ដាក់ថ្នាំបំពុលសត្វឆ្កែងាប់ យកម៉ូតូពលរដ្ឋអស់១គ្រឿង ដោយសុវត្ថិភាព
ខេត្តព្រៃវែង៖ម៉ូតូពលរដ្ឋ១គ្រឿង ត្រូវបានក្រុមចោរចូលទៅកាត់សោលួចយកពីក្រោមផ្ទះទៅដោយសុវត្ថិភាព បន្ទាប់ពីដាក់ថ្នាំបំពុលសត្វឆ្កែងាប់។
ករណីដែលបង្កឱ្យមានការភ្ញាក់ផ្អើលនេះបានកើតឡើងកាលពីថ្ងៃទី២០ ខែកុម្ភ: ឆ្នាំ២០២០ នៅត្រង់ចំណុចព្រែកផ្ទោល ស្ថិតភូមិព្រែកក្រូច ឃុំព្រែកតាសរ ស្រុកពោធិ៍រៀង ខេត្តព្រៃវែង។
ជនរងគ្រោះដែលបាត់បង់ម៉ូតូម៉ាក ហុងដាឌ្រីម សេ១២៥ ស៊េរីឆ្នាំ២០១២ ពណ៌ខ្មៅ មួយគ្រឿងពាក់ស្លាកលេខ កណ្ដាល 1N-4063នោះមានឈ្មោះ ឈួន ហេង ភេទប្រុស អាយុ៤៣ឆ្នាំ មុខរបរ កសិករ មានទីលំនៅកន្លែងកើតហេតុខាងលើ ដោយសារក្រុមចោរបានដាក់ថ្នាំបំពុលក្នុងសាច់គោឱ្យឆ្កែម្ចាស់ផ្ទះស៊ី ហើយពេលឆ្កែស៊ីហើយពុលងាប់ ក្រុមចោរក៏មានធ្វើសកម្មភាពចូលទៅកាត់សោលួចយកម៉ូតូពីក្រោមផ្ទះបាត់ដោយសុវត្ថិភាពតែម្តង។
បើតាមម្ចាស់ផ្ទះជាជនរងគ្រោះបានឱ្យដឹងថា មុនពេលកើតហេតុ ជនរងគ្រោះបានយកម៉ូតូទៅផ្ញើដាក់ក្រោមផ្ទះឪពុក ចាក់សោ.ក គ្មានបន្ទប់ទុកដាក់ត្រឹមត្រូវនោះទេ លុះដល់វេលាម៉ោងប្រហែល១ និង១៥នាទីរំលងអធ្រាត្រឈានចូល ថ្ងៃទី២០ ខែកុម្ភ: ឆ្នាំ២០២០ ក្រុមចោរបានបំពុលឆ្កែងាប់អស់មួយក្បាលនៅចម្ងាយពីផ្ទះប្រវែង១៣០ម៉ែត្រ រួចកាច់សោ ក អូសចេញតាមវាលស្រែខាងក្រោយផ្ទះទៅបាត់តែម្តង ។
លុះព្រឹកឡើងម្ចាស់ឃើញឆ្កែងាប់នៅជិតពំនូកចំបើង ដោយមានសាច់គោសម្រាប់បំពុលឆ្កែមួយថង់ ហើយបាត់ម៉ូតូពីក្រោមផ្ទះ ក៏រត់ទៅប្តឹងសមត្ថកិច្ចនគរបាលប៉ុស្តិ៍រដ្ឋបាលព្រែកតាសរ ធ្វើការស្រាវជ្រាវរកមុខសញ្ញា ដើម្បីចាប់ខ្លួនយកមកចាត់ការតាមនីតិវិធី៕