ឃាត់ខ្លួនជនសង្ស័យ២នាក់ ពីបទលួចគោអ្នកស្រុក
ខេត្តកំពង់ស្ពឺ៖ជនសង្ស័យដែលជំនាញខាងលួចគោអ្នកស្រុក ទៅលក់ ត្រូវបានកម្លាំងព្រហ្មទណ្ឌស្រុក សហការជាមួយប៉ុស្ដិ៍រលាំងចកចាប់ឃាត់ខ្លួន កាលពីថ្ងៃសៅរ៍ ៨កើត ខែមាឃ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី១ ខែកុម្ភៈ ឆ្នាំ២០២០ វេលាម៉ោង១៨ និង១០នាទីយប់ នៅចំណុចខាងលិចភូមិអន្លង់គង់ ឃុំត្រពាំងគង ស្រុកសំរោងទង ខេត្តកំពង់ស្ពឺ បន្ទាប់ពីជនសង្ស័យទាំងពីរនាក់ ធ្វើសកម្មភាពលួចគោអ្នកស្រុកដាក់លើឡានបម្រុងដឹកយកទៅលក់ ។
សមត្ថកិច្ចបានឲ្យដឹងថា ជនសង្ស័យមានឈ្មោះឌី សៀ ភេទប្រុស អាយុ៤៤ឆ្នាំ រស់នៅភូមិអន្លង់គង់ ឃុំត្រពាំងគង ស្រុកសំរោងទង ខេត្តកំពង់ស្ពឺ និងឈ្មោះកូយ ហេង ភេទប្រុស អាយុ៤៧ឆ្នាំ រស់នៅភូមិមហាលំពាំងទី១ ឃុំសែនដី ស្រុកសំរោងទង ខេត្តកំពង់ស្ពឺ ។
នៅចំពោះមុខសមត្ថកិច្ច ជនសង្ស័យបានឆ្លើយសារភាព ថាពួកខ្លួនពិតជាបានបើកឡានដើរលួចគោ អ្នកស្រុកពិតប្រាកដមែន ដែលនេះមិនមែនជាលើកទី១នោះទេ ។
សមត្ថកិច្ចបញ្ជាក់ថា ជនសង្ស័យដែលឃាត់ខ្លួននេះពាក់ព័ន្ធករណីចោរកម្មលួចគោ ជាច្រើនក្បាលរបសប្រជាពលរដ្ឋ ក្នុងនោះមានគោញី ចំនួន០១ក្បាល សម្បុរក្រហម ស្នែងពក របស់ឈ្មោះ ថែម គន្ធា ភេទស្រី អាយុ៣៨ឆ្នាំ រស់នៅភូមិពោធិ៍ ឃុំរលាំងចក ស្រុកសំរោងទង ខេត្តកំពង់ស្ពឺ ដែលបានបាត់កាលពីវេលាម៉ោង១៥:០០នាទីនាថ្ងៃខែខាងលើ។
បន្ទាប់ពីទទួលពាក្យបណ្តឹងរបស់ម្ចាស់គោរួចមកសមត្ថកិច្ចបានកោះហៅជនសង្ស័យឈ្មោះ ឌីសៀ មកសាកសួរ។
ក្រោយពេលសាកសួរឈ្មោះឌី សៀ បានឆ្លើយសារភាពថា គោខាងលើខ្លួនបានធ្វើសកម្មភាព លួចនៅចំណុចខាងលិចភូមិអន្លង់គង់ ឃុំត្រពាំងគង ស្រុកសំរោងទង ខេត្តកំពង់ស្ពឺ ពិតប្រាកដមែន ដោយបើករថយន្តដើរលួច។
បច្ចុប្បន្ន ជំនាញផ្នែកព្រហ្មទណ្ឌស្រុក កំពុងតែសាកសួរ និងកសាងសំណុំរឿងចាត់ការតាមនីតិវិធី។ចំណែកសត្វគោសមត្ថកិច្ចបានទាក់ទងហៅម្ចាស់យកទទួលយកទៅប្រើប្រាស់វិញអស់ហើយ នៅថ្ងៃទី២ ខែកុម្ភៈ ឆ្នាំ២០២០៕
