ថ្នាក់ដឹកនាំខេត្តកំពត ដង្ហែពានជ័យលាភី ទីក្រុងទេសចរណ៍ស្អាតអាស៊ាន ក្នុងក្រុងយ៉ាងអធិកអធមបំផុត
ខេត្តកំពត៖ឯកឧត្តម ជាវ តាយ អភិបាលនៃគណៈអភិបាលខេត្ត និងឯកឧត្តម ជឹង ផល្លា ប្រធានក្រុមប្រឹក្សាខេត្ត ព្រមទាំងឯកឧត្តម លោកជំទាវ ក្រុមប្រឹក្សាខេត្ត អភិបាលរងខេត្ត ថ្នាក់ដឹកនាំ ប្រធានមន្ទីរ អង្គភាព មន្ត្រីរាជការ កងកម្លាំងប្រដាប់អាវុធ សិស្ស និស្សិត និងប្រជាពលរដ្ឋ សរុបប្រមាណ ២៦០០នាក់ នាព្រឹកថ្ងៃព្រហស្បតិ៍ ១៣កើត ខែមាឃ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី៦ ខែកុម្ភៈឆ្នាំ២០២០ បានដង្ហែពានរង្វាន់ជ័យលាភីទីក្រុងទេសចរណ៍ស្អាតអាស៊ានក្នុងក្រុងកំពតយ៉ាងអធិកអធមបំផុត។
សូមបញ្ជាក់ថា កាលពីថ្ងៃទី១៦ ខែមករា ឆ្នាំ២០២០ ឯកឧត្តម ជាវ តាយ និងឯកឧត្តម ជឹង ផល្លា បានដឹកនាំប្រតិភូខេត្តកំពត ចូលរួមទទួលពានរង្វាន់ជ័យលាភីទេសចរណ៍ទីក្រុងស្អាតអាស៊ាន នៅរដ្ឋធានីបង់ដារសេរីបេហ្គាវ៉ាន់ ប្រទេសប៊្រុយណេដែលរដ្ឋមន្ត្រីទេសចរណ៍អាស៊ានផ្តល់ជូន បន្ទាប់ពីបានវាយតម្លៃថា ក្រុងកំពត ជាទីក្រុងទេសចរណ៍ស្អាត។
នេះជាកិត្តិយសដ៏ឧត្តុង្គឧត្តម និងមោទនភាពថ្មីមួយទៀតសម្រាប់រដ្ឋបាលខេត្តកំពត ក៏ដូចជាពលរដ្ឋទូទាំងខេត្តដែលក្រុងកំពតត្រូវបានទទួលស្គាល់ជាទីក្រុងទេសចរណ៍ស្អាតលំដាប់អាស៊ាន។កន្លងមកក្រុងកំពតបានទទួលពានរង្វាន់ជ័យលាភី រំដួលបីទង ចំនួន២លើក រួចមកហើយ ក្នុងចលនា ប្រឡងប្រណាំងក្រុងស្អាតថ្នាក់ជាតិ ផងដែរ៕