ជំនួនពិភាក្សាពង្រឹងទំនាក់ទំនង សហប្រតិបត្តិការរវាង ស្នងការដ្ឋាននគរបាលខេត្តបាត់ដំបង និងនគរបាលភូមិភាគ២ប្រទេសថៃ
ខេត្តបាត់ដំបង៖ដើម្បីលើកកម្ពស់នូវទំនាក់ទំនងកិច្ចសហប្រតិបត្តិការ និងរឹតចំណងមេត្រីភាពឲ្យកាន់តែជិតស្និត និងទូលំទូលាយថែមទៀត រវាងស្នងការដ្ឋាននគរបាលខេត្តបាត់ដំបង ជាមួយបណ្តាលខេត្តនៃប្រទេសថៃ ដែលមានព្រំប្រទល់ជាប់គ្នានោះ នៅព្រឹកថ្ងៃ សុក្រ ១៤កើត ខែមាឃ ឆ្នាំកុរ ឯកស័ក ព.ស.៣៥៦៣ ត្រូវនឹងថ្ងៃទី៧ ខែកុម្ភ: ឆ្នាំ២០២០ ស្នងការដ្ឋាននគរបាលខេត្តបាត់ដំបង បានរៀបចំពិធីជំនួនពិភាក្សាពង្រឹងទំនាក់ទំនងសហប្រតិបត្តិការរវាងស្នងការដ្ឋាននគរបាលខេត្តបាត់ដំបង នៃព្រះរាជាណាចក្រកម្ពុជា ជាមួយនគរបាលភូមិភាគ២ នៃព្រះរាជាណាចក្រថៃ។
ពិធីនេះក្រោមអធិបតីភាពឯកឧត្តម ឧត្តមសេនីយ៍ទោ អ៊ុច សុខុន មេបញ្ជាការរងនគរបាលជាតិទិសភូមិភាគទី៥ ស្នងការនៃស្នងការដ្ឋាននគរបាលខេត្តបាត់ដំបង និងជាសហប្រធាននៃជំនួនពិភាក្សា ឯកឧត្តម ឧត្តមសេនីយ៍ត្រី ថា ណាស័ក្តិ រិទ្ធីដេតផៃប៊ូន មេបញ្ជាការរងនគរបាលភូមិភាគ២ នៃព្រះរាជាណាចក្រថៃ ជាសហប្រធាននៃជំនួបពិភាក្សា។
បើយោងតាមរបាយការណ៍របស់ស្នងការដ្ឋាននគរបាលខេត្តបាត់ដំបងបានបញ្ជាក់ថា កន្លងមកស្នងការ ការនគរបាលខេត្តបាត់ដំបង និងខេត្តចន្ទ បុរី ប្រទេសថៃ បានជួបទំនាក់ទំនងជាមួយគ្នា ក្នុងការពង្រឹងកិច្ចសហប្រតិបត្តិការ លើវិស័យការងារសន្តិសុខ និងសណ្ដាប់ធ្នាប់រវាងខេត្តជាប់ព្រំដែនទាំងពីរ ចាប់តាំងពីថ្ងៃទី៨ ខែមីនា ឆ្នាំ២០១៧ មកទល់ឆ្នាំ២០១៩ គឺមានចំនួន៤ លើករួចមកហើយ ដោយបានធ្វើការផ្លាស់ប្ដូរដំណើរបំពេញការងារពង្រឹងទំនាក់ទំនងកិច្ចសហប្រតិបត្តិការ និងការប្រកួតកីឡាជាមិត្តភាពទៅវិញទៅមកប្រកបដោយភាពកក់ក្តៅ និងសាមគ្គីភាពយ៉ាងជិតស្និត។
ជាងនេះទៅទៀតកាលពីថ្ងៃទី២៦ ខែធ្នូ ឆ្នាំ២០១៩ តបតាមការអញ្ជើញរបស់លោកមេបញ្ជាការ សាលានគរបាល ភូមិភាគ២ នៃព្រះរាជាណាចក្រថៃ ស្នងការនគរបាលខេត្តបាត់ដំបង បានចូលរួមពិធីជប់លៀង ក្នុងឱកាសចូលឆ្នាំថ្មីឆ្នាំសាកល២០២០ ដើម្បីពង្រឹងទំនាក់ទំនងនិងកិច្ចសហប្រតិបត្តិការនៅសាលានគរបាល ភូមិភាគ២ ផងដែរ។
ចំពោះកិច្ចសហប្រតិបត្តិការប្រកបដោយលទ្ធផលជាផ្លែផ្កាយ៉ាងល្អប្រសើររបស់កងកម្លាំងនគរបាល នៃភាគីទាំងពីរដែលសម្រេចបានរយៈពេលកន្លងមក ក្នុងការពង្រឹងបានយ៉ាងរឹងមាំ សន្តិសុខសណ្ដាប់ធ្នាប់តាមបន្ទាត់ព្រំដែន បន្ទប់ស្កាត់បង្ក្រាបបទល្មើសប្រកបដោយប្រសិទ្ធភាព ពិសេសអំពើភារវកម្ម ឧក្រិដ្ឋកម្មឆ្លងដែន ការជួយអន្តរាគមន៍ដល់ប្រជាពលរដ្ឋដែលជួបលំបាក និងគ្រោះមហន្តរាយ និងការងារសង្គមផ្សេងទៀតផងដែរ៕
