ប្រកាសសេចក្ដីសម្រេច ស្ដីពីការតែងតាំង គណៈកិត្តិយស អនុសាខា និងប្រកាសសេចក្ដីសម្រេច ស្ដីពីការទទួលស្គាស់ សមាសភាពគណៈកម្មាធិការអនុសាខា ទាំង១២ក្រុង-ស្រុក
ខេត្តសៀមរាប៖នាព្រឹកថ្ងៃអង្គារ ១១កើត ខែមាឃ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី៤ ខែកុម្ភៈ ឆ្នាំ២០២០ សាខាកាកបាទក្រហមកម្ពុជា ខេត្តសៀមរាប បានរៀបចំពិធីប្រកាសសេចក្ដីសម្រេចស្ដីពីការតែងតាំងគណៈកិត្តិយសអនុសាខា និងប្រកាសសេចក្ដីសម្រេចស្ដីពីការទទួលស្គាស់សមាសភាពគណៈកម្មាធិការអនុសាខា ទាំង១២ក្រុង-ស្រុក ក្រោមគណៈអធិបតីភាព ឯកឧត្តម ទៀ សីហា ប្រធានគណៈកម្មាធិការសាខា និងឯកឧត្តមអ្នកឧកញ៉ា សៀង ណាំ ប្រធានកិត្តិយសសាខា និងមានការអញ្ជើញចូលរួមពីសំណាក់ឯកឧត្តម លោកជំទាវ លោក លោកស្រី គណៈកិត្តិយស គណៈកម្មាធិការសាខា អនុសាខា ក្រុមប្រតិបត្តិ មន្ត្រីប្រចាំការអនុសាខា សរុបជា២០០អង្គ/នាក់ នៅសណ្ឋាគារ សោម៉ាទេវី អង្គរ។
មានប្រសាសន៍នាឱកាសនោះ ឯកឧត្តមអ្នកឧកញ៉ា សៀង ណាំ ប្រធានកិត្តិយសសាខា បានលើកឡើងថា ជាការពិតណាស់ដែលថា កាកបាទក្រហមកម្ពុជា ជាសមាគមជាតិបំពេញការងារមនុស្សធម៌ដែលជាប្រចាំត្រូវបើកចំហ និងទូលាយទទួលនូវការឧបត្ថម្ភជាស្បៀងអាហារ និងសម្ភារចាំបាច់សម្រាប់ជួយជនរងគ្រោះ ក្នុងនោះថវិកាក៏ជាកត្តាសំខាន់ ដើម្បីបំពេញការងារមនុស្សធម៌បានគ្រប់ជ្រុងជ្រោយ និងទាន់ពេលវេលា សម្រាប់សេចក្តី ត្រូវការចាំបាច់របស់គ្រួសាររងគ្រោះមហន្តរាយគ្រប់ប្រភេទ។ដែលតាមរយៈនេះ សូមឱ្យគណៈកិត្តិយស និងគណៈកម្មាធិការអនុសាខា កាកបាទក្រហមកម្ពុជា ក្រុង-ស្រុកទាំង១២ ត្រូវបន្តយកចិត្តទុកដាក់សហការគ្នា ពិភាក្សារកវិធីសាស្ត្រផ្សេងៗថ្មីៗ ដើម្បីស្វែងរកសប្បុរសជនគ្រប់មជ្ឈដ្ឋានក្នុងភូមិសាស្រ្តរបស់ខ្លួន ក្នុងនោះពីបណ្ដាព្រឹត្តិការណ៍ ឬបុណ្យទាន និងពីសំណាក់វត្តអារាមនានា ដែលព្រះអង្គមានលទ្ធភាពប្រទានទេយ្យទានសម្រាប់ជនរងគ្រោះតាមរយៈអនុសាខា។
ឯឧត្តម ទៀ សីហា ប្រធានគណៈកម្មាធិការសាខា ក៏បានប្រគល់ជូននូវភារកិច្ចមួយចំនួនជូនដល់ គណៈកិត្តិយស គណៈកម្មាធិការអនុសាខាទាំង១២ក្រុង-ស្រុករួមមាន៖
១- ទីស្នាក់ការអនុសាខា ត្រូវចាត់តាំងមន្ត្រីប្រចាំការ២រូបដែលជាជំនួយការជូនគណៈកម្មាធិការអនុសាខា។
២- រៀបចំការប្រជុំគណៈកិត្តិយស គណៈកម្មាធិកាអនុសាខា ដើម្បីធ្វើការបូកសរុបសកម្មភាពប្រចាំឆ្នាំ និងលើកទិសដៅអភិវឌ្ឍន៍អនុសាខាបន្ត។
៣- ផ្សព្វផ្សាយចលនាកាកបាទក្រហម លើកកម្ពស់សេចក្ដីថ្លៃថ្នូររបស់មនុស្សជាតិ និងការពារតម្លៃមនុស្សធម៌របស់ជនរងគ្រោះ។
៤- ជំរុញការងារពង្រីកសមាជិកភាព តម្រង់គោលដៅអប្បបរមា១% (មួយភាគរយ) នៃចំនួនប្រជាពលរដ្ឋក្នុងក្រុង-ស្រុក របស់ខ្លួន។
៥- ខិតខំកៀរគររកមូលនិធិ ពីគ្រប់មជ្ឈដ្ឋានដើម្បីគាំទ្រសកម្មភាពមនុស្សធម៌ ក្នុងការឆ្លើយតមគ្រោះមហន្តរាយក្នុងភូមសាស្ត្រក្រុង-ស្រុក បានទាន់ពេលវេលា។
៦- ផ្ដល់ព័ត៌មានចាំបាច់បន្ទាន់ពីហេតុការណ៍ ឧបទ្ទវហេតុនៅភូមសាស្ត្រខ្លួនមកសាខាខេត្ត។
៧- គ្រប់គ្រងតម្រង់ទិសដៅការងារក្រុមកាកបាទក្រហមកម្ពុជា ឃុំ-សង្កាត់ ។
៨- គ្រប់គ្រង និងថែរក្សាអ្នកស្ម័គ្រចិត្តកាកបាទក្រហមកម្ពុជាតាមភូមិ។
៩- ពង្រឹង និងពង្រីកសកម្មភាពយុវជនកាកបាទក្រហមកម្ពុជា តាមសាលារៀន។
១០- គ្រប់គ្រង និងអនុវត្តសម្មភាពគម្រោង/កម្មវិធីនានារបស់សាខា ក្នុងភូមិសាស្ត្រ ក្រុង-ស្រុក។
១១- គ្រប់គ្រងហិរញ្ញវត្ថុ និងទ្រព្យសម្បត្តិរបស់អនុសាខាតាមទម្រង់ការហិរញ្ញវត្ថុរបស់កាកបាទក្រហមកម្ពុជា និងធ្វើរបាយការឆ្នាំជូនសាខាខេត្ត។
១២- ធ្វើរបាយការណ៍សម្មភាពអនុសាខា ប្រចាំខែ ប្រចាំត្រីមាស ឆមាស និងប្រចាំឆ្នាំជូនសាខាតាមកាលកំណត់។
ឯកឧត្តមបន្ថែមថា ទាំងនេះ គឺជាភារកិច្ចសំខាន់ៗដែលអនុសាខាត្រូវយកចិត្តទុកដាក់អនុវត្ត ដើម្បីឈានទៅអនុវត្តន៍ពាក្យស្លោក “កាកបាទក្រហមកម្ពុជា មានគ្រប់ទីកន្លែង សម្រាប់គ្រប់ៗគ្នា” ឬ “ទីណាមានការលំបាក ទីនោះមានកាកបាទក្រហមកម្ពុជា”៕
