ឯកឧត្តម ស៊ុន ចាន់ថុល អញ្ជើញជាអធិបតីក្នុងពិធីក្រុងពាលី ឆ្លងសាលាកុដ្ឋ២ខ្នង នៅវត្តឥន្ទ្របត្តបុរី ហៅ វត្តអង្គរខាងត្បូង
ខេត្តសៀមរាប៖នៅរសៀលថ្ងៃ ១៤កើត ខែមាឃ ឆ្នាំកុរ ឯកស័ក្ត ព.ស២៥៦៣ ត្រូវនឹងថ្ងៃទី០៧ ខែកុម្ភះ ឆ្នាំ២០២០ ឯកឧត្តម កុយ សង សមាជិកក្រុមប្រឹក្សាខេត្ត និងលោកស្រី យូ សុភា អភិបាលរងខេត្ត បានអញ្ជើញចូលរួមពិធីក្រុងពាលី ឆ្លងសាលាកុដ្ឋ២ខ្នង នៅវត្តឥន្ទ្របត្តបុរី ហៅ វត្តអង្គរខាងត្បូង ក្រោមវត្តមានអញ្ជើញចូលរួមរបស់ឯកឧត្តម ស៊ុន ចាន់ថុល ទេរដ្ឋមន្ត្រី រដ្ឋមន្ត្រីក្រសួងសាធារណការនឹងដឹកជញ្ជូន និង ឯកឧត្តមឧកញ៉ាបណ្ឌិត សៀង ណាំ អ្នកតំណាង រាស្ត្រមណ្ឌលសៀមរាប ដោយមានការអញ្ជើញចូលរួមពីសំណាក់ឯកឧត្តម លោកជំទាវ ជារដ្ឋលេខាធិការ អនុរដ្ឋលេខាធិការ ក្រុមប្រឹក្សាខេត្ត គណៈអភិបាលខេត្ត អាជ្ញាធរអប្សរា មន្ត្រីរាជការ សីលវន្ត័ សីលវតីជាចូលរួមផងដែរ ។
ពិធីក្រុងពាលីនេះ បានធ្វើឡើងតាមបែបព្រហ្មញ្ញសាសនាសុទ្ធសាធ ដែលនៅក្នុងនោះរួមមាន ពីធីថ្វាយនូវគ្រឿងសក្ការៈ ប្រកាសឧទ្ទិសបួងសួង និងប្រគុំថ្វាយភ្លេងពិណពាធចំពោះបារមីវត្ថុស័ក្តសិទ្ធ ហើយដែលមួយផ្នែកនៃពិធីនេះ គឺបូជាព្រះភូមិ និង បូជាថ្វាយស្តេចក្រុងពាលី ដើមី្បសុំនូវសេចក្តីសុខ ក្នុងឱកាសរៀបចំធ្វើពិធីបុណ្យឆ្លងសាលាកុដ្ឋ ដើមី្បប្រគេនថ្វាយដល់ព្រះសង្ឃគងចាំព្រះ វស្សានៅក្នុងទីវត្ត ឥន្ទ្របត្តបុរី ហៅ វត្តអង្គរខាងត្បូង បានប្រប្រសាសន៍ទៅតាមពុទ្ធានិញ្ញានៃព្រះសម្មាសាម្ពុទ្ធព្រះបរមគ្រូនៃយើង ។
សូមបញ្ជាក់ផងដែរថា សមទ្ធិផលនេះកើតឡើងដោយទឹកចិត្តសប្បុរសរបស់ឯកឧត្តម ស៊ុន ចាន់ថុល ទេរដ្ឋមន្ត្រី រដ្ឋមន្ត្រីក្រសួងសាធារណការនឹងដឹកជញ្ជូន និងលោកជំទាវ ព្រមទាំងថ្នាក់ដឹកនាំមន្ត្រីរាជការក្រោមឱវាទ ព្រះសង្ឃ ពុទ្ធបរិស័ទ ក្រោមដំបូលសន្តិភាពតែមួយ នៃការដឹកនាំដ៏ឈ្លាសវៃរបស់សម្តេចតេជោ ហ៊ុន សែន នាយករដ្ឋមន្ត្រី។ម៉្យាងទៀតការក្រុងពាលីនេះ គឺដើមី្បបូជាថ្វាយចំពោះ ព្រះពុទ្ធសាសនា និង ជាវត្ថុសម្រាប់តំកល់បូជានីក្នុងទីវត្តអារាម នៃទឹកដីមហានគរនៃយើងនេះ ។
ពិធីបួងសួង ក៏ដូចជាពិធីក្រុងពាលីផងដែរ គឺជាពិធីដែលស្ថិតក្នុងជំនឿតាមបែបព្រលឹងដែលប្រជាជនខ្មែរយើងមានជំនឿជឿថា នៅលើលោកនេះ អ្នកខ្លាំងពូកែដែលបានចែកឋានទៅ ពិតជាបានប្រើប្រាស់ព្រលឹងរបស់ខ្លួន នៅតាមថែរក្សាកូនចៅជំនាន់ក្រោយៗ នឹងមើលការខុសត្រូវដោយ ឬទ្ធានុភាពជួយគាំទ្រកូនចៅដែលប្រព្រឹត្តិអំពើល្អ និង មានមនសិការស្នហាជាតិ ស្រឡាញ់ការពារទឹកដីមាតុភូមិ កេរ្តិ៍ដំណែលដូនតាដោយពិតប្រាកដ។
ការក្រុងពាលីនាបច្ចុប្បន្ននេះ បងប្អូនពុទ្ធបរិស័ទខ្មែរយើង តែងមានជំនឿទៅលើពិធីកម្មមួយជាចេតនាកម្ម មុននឹងធ្វើពិធីអ្វីមួយ គឺតែងតែរៀបចំពិធីសែន ក្រុងពាលី ក្នុងការឧទ្ទិសចំណែបុណ្យជូនដល់សេ្តចក្រុងពាលីតែមួយគត់ មិនគិត ដល់ការផ្សាយមេត្តាចិត្ត ការចែករំលែកបុណ្យជាទូលាយ ស្របទៅតាមកុសលចេតនានៃសទ្ធាឡើយ ។
ក្នុងនោះលោកតាអាចារ្យ ក៏បានធ្វើការបួងសួង ដល់ព្រះបារមីដែលគង់ប្រថាប់នៅលើទឹកដីប្រវត្តិសាស្ត្រខេត្តសៀមរាប ដែល មានបារមីព្រះអង្គចេក ព្រះអង្គចម លោកយាយទេព តាដំបងដែក បារមីលោករាជ្យ ព្រះអង្គធំខ្នងភ្នំគូលែន ព្រមទាំងបារមីព្រះឥន្ធ ព្រះព្រហ្ម ដែលគង់នៅតាមប្រាង្គប្រាសាទនៅលើទឹកដីអង្គរ តាមជួយបីបាច់ថែរក្សាដល់ថ្នាក់ដឹកនាំកំពូលៗនៃព្រះរាជាណាចក្រកម្ពុជា និង ឯកឧត្តមទេសរដ្ឋមន្ត្រី ស៊ុន ចាន់ថុល និង លោកជំទាវ រួមទាំងថ្នាក់ដឹកនាំមន្ត្រីរាជការទាំងអស់ ដែលបានកសាងនូវសមទ្ធិផលជា មរតក សម្រាប់វិស័យព្រះពុទ្ធសាសនា ឲ្យជួបតែសេចក្តីសុខចម្រើនតទៅអនាគត ៕