ឃាត់ខ្លួនជនជាតិឡាវ១នាក់ ពាក់ពន្ឋ័ករណីជួញដូរគ្រឿងញៀនឆ្លងដែន
រាជធានីភ្នំពេញ៖បន្ទាប់ពីធ្វើការស្រាវជ្រាវ យ៉ាងយកចិត្តទុកដាក់ ពីសំណាក់កម្លាំងមន្ទីរប្រឆាំងគ្រឿងញៀនរាជធានីភ្នំពេញ នៅថ្ងៃទី៥ ខែកុម្ភៈ ឆ្នាំ២០២០ ទើបកម្លាំងឈានដល់ការចាប់ខ្លួនជនជាតិឡាវម្នាក់ នៅចំណុចផ្លូវជាតិលេខ៦A ស្ថិតក្នុងសង្កាត់ជ្រោយចង្វា ខណ្ឌខណ្ឌជ្រោយចង្វា រាជធានីភ្នំពេញ ខណៈដែលកំពុងតែធ្វើសកម្មភាពជួញដូរគ្រឿងញៀន ប្រភេទមេតំហ្វេតាមីន (ICE)ទម្ងន់៤គីឡូក្រាម ឆ្លងដែនពីប្រទេសឡាវ ចូលមកប្រទេសកម្ពុជា។
បើតាមសមត្ថកិច្ចបានឲឱ្យដឹងថា៖ប្រតិបត្តិការបង្ក្រាបនេះ ដោយអនុវត្តតាមបញ្ជារបស់នាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ នាយឧត្តមសេនីយ៍ ម៉ក់ ជីតូ អគ្គស្នងការរងនគរបាលជាតិ និងលោកឧត្តមសេនីយ៍ឯក ឡឹក វណ្ណៈ នាយកមន្ទីរប្រឆាំងគ្រឿងញៀន ដឹកនាំបញ្ជាដោយផ្ទាល់ កម្លាំងជំនាញនៃមន្ទីរប្រឆាំងគ្រឿងញៀន (ក៨) ចុះស្រាវជ្រាវដោយលោកឧត្តមសេនីយ៍ទោ វ៉ាន់ កុសល នាយករងមន្ទីរ និងមានការសម្របសម្រួលដោយលោក ហ៊ឹង ប៊ុនថន ព្រះរាជអាជ្ញារងរាជធានីភ្នំពេញ។
ជាលទ្ធផលកម្លាំងសមត្ថកិច្ចជំនាញចាប់ខ្លួនបានជនជាតិឡាវម្នាក់ ឈ្មោះ សែងច័ន្ទ ដួងចៃ (SENG CHANH DOUANGCHAY) និងរឹបអូសបាននូវវត្ថុតាងសារធាតុញៀនមេតំហ្វេតាមីន (ICE) ៤កញ្ចប់ធំ ទម្ងន់៤គីឡូក្រាម។
បច្ចុប្បន្នជនសង្ស័យត្រូវបានបញ្ជូនទៅមន្ទីរប្រឆាំងគ្រឿងញៀន ដើម្បីចាត់ការបន្ដតាមនីតិវិធី៕
