ឃាត់ខ្លួន អ្នកញៀនល្បែង ជល់មាន់ចំនួន៨នាក់ ទៅអប់រំ និងកិច្ចសន្យាបញ្ឈប់
ខេត្តបាត់ដំបង៖ដោយអនុវត្តតាមការណែនាំរបស់លោកឧត្តមសេនីយ៍ទោ អ៊ុច សុខុន ស្នងការនៃស្នងការដ្ឋាននគរបាលខេត្តបាត់ដំបង នៅថ្ងៃសៅរ៍ ១៥កើត ខែមាឃ ឆ្នាំកុរឯកស័ក ព.ស.២៥៦៣ ត្រូវនឹងថ្ងៃទី៨ ខែកុម្ភះ ឆ្នាំ២០២០ លោកវរសេនីយ៍ឯក ផង់ សុភាព អធិការនគរបាលស្រុកថ្មគោល ដឹកនាំបញ្ជាកម្លាំងជំនាញនៃអធិការដ្ឋាននគរបាលស្រុក សហការជាមួយកម្លាំងប៉ុស្តិ៍នគរបាលរដ្ឋបាលបាល បានចុះបង្រ្កាបទីតាំងជល់មាន់ភ្នាល់ដាក់ប្រាក់មួយកន្លែងនៅចំណុចភូមិឆ្កែកូន ឃុំគោកឃ្មុំ ស្រុកថ្មគោលដោយឃាត់ខ្លួនអ្នកប្រព្រឹត្តិបានចំនួន០៨នាក់។
ក្រោយពីបង្ក្រាបកម្លាំងដកហូតបាននូវវត្ថុតាងមួយចំនួនរួមមាន៖
-មាន់ជល់ចំនួន០៣ក្បាល
-សង្វៀនជល់មាន់ចំនួន០១
-ជញ្ជីងតូចចំនួន០១
-ស៊ុមចំនួន០១
-ធុងជ័រចំនួន០១
ក្រោយពីបង្ក្រាបសមត្ថកិច្ចបានធ្វើកំណត់ហេតុសាកសួរ និងធ្វើការអប់រំណែនាំ ព្រមទាំងធ្វើកិច្ចសន្យាបញ្ឈប់ប្រព្រឹត្តល្បែងភ្នាល់នេះជាបន្តទៀត រួចឱ្យវិលត្រឡប់ទៅលំនៅដ្ឋានវិញ៕
