ក្រុមប្រឹក្សាសង្កាត់ប៉ោយប៉ែត ចុះពង្រីកផ្លូវមួយខ្សែចាប់ពីសាលាសង្កាត់ រហូតដល់ដីល្វែងឈុនទូច ម្ខាង២ម៉ែត្របន្ថែមទៀត ដើម្បីងាយស្រួលក្នុងការធ្វើដំណើរ
ខេត្តបន្ទាយមានជ័យ៖ដើម្បីងាយស្រួលក្នុងការធ្វើដំណើររបស់បងប្អូនប្រជាពលរដ្ឋ និងកាត់បន្ថយការកស្ទះផងនោះ ក្រុមប្រឹក្សាសង្កាត់ប៉ោយប៉ែត ដែលដឹកនាំដោយលោក ប៊ុន សុវុទ្ធា សមាជិកក្រុមប្រឹក្សាអភិវឌ្ឍន៍សង្កាត់ប៉ោយប៉ែត បានចុះធ្វើការពង្រីកផ្លូវមួយខ្សែចាប់ពីសាលាសង្កាត់ប៉ោយប៉ែត រហូតដល់ការ៉ាស់សាំងតេលាចំណុចដីល្វែងឈុន ទូច គឺម្ខាង២ម៉ែត្របន្ថែមទៀត សរុប១០ម៉ែត្រ។
សូមជំរាបដែរថា ការចុះពង្រីកផ្លូវមួយខ្សែនេះ ដោយមានការចង្អុលបង្ហាញពីលោកគាត ហុល អភិបាលក្រុង និងលោក ភោគ លន ចៅសង្កាត់ក្រុងប៉ោយប៉ែត ដោយខាងសង្កាត់ជួយឧបត្ថម្ភដែក និងកម្លាំងពលកម្ម រីឯប្រជាពលរដ្ឋចូលរួមចេញបេតុង ព្រមទាំងរៀបចំដាក់ប្រពន្ធ័លូតាមស្ទង់ដាទៀតផង។
លោក ប៊ុន សុវុទ្ធា សមាជិកក្រុមប្រឹក្សាអភិវឌ្ឍន៍សង្កាត់ប៉ោយប៉ែតបានឱ្យដឹងថា ផ្លូវមួយខ្សែខាងលើនេះកន្លងមកជួបការលំបាកខ្លាំងណាស់ក្នុងការធ្វើដំណើរដោយតូចចង្អៀត បណ្តាលឱ្យមានការកកស្ទះជាញឹកញាប់ ពិសេសនៅរដូវវស្សាភ្លៀងម្ដងៗទឹកជន់លិចទៀតផង។
ទន្ទឹមនោះដែរពលរដ្ឋបានសាទរនិងកោតសសើចំពោះអាជ្ញាធរមូលដ្ឋាន ពិសេសក្រុមប្រឹក្សាអភិវឌ្ឍន៍សង្កាត់ប៉ោយប៉ែត ដែលបានយកចិត្តទុកដាក់ចំពោះពលរដ្ឋរបស់ខ្លួន៕
