុង។ហើយកូនរបស់គាត់តែងតែឈ្លោះគ្នាជាញឹកញាប់តែមិនចាំឆ្នាំដែលគាត់កប់ទេប្រគល់ជូនសមត្ថកិច្ច។
បច្ចុប្បន្នជនសង្ស័យត្រូវបានកម្លាំងសមត្ថកិច្ចបញ្ជូនទៅអធិការដ្ឋាននគរបាលស្រុកភ្នំស្រួច ដើម្បីកសាងសំណុំរឿងចាត់ការតាមនីតិវិធី៕
