បាញ់៦គ្រាប់ ដើម្បីរំដោះម៉ូតូចេញពីហាងម៉ាស្សា ឈ្មោះ(លី លី) រត់គេចខ្លួនត្រូវសត្ថកិច្ច ឃាត់ខ្លួនបាននៅខេត្តកោះកុង
រាជធានីភ្នំពេញ៖បន្ទាប់ពីផ្ទុះអាវុធចំនួន៦គ្រាប់នៅហាងម៉ាស្សាកោសជប់ ឈ្មោះ(លី លី) ស្ថិតក្នុងភូមិក្បាលដំរី សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ កាលពីយប់ថ្ងៃទី៣១ ខែមករា ឆ្នាំ២០២០ ដោយសារគ្មានលុយឲ្យថ្លៃម៉ាស្សា រួចរំដោះម៉ូតូចេញពីហាងម៉ាស្សា រត់គេចខ្លួនត្រូវសត្ថ កិច្ចចាប់ឃាត់ខ្លួនបាននៅខេត្តកោះកុង កាលពីល្ងាចថ្ងៃទី៦ ខែកុម្ភៈ ឆ្នាំ២០២០។
ការឃាត់ខ្លួនជនសង្ស័យបានធ្វើឡើងបន្ទាប់ពីកម្លាំងអាវុធហត្ថខណ្ឌពោធិ៍សែនជ័យ សហការណ៍ជាមួយកម្លាំងការិយាល័យព្រហ្មទណ្ឌអាវុធហត្ថរាជធានីភ្នំពេញ ធ្វើការស្រាវជ្រាវយ៉ាងយកចិត្តទុកដាក់រហូតឈានដល់កំណត់មុខសញ្ញាដែលរត់គេចខ្លួន ទើបកម្លាំងអាវុធហត្ថរាជធានីភ្នំពេញ បន្តទៅសហការជាមួយកម្លាំងអាវុធហត្ថខេត្តកោះកុង ធ្វើការឃាត់ខ្លួនជនសង្ស័យ មកកាន់ទីបញ្ជាការអាវុធហត្ថរាជធានីភ្នំពេញតែម្តង។
បើតាមសមត្ថកិច្ចបានឲ្យដឹងថា ជនសង្ស័យមានឈ្មោះ លន់ ជីវ័ន ហៅមាស ជាមន្ត្រីយោធា។ប្រភពដដែររបន្តថា នៅចំពោះមុខសមត្ថកិច្ចជនសង្ស័យបានសារភាពថា មូលហេតុដែលខ្លួនបាញ់នោះគឺដោយសារខ្លួនមិនស្រួលខ្លួនរសេះរសោះ ក៏សម្រេចចិត្តទៅកោសខ្យល់នៅហាងម៉ាស្សាខាងលើ នៅពេលដែលចូលដល់ក្នុងបន្ទប់រូបខ្លួនបានដោះអាវឲ្យគេកោសខ្យល់ ស្រាប់តែនារីកោសខ្យល់ដែលចូលក្នុងបន្ទប់ បានស្ទាបអង្អែលខ្លួនប្រាណ និងលូកដៃចាប់ប្រដាប់ភេទរបស់ខ្លួន ហើយរូបខ្លួនក៏មើលមុខនារីនោះដឹងថា ជាខ្ទើយ(ប្រុសតែងខ្លួនធ្វើស្រី) រូបខ្លួនមិនចូលចិត្តក៏បានហាមឃាត់ និងរុញច្រាននារីខ្ទើយនោះចេញ បណ្តាលឲ្យមានការប្រតាយប្រតប់គ្នាដាច់ឡេវអាវរហែក និងដាច់សាច់បំពង់ក ព្រោះតែនារីខ្ទើយនោះខ្វាចនឹងក្រចក ធ្វើឲ្យខ្លួនខឹងជាខ្លាំង ក៏បានចេញក្រៅបន្ទប់ បម្រុងយកម៉ូតូចេញពីកន្លែងកើតហេតុ តែអ្នកនៅហាងមិនព្រមឲ្យយកម៉ូតូចេញ និងទាមទារលុយចំនួន១០ម៉ឺនរៀល ហើយរូបខ្លួនសុំសម្រួលត្រឹម១ម៉ឺន៥ពាន់រៀល តែអ្នកនៅហាងម៉ាស្សានោះមិនព្រម ទើបពេលនោះរូបខ្លួនខឹងខ្លាំង ក៏សម្រេចចិត្តទៅលួចយកកាំភ្លើងនៅអង្គភាព មកបាញ់គម្រាមនៅកន្លែងកោសខ្យល់ចំនួន០៦គ្រាប់ដើម្បីយកម៉ូតូត្រឡប់ទៅវិញ។
ក្រោយពេលបាញ់រួចរូបខ្លួនបានយកកាំភ្លើងទៅទុកក្នុងអង្គភាពវិញ ដោយមិនឲ្យមានគេដឹង រួចក៏ទៅសម្ងំលាក់ខ្លួនគីឡូម៉ែត្រលេខ១០ ខណ្ឌឬស្សីកែវ១យប់ បន្ទាប់មកគេចទៅលាក់ខ្លួននៅខេត្តឧត្តមមានជ័យ៤ថ្ងៃ ក្រោយមកបានប្តូរមកលាក់ខ្លួននៅខណ្ឌឬស្សីកែវវិញបាន០២ថ្ងៃ ចុងក្រោយបានរត់គេចទៅខេត្តកោះកុង ស្រាប់តែដល់ចំណុចវត្តគងឆាង ភូមិជីខលើ ស្រុកស្រែអំបិល ខេត្តកោះកុង ក៏ត្រូវបានកម្លាំងជំនាញអាវុធហត្ថឃាត់ខ្លួន មកកាន់បញ្ជាការដ្ឋានកងរាជអាវុធហត្ថរាជធានីភ្នំពេញតែម្តង៕
